Yesu aanimuttittimiha vanceene Yohani Mbatiza. Masi atthu anceene yamoonela sai Yohani? Yesu aahimmye so: “Vano kalikanyihe n’ani atthu a mahiku ala? Anlikana n’anamwane ekilanthe vapuwani, khíyakhuwelelana yiraka: ‘Hiyo nowopelani ekoma y’otteliha murima, nyuwo khuhìna! Nowìpelani masipo òmoriha ikharari, nyuwo khuhìkhupanyerya!’”​—Matheyo 11:16, 17.

Yesu aaphavela ohimya exeeni? Owo aahitthokiherya oriki: “Vekekhai, ohòrwa Yohani Mbatiza, atthukwa ni ahawurya sohapala, vano atthu annihimya wira: ‘Owo namukhwa anepa’. Ohòrwa-tho Mwana a mutthu, onlya n’uniwurya, vano atthu annihimya wira: ‘Mmoneke mutth’ule: namulyá ni namuhapaliwa! Owo onnipatthanasa n’alipa-òliviha mpósito n’alipa-òttheka!’” (Matheyo 11:18, 19) Yohani aari ntoko muNaziri, owo khaawurya eviinyu, nto nloko nne yaamuhimya okhala namukhwanepa. (Mothakoni 6:2, 3; Luka 1:15) Yesu aakhala ntoko sinikhala aya atthu akina. Nnaamwi aalya ni owurya mookhalela, owo aahootheriwa wira aari namalya ni namuhapaliwa. Eyo enooniherya wira ovila waahakalaliha atthu.

Yesu aahaalikanyiha atthu a nloko nle ni anamwane akilaathale vapuwani anikhootta wiina vaavo anamwane akina aniipa aya aahiiso ahinriipiwa murima vaavo akina aninla aya. Nave Yesu aahihimya wira: “Vano ankhili annòneya okhala òloka mwaha wa miteko saya”. (Matheyo 11:16, 19) Tthiri, “miteko” iyo, eyo piiyo, sa Yohani ni sa Yesu saanooniherya wira atthu ale yanwootherya.

Nuumala Yesu waahimya atthu ale okhala oohaamini, owo aahipwapwela ipooma sa oKhorazini, oBethisaida ni oKafarnawu, opuro yoole aahaareere awe opaka miteko sootikiniha. Yesu aahimmye wira aahipaka miteko iyo sootikiniha ipooma sa oFiniisia, oTiro ni oSidoni, nave atthu a ipooma iyo yaahittharuwa itampi saya. Masi oKafarnawu opuro aahaareere awe olaleerya, atthu anceene khiyeemererya muhupi awe. Ohimyaka epooma ele, Yesu aalavunle so: “Nihiku na mulattu, atthu òSodoma animòneliwa othunku wovikanani nyuwo”.​—Matheyo 11:24.

Nuumala-vo, Yesu aahimuttottopela Tiithi awe maana aahaakhuwa ikeekhai somunepani “atthu òsuwela ni a miruku”. Masi aaleela atthu yahooneliwa vatthu yaawo yaalikana ni anamwane. (Matheyo 11:25) Nto Yesu aahaalattula oriki: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”.​—Matheyo 11:28-30.

Moota xeeni Yesu aakurunuxa awe murima? Makhulupale a itiini yaanaalemeliha atthu ni soolema saya soohaaxa, ntoko malamulo yincerenrye aya voohimya sa eSaabadu. Masi Yesu aanaakurunuxa murima, owiixuttihaka ekeekhai ya Muluku yeeyo yaawoopola soolema iye. Nave aahiwooniherya moota atthu ale yaarowa aya otaphuwa ohasuliwa waya ni makhulupale a ipoliitika ni ale yaalemeliwe mwaha wa itampi saya. Tthiri, Yesu aaniwiixuttiha moota itampi saya saarowa aya oleveleliwa ni moota wookhalana murettele ni Muluku.

Otheene ale aneemererya muritti ohinlemela wa Yesu, moohikhanyereriwa anniivahererya wa Muluku. Nave annimurumeela Tiithi ihu a wiirimu, yoowo ori oomoriwa ikharari ni oothunku. Opaka eyo, khontaphulela okuxa muritti woolemela, maana sooruma sa Muluku ti sooveya.​—1 Yohani 5:3.