Yaahivira eyaakha ntero Yohani Mbatiza ori ene mukhatteya. Masi, nlelo aaniiwa itthu sootikiniha Yesu aapaka awe. Nkahaya muupuwele moota oonenle awe nuumala owiiwa awiixutti awe ahimyaka wira Yesu aahimuhihimuxa mwaana a naamukhweli oNayini. Masi, Yohani aaphavela omwiiwa mwaaneene Yesu ohimyaka ele yaataphulela aya itthu iye sotheene. Nto Yohani aahaaruma awiixutti awe anli. Opaka exeeni? Orowa omukoha Yesu wira: “Ti nyuwo ole ontthuna orwa, walá nimwalitteke mukina?”​—Luka 7:19.

Niireke nikoho nna naari noohikhalela? Yohani aari mutthu ooloka ni tambatinze Yesu iyaakha saattamela piili saavinre. Nave aahoona munepa wa Muluku omukhuruwelaka Yesu ni aahiiwa nsu na Muluku. Khanrina nthowa noohimya wira waamini wa Yohani waahivukuwa. Vaari siiso, Yesu khaarowa omulavula saana Yohani, ntoko iira awe okathi ole. Nto, akhala wira waamini wa Yohani khiwaavukunwe, xeeni ohalaka omukoha Yesu?

Woonasa wene, Yohani aaphavela omwiiwa Yesu mwaneene ohimyaka wira ti Mesiya. Eyo yammulipiha Yohani, yoowo ahaareere oriipiwa murima mukhatteya mme. Nikoho Yohani ampakenle awe Yesu naari nookhalela. Yohani aanisuwela iprofesia sa mBiibiliyani saahimya wira Oowoottihiwa aahiiso oothanliwa a Muluku, aarowa okhala mwene ni moopoli. Saahivira mweeri sinceene okhuma vaavale Yesu aabatiziwa awe, masi nlelo Yohani aari mukhatteya. Tivonto Yohani aakonhe awe akhala wira aamoorwa mutthu mukina aarowa omuranttela Yesu. Yoowo aarowa omaliherya sotheene saahimmwale vahinatthi saamuhimya Mesiya.

Ohiya paahi Yesu waalela awiixutti a Yohani wira: ‘Aayo ti miyo ole atthuna orwa’, Yesu aahiwooniherya wira aanikhaliheriwa ni Muluku wira aavonihe atthu anceene yaawereiwa iretta sa khula enamuna. Nuumala-vo aahaaleela awiixutti ale wira: “Murowé mwamulèle Yohani itthu sinìwanyu ni sinònanyu: ‘Alipa-òhona, vano annòna; alipa-òrakala, annetta orattene; anamakuttula annirerihiwa; alipa-òhìwa, vano annìwa; atthu akhwiye annihihimuwa; alipa-òhawa annilalèriwa ehapari yorera’”.​—Matheyo 11:4, 5.

Nikoho na Yohani ninnooniherya wira owo uupuwela wira Yesu aarowa opaka itthu sinceene. Nave woonasa wene, uupuwela wira ammukhaliherya okhuma mukhatteya. Masi Yesu aahimuleela Yohani wira ohilipeleleke miiriirya sikina ovikana iye aapaka awe.

Nuumala awiixutti a Yohani okhuma, Yesu aahaaleela atthu ale wira Yohani khahiyo aari profeta paahi. Owo aari ‘namitthaka’ a Yehova, yoowo aahimmwale vahinatthi ni Malakhiya 3:1. Nave aari profeta Eliya, yoowo onilavuliwa Malakhiya 3:23, 24. Yesu aahaatthokiherya oriki: “Kinolèlani ekhweli wira: mw’atthu othene ayariwe, khakhumelenle mulupale onvikana Yohani Mbatiza. Nto ole ori mwamukhanixa Momweneni wa wirimu t’uri mulupale onvikana Yohani”.​—Matheyo 11:11.

Vaavo Yesu aahimmye awe wira ole ori mwaamukhaanixa Momweneni mwa wiirimu tori muulupale onvikana Yohani, Yesu aahooniherya wira Yohani khonrowa olamulelaka wiirimu. Nnaamwi aalokihenrye ephiro ya Yesu, Yohani aahikhwa nlelo Kristu ohihunle ephiro yoorowa wiirimu. (aHéberi 10:19, 20) Tthiri, Yohani aari profeta oororomeleya a Muluku ni onrowa ohihimuxiwa wira okhaleke valaponi olamuleliwaka ni Omwene wa Muluku.