Yesu aahaalattula awiixutti axexe, Pedru, Andreya, Yakobo ni Yohani wira akhale atothi aatthu. Nihiku na Saabadu, otheene aya yaahirowa esinagoga ya oKafarnawu. Okathi Yesu aawiixuttiha awe atthu esinagoga ele, awo yaahitikinihiwa ni moota iixuttiha awe. Maana Yesu iixuttiha ntoko mwaneene, ohiya ntoko alipa-oolepa aahiiso awiixuttihi a ikano.

Nihiku na Saabadu, aahikhala mulopwana mmosa aavariwe ni nlaikha nootakhala. Ori ene musinagoga, mulopwana ole aahikhuwela vanceene oriki: “Yesu muNazarethi, murina-ni nyuwo ni hiyo? Murwenle onipwetexa? Miyo kinnosuwelani: nyuwo mwá Mwana a Muluku”. Oomolaka nlaikha nne naamuhaaxa mulopwana ole, Yesu aahimmye wira: “Omàle wé, omuhiye mutth’owo”.​—Marko 1:24, 25.

Okathi ole, nlaikha nne naahimurihela vathi onapacerya othukumela ni okhuwela vanceene. Nto naahimuhiya mulopwana ole “nihimwirihale yotakhala”. (Luka 4:35) Atthu otheene yaari musinagoga mme yaahitikinihiwa vanceene! Awo yaanikohana yiiraka: “Exen’ila? . . . Owo onniruma malaikha òtakhala, khíyamwiwelela”. (Marko 1:27) Muhupi ola wootikiniha, waahimwareela oGalileya wotheene.

Nuumala okhuma musinagoga, Yesu ni awiixutti awe yaahirowa vatthokoni va Simoni yoowo iihaniwa-tho Pedru. Maathi awe Pedru khaareere owereiwa efeepere. Awo yaahimuxonttela Yesu wira omukhaliherye. Tivonto, Yesu aahinvarelela ntata khiyamweemexa. Okathi ene yoowo, aahipenuwa onapacerya omurumeela Yesu ni awiixutti awe, woonasa wene olokiheryaka yoolya.

Varowaka wiila, atthu a mipantta sotheene yaanoorwa owannyawe Pedru yaaruuhaka aretta aya. Moohipisa, vaakhala ntoko wira atthu yaahisareya vate vale. Nthowa xeeni? Nthowa noowi yaaphavela openuxiwa. Tthiri, “othene ale yawereliwa n’amusi aya, yarina iretta sinjene, yanimuroihela Yesu: owo amòkolelaka matata khula muretta, aninvoniha”. (Luka 4:40) Tthiri ntoko saalavuliwe aya vahinatthi ni profeta Yesaya, Yesu aahivoniha iretta sotheene. (Yesaya 53:4) Nave aanoomola malaikha ootakhala yaavanre atthu. Vaavo malaikha ootakhala yaamuhiya aya mutthu, yaanikhuwela ariki: “Nyuwo mwá Mwana a Muluku!” (Luka 4:41) Masi Yesu aahipwapwela ni omaaliha. Awo yaahisuwela wira Yesu ti Kristu. Nto Yesu khaaphavela wira yoothereryeke wira animukokhorela Muluku eekeekhai.