Jairo aahinweha muthiyana ole aayiiheya ephome ovonihiwaka ni Yesu. Tthiri, Yesu anwerya omukhaliherya mwaana mwaamuthiyana a Jairo. Nto Jairo oona wira ‘mwan’awe mwamuthiyana ahòkhwa’. (Matheyo 9:18) Nto niireke vanweryaneya omukhaliherya?

Okathi Yesu aalavula awe ni muthiyana ole anvoninha awe, yaahiphiya alopwana yaakhuma owannyawe Jairo, anahimya wira: “Mwan’inyu ohòkhwa. Munimùkhulela-ni-tho Mwixuttihi ula?”—Marko 5:35.

Tthiri waari muhupi wooriipiha murima! Jairo, yoowo aattittimihiwa vanceene mmuttettheni, aahixanka. Mwanawe mwaamuthiyana mmoseene aahikhwa. Vano Yesu aahiiwa mwaha ole. Onwehaka Jairo, aahilavula moolipiha oriki: “Muhòvé. Mwamini pahi”.—Marko 5:36.

Nuumala-vo, Yesu aahimutthara Jairo owannyawe. Okathi yaaphiyale aya, yaahaaphwanya atthu anceene axankale ene. Atthu khiyaareere oriipiwa murima ni yaaninla yiimanaka vapeeto. Yesu aahikela mpaani khuhimya wira: “Mwanamwane owo khakhwiye: onorupa”. (Marko 5:39) Vaavo atthu ale yaamwiiwale aya Yesu ohimyaka masu ala, yaahimutheya. Maana yaahisuwela wira mwaana ole aahikhwa. Masi orumeelaka owerya aavahiwe awe ni Muluku, Yesu aarowa wooniherya wira vanniweryaneya waahihimuxa alipa-ookhwa, ntoko siisaale onivenxiwa awe mutthu onrupa.

Vano Yesu, aahaavekela atthu yaari mpaani mme okhuma, khuhala ni Pedru, Yakobo, Yohani ni axipaapa awe mwaana ole. Yesu ni atthu ale 5 yaahirowa opuro aataleliwe awe mwaaruusi ole. Ovarenle ene ntata na mwaana ole, Yesu aahimmye so: “Talithá kùm! Eyo enihimya wira: ‘Mwanamwane, kiniwirelani ti mi: nvenyé!’” (Marko 5:41) Naananoru, mwaaruusi ole aahivenya onapacerya weetta. Tthiri, Jairo ni mwaarawe yaahihakalala vanceene! Wira owooniherye tthiri wira mwaana ole aari mukumi, Yesu aahaavekela onvaha yoolya.

Atthu Yesu aavoniha awe, aanaaleela wira ahilaleyeke itthu aapakela awe, nave eyo ti etthu aaleelale awe anamuyari a mwaana ole. Masi, ohakalala wa anamuyari ale ni atthu akina waahiwiiriha olaleya muhupi ole “elapo ele yothene”. (Matheyo 9:26) Niireke nyuwo khimwaarowa olaleya vaakhanle wira mmusi inyu oohihimuxiwa? Ela, ekwaha ya nenli Yesu aamuhihimunxe awe mutthu aakhwiiye.