Yesu ni awiixutti awe yaahiphiya oBethisaida. Atthu a elapo ele yaahimuruuhela mulopwana ahoona, amuxonttela Yesu wira ompenuxe.

Ovarenle ene ntata na mulopwana ole, Yesu aahimuroiha okhwipi wa muttetthe ole. Nuumala omusenela mmaithoni, Yesu aahimukoha wira: “Munnona etthu?” Owo aahaakhula wira: “Ayo, kiniwona atthu yettaka: kiniwona ntoko miri”. (Marko 8:23, 24) Nuumala ovara maitho a mulopwana ole, owo aahipacerya woona. Nuumala-vo, aahimwiirela orowa owannyawe, maana aahikhala saana ni aahimulakiherya wira ohirowe opooma.

Nto, Yesu ni awiixutti awe yaahirowa mpantta onikela epheyo wa oKesareya wa oFilipi. Mukwaha ole waari wa ikiloomo 40. Epooma ele yaari vatturuuruni ya imeeturu 350 vasulu va ephareya. Nave oryeene opuro ole, vaaniweryaneya woona Mwaako Hermoni osareiye ene eneevi mpantta onikela epheyo. Waaniheryasa waari mukwaha wa mahiku manli.

Mphironi, Yesu aahaavya opuro wira ovekele mekhawe. Sihalaka myeeri 9 aahiiso 10 wira iiviwe, Yesu aanitepa waaxankela awiixutti awe. Awiixutti akina yaahihiya omutthara, nto akina yaahixanka aahiiso okhumuwa. Nto akina pooti wira khiyaasuwela etthu yaamwiiriha okhootta okhalihiwa mwene. Nave akina yaahixanka mwaha woohisuwela etthu yaamwiirinhe ohivaha ethoonyeryo wira ooniherye omutthu awe.

Vaavo awiixutti yaaronwe aya opuro aavekela awe, Yesu aahaakoha wira: “Atthu anihimya wira Mwana a mutthu t’ani?” Awo yaahaakhula wira: “Àkhala anihimya wira ti Yohani Mbatiza, akina wira t’Eliya, akina-tho wira ti Yeremiya, walá profeta mukina”. Tthiri atthu akina yuupuwela wira Yesu aari mmosa atthu awo yaahihimuxiwe. Ophavelaka osuwela moonelo aya, Yesu aakonhe wira: “Ankhi nyuwo, munihimya wira miyo ka pani?” Moohipisa, Pedru aahimwaakhula wira: “Nyuwo mwá Kristu, Mwana a Muluku mukumi”.​—Matheyo 16:13-16.

Yesu aahimmye wira Pedru aahaana ohakalala okhala wira Muluku taamukhalihenrye ohimya eyo, oriki: “Vano miyo kinolèlani wira: Nyuwo mwá Pedru, eyo p’iyo: Mwalá. Vamwalá vavo kinoteka-vo ekerej’aka [muloko]. Vano ikuru s’okhwa sinimojela opwetexa ekerej’eyo”. Yesu aahihimya wira aarowa oteka muloko awe, nto akhala wira ale yaarowa wiirela mpantta yanvikaniha ororomeleya valaponi-va, nnakhala Mahiye aahiiso okhwa khiwaarowa waawerya. Tivo Yesu aamuleihenrya awe Pedru wira: “Miyo kinimovahani mihulelo s’Omwene wa wirimu”​—Matheyo 16:18, 19.

Khahiyo wira Yesu anvaha Pedru opuro woopacerya eriyari ya arummwa. Nave khahiyo wira aari nluku aahiiso mathipelo a muloko. Maana Yesu mwaneene aahiihimya okhala Mwala waarowa aya otekiwa muloko. (1 aKorinto 3:11; aÉfeso 2:20) Masi Pedru aarowa waakhela mihulelo miraru. Aarowa okhalana eparakha ya  orumeela mihulelo iyo, wira atthu awerye okela Momweneni wa wiirimu.

Pedru aahirumeela muhulelo woopacerya Pentekoositi a 33 EC, owooniheryaka aYuda oottharuwa ni ale yahaakhanle aYuda etthu yaatthuneya aya opaka wira yoopowe. Nave aahirumeela muhulelo wa nenli, wira aSamariya oowaamini akele Momweneni mwa Muluku. Nuumala-vo, mwaakha wa 36 EC, Pedru aahirumeela muhulelo wa neeraru aavahaka eparakha Amalapo oohinnuwihiwa, ntoko Kornelio ni atthu akina.​—Miteko 2:37, 38; 8:14-17; 10:44-48.

Okathi ole, arummwa a Yesu yaahixanka maana owo aahihimya wira moohipisa aarowa ohaaxiwa ni wiiviwa oYerusalemu. Okhala wira khiiwexenxe wira Yesu aarowa ohihimuxiwa wira akhaleke wiirimu, Pedru aahimurowana okhwipi, khukelela onvaanya, iiraka: “Pwiya, Muluku ahitthuné eyo. Nnari! Etthu iyo ehokhumeleleni!” Masi Yesu aahimurukunuwela, khumuhimeerya wira: “Satana wé! Khuma vamaithoni vaka! Weyo onokererya: khunupuwela itthu sa Muluku, onupuwela s’atthu pahi”.​—Matheyo 16:22, 23.

Vano Yesu aahiwiitthana atthu akina vamosa ni arummwa awe aaleela wira, khivanikhweya okhala mutthareli awe. Owo aahimmye wira: “Akhalá mutthu ontthuna okitthara, aikhotte mwanene, akapatteke” mwiri awe wa nihaaxeryo “akitthareke. Tthiri, ole ontthuna wopola ekumi awe, enomurimela; vano, ole onkupali orimeliha ekumi awe mwaha wa miyo ni wa ehapari yorera, owo onimòpola yeyo”.—Marko 8:34, 35.

Tthiri, wira Yesu oweemererye atthareli awe, awo yaahaana olipa murima ni wiileva. Yesu aahimmye wira: “Akhalá mutthu onùliwa muru mwaha wa miyo ni wa itthu sinixuttihaka, ùliwaka eríyari y’atthu ala òhiroromeleya ni òttheka, nave miyo kinimùleliwa muru yowo, vanrwaka movuwani mw’Atithi vamosá ni malaikha òwarya”. (Marko 8:38) Mwekeekhai, vaavo Yesu onrowa awe orwa, “ononvaha khula mutthu sinimphwanela mwaha wa miteko sawe”.​—Matheyo 16:27.