Vano, atthu a mittetthe soorakamela yaahiiwa olavuliwaka Yesu. Nto atthu anceene a mittetthe iyo yaanirwa onwiriyana ni woona miteko sootikiniha sa Yesu. Masi mahiku vakhaani muhoolo mwaya, Yesu aahitthikela oKafarnawu muttetthe aakhanle awe okathi munceene. Atthu anceene yaakhala waattamela Ephareya ya oGalileya, yaahisuwela wira Yesu ootthika. Nto awo yaahirowa opuro Yesu ari awe. Akina a yaawo yaari aFarisi ni awiixuttihi a Ikano yaakhuma oGalileya, oYudeya ni oYerusalemu.

“Siso, yahithukumana weiwo atthu anjene, mpakha ohinaphwanyaneya opuro nnákhala vamukhora. Yesu analalèrya atthu awo masu a Muluku”. (Marko 2:2) Yesu aahipaka etthu yootepa otikiniha. Eyo enoonikhaliherya oxukhurela owerya Yesu orina awe wa omaliha etthu enaakumiherya maxakha apinaatamu ni waattikiherya ekumi yooloka.

Vaavo Yesu iixuttiha awe mpaani yahaareere atthu, alopwana 4 yaahimuruuhela mutthu oorakala aari vanrepani. Awo yaaphavela wira Yesu ompenuxe mpatthani aya ole. Mwaha wa muttitthi wahaareere, awo “khiyàwerya ompixa varyawe Yesu”. (Marko 2:4) Tthiri, yaahixanka. Nto yaahiwela vasulu va empa anavenula nipatho. Moottharelana, yaahikuxa nrepa naari muretta ole anakuruxela opuro aari Yesu.

Niireke Yesu aahinanariwa? Nnaari! Masi Yesu aahitikinihiwa ni waamini waya khumuhimeerya muretta ole wira: “Itampi sanyu soleveleliwa!” (Matheyo 9:2) Niireke Yesu aahikhalana ehakhi ya olevelela itampi? Yuupuwelelaka etthu ele, alipa-oolepa ni aFarisi yaahimukoha wira: “Mutth’ula onlavulela-ni siso? Ola onninveha Muluku! T’ani onwerya olevelela itampi, ahikhanle Muluku pahi?”​—Marko 2:7.

Osuwelaka ele yuupuwela aya, Yesu aahaakoha wira: “Munùpuwelela-ni siso mmurimani mwanyu? Yokhweya tivi? Omwirela òrakal’ola wira: ‘Itampi sanyu soleveleliwa’; walá omwirela: ‘Nvenyé, mukuxe nrepa nanyu, mwetteke’?” (Marko 2:8, 9) Mwaha wa mukuttho ovanhe awe, Yesu onniwerya olevelela itampi sa atthu otheene.

Nuumala-vo, aahiwooniherya atthu ale vamosa ni anamavaanyiha awe wira ookhalana owerya woolevelela itampi valaponi. Onwehaka mulipa-oorakala ole, Yesu aahimwiirela wira: “Kiniwirelani nyuwo: nvenyé, mukuxe nrepa nanyu, muroke owani!” Mowaakuveya mulopwana ole aahikuxa nrepa nawe oneetta ooniwaka ni atthu othene yaari opuro ole. Tthiri atthu ale yaahitikinihiwa! Nto otheene aya yaahinvuwiha Muluku ariki: “Khantonko wona etthu sisa!”​—Marko 2:11, 12.

Moone wira Yesu aahilikanyiha itampi ni iretta. Nave aahilikanyiha oleveleliwa itampi ni ekumi ya werutthuni. Biibiliya oniixuttiha wira, namuyari ahu oopacerya, Adamu, aahittheka, tivonto otheene ahu noorava yookhumelela ya etampi ele, niire so, iretta ni okhwa. Masi, vaavo Omwene wa Muluku onrowa aya olamulelaka, Yesu onrowa olevelela itampi sa atthu otheene animphenta ni omurumeela Muluku. Okathi owo, iretta sotheene sinoomala.​—aRoma 5:12, 18, 19.