Mwekeekhai, atthu yaahihakalala onweha-tho Yesu oNazarethi. Ohinatthi obatiziwa ni Yohani mwaakha mmosa waavinre, Yesu aasuweliwa okhala kalapintero muttetthe ole. Masi vano aanisuweliwa okhala mutthu onipaka miteko sootikiniha. Atthu a muttetthe ole yaaniphavela onweha Yesu opakaka miiriirya eriyari aya.

Ohakalala waya waahitepa vaavo yanweha aya Yesu orowaka osinagoga, ntoko aalimalenle awe. Musinagoga mme, atthu yaanivekela, osoma iliivuru sa Moise ntoko siiraneya aya “mpani mothukumana isábadu sothene”. (Miteko 15:21) Nave saanisommwa mipantta sa iliivuru sa maprofeta. Nto vaavo Yesu eemenle awe wira osome, aanaasuwela atthu anceene yaamakela orwa esinagoga ele khalai. Yesu aahivahereriwa eroolu ya profeta Yesaya. Nto aahiphwanya opuro waamuhimya Ole aarowa othanliwa ni munepa wootteela wa Yehova. Olelo-va, moolumo awo ari Yesaya 61:1, 2.

Yesu aasomme mpantta waamuhimya vahinatthi Ole aarowa owoopola atthu ootthukweliwa, otthukula maitho a atthu ahinoona ni olaleya eyaakha ya eparakha ya Yehova. Nto Yesu aahinvahererya eroolu ele murumeyi khukilaathi. Atthu otheene yaaninwehexexa Yesu. Woonasa wene, Yesu aahilavula okathi vakhaani, nto khuhimya moolumo ala ootthuneya oriki: “Sihìraneya olelo solempwa iya sìwalyanyu nanano va”.​—Luka 4:21.

Atikinihiwe ene, atthu ale ‘yahithamala mwaha wa masu èparakha yakhuma mwano mwawe’, nave yaanikohana ariki: “Ola khahiyó mwana a Yosefe?” Masi, vaavo Yesu oonale awe wira atthu ale yaaphavela wira opake miiriirya, Yesu aahivikaniha oriki: “Vekekhai, nyuwo munikùpuxerya ekano eyo wira: ‘Mukulukhana, mwivonihe mmansinyu! Nihìwa sihimmwaka sotikiniha sìralyanyu oKafarnawu: nkirani-tho va mulaponi mwanyu-mu’”. (Luka 4:22, 23) Woonasa wene atthu aattamanne awe yoona wira Yesu aahaana toko waapenuxa atthu a elapo awe. Nto okhala wira khaapanke eyo, yoona wira Yesu khaathokorerya saana.

Osuwelaka etthu yuupuwela aya, Yesu aahilavula itthu saakhumelenle aIsarayeli. Khalai yaahikhala anaamukhweli anceene mahiku a Eliya, nto Eliya khaarummwale orowa waakhaliherya. Masi aaronwe wa naamukhweli ahaakhanle mwIsarayeli. Owo aakhala oSarepta waattamela epooma ya oSidoni weiwo Eliya aapanke awe mwiiriirya wooponle ikumi. (1 Mamwene 17:8-16) Mahiku a Eliseyo, yaahikhala anamakuttula anceene wIsarayeli, masi Eliseyo ampenunxe Naamani mulopwana ooSiria.​—2 Mamwene 5:1, 8-14.

Atthu ale yoonenle sai nuumala osuwela wira moolumo a Yesu yooniherya wira awo yaari atthu oowiitthuna ni oohaamini? Awo yaahinanariwa vanceene, yaaheemela ni yaahimukakhela Yesu ota wa epooma. Yaahimuroiha oneri wa mwaako, opuro yoowo saatekiwe ipa sikina sa oNazarethi. Awo yaaphavela omurihela vathi. Masi Yesu aahitthyawa. Nuumala-vo, Yesu aahirowa oKafarnawu, mpantta onikela epheyo wa Ephareya ya oGalileya.