Atthu anceene yaakhala mpantta onikela epheyo wa Ephareya ya oGalileya, yaahisuwela wira Yesu aahitthika okhumaka oDekaapoli. Woonasa wene, atthu ale yaahiiwa wira Yesu aahimaaliha ephareya, munamukhaya ni aahoomola malaikha ootakhala yaavanre alopwana anli. Tivonto “muttitthi w’atthu” waahithukumana ophareya, woonasa wene muttetthe wa oKafarnawu wira amwaakhele Yesu. (Marko 5:21) Vaavo Yesu aaphiya awe mukerekhere mwa ephareya, atthu ale yaahisiveliwa vanceene.

Mutthu mukina aaphavela onweha Yesu aari Jairo, mukhulupale a esinagoga, woonasa wene ya oKafarnawu. Owo aahikokhora ikwaha sinceene ohoolo wa Yesu onanvekela wira: “Mwan’aka mwamuthiyana ohanle okhwa. Murwé mmwixatherye matat’anyu, wira avone, akhale mukumi”. (Marko 5:23) Jairo aanimphenta vanceene mwanawe mmoseene mwaamuthiyana, yoowo aarina iyaakha 12. Yesu aamwaakhunle sai Jairo?​—Luka 8:42.

Vaavo Yesu aarowa awe owannyawe Jairo, yaahikhumelela etthu yaatikininhe atthu anceene. Atthu anceene yaamuhoola Yesu khiyaareere ohakalala, awo yaaniikoha akhala wira Yesu ampaka mwiiriirya mukina. Masi, muthiyana aari muttitthi ole aahixankiheya vanceene mwaha wa oretta awe.

Mwa iyaakha 12, muthiyana ole muYuda aahihaawa vanceene mwaha wa ephome awe yaayiiheya. Owo aahaaphavelasa mameediku manceene ni aahihonona musurukhu awe wotheene. Hata vaari siiso, owo khaapenunwe. Tthiri muthiyana ole “anvira atepaka”.​—Marko 5:26.

Mwekeekhai mukhalelo wa muthiyana ole waari wowooniha othunku, maana waanimuuliha muro ni omukhulumula. Tthiri oretta ole aarina awe, khiwaalavuliwa vari atthu anceene. Ohiya-vo, moovarihana ni Nlamulo na Moise, oyiiheya ephome waanimwiiriha muthiyana okhalana mwiikho. Nto khula mutthu aarowa onvara aahiiso ovara ikuwo sawe, aahaana orapa ni aanikhalana mwiikho mpakha ohiyu.​—Onamukuttho 15:25-27.

Muthiyana ole “ahìwa sìrawe Yesu”, nto aahikelela omwaavya. Okhala wira aari ni mwiikho, owo aanitthara muttitthi ole mowiikasoopa wira ohisuweliwe. Nave aanihimya vamurimani vawe wira: “Miyo kakwannyaru nlaya nawe pahi, kinovona”. Tthiri, vaavo aavanre awe nlaya aahiiso soowara sa Yesu, moowaakuveya ephome ya muthiyana ole yaahixeya! Muthiyana ole “ahona mwerutthuni mwawe wira òvona”.​—Marko 5:27-29.

Nuumala-vo, Yesu aahikoha wira: “T’ani okikwannyale?” Nuumala muthiyana ole wiiwa masu awo a Yesu, oonenle sai? Pedru aahilavula ntoko wira ampwapwela Yesu oriki: “Mwixuttihi, muttitthi ula onnophunyani wokakhakani!” Masi xeeni Yesu aakonhe awe wira: “T’ani okikwannyale?” Yesu aahimmye so: “Òkhala okikwannyale. Kihona wira ikuru sokhuma mwa miyo”. (Luka 8:45, 46) Okathi Yesu anvoninha awe muthiyana ole, ikuru sawe saahikhuma.

Oonale awe wira aahisuweliwa, muthiyana ole aahikokhora ohoolo wa Yesu othukumelaka ni woova. Ohoolo wa atthu otheene, owo aahilavula ekeekhai voohimya sa oretta awe ni moota aavonihiwe awe. Moomureerela murima Yesu aahimmye so: “Mwan’aka, wamini wanyu wowopolani. Muroke ni murettele: mukhaleke mukumi!”—Marko 5:34.

Mwekeekhai, Ole othanliwe ni Muluku wira olamuleleke elapo, mutthu oophenta ni oothunku. Tthiri Yesu ookhalana owerya wowaakhapelela atthu ni waakhaliherya!