Vaavo arummwa a Yesu yaalaleerya aya oGalileya, nlelo Yohani iira oryeene mukhatteya. Vano saahivira iyaakha piili Yohani Mbatiza oryeene mukhatteya mme.

Yohani aahihimya wira yaari etthu yootakhala Mwene Herodi Antipa omuthela Herodiya, maana aari mwaara a Filipi, yoowo aari muhima awe. Herodi aahimuhiya mwaarawe wira omuthele Herodiya. Moovarihana ni Nlamulo na Moise, nenno Herodi aihimya awe wira aaneettela, ele aapanke awe yaari mararuwo. Okhala wira ele Yohani aahimmye awe khiyaamusivenle Herodi, owo aahiruma wira Yohani oriheliwe mukhatteya, woonasa wene aatumereriwe ni Herodiya.

Herodi khaasuwela etthu yoomwiiriha Yohani, okhala wira atthu “othene yanihimya wira Yohani ari profeta”. (Matheyo 14:5) Nto Herodiya aahisuwela ele aarowa awe omwiiriha. Maana Herodiya “animunlela ikuhu Yohani”, tthiri aaniphavela enamuna yoomwiiva. (Marko 6:19) Nto waahikhumelela okathi wooreerela.

Ohalaka vakhaani ophiya Paasikha a 32 EC, Herodi aahipaka efesta ya oyariwa wawe. Aahaalattula makhulupale a mulaponi mwawe ni makhulupale a anakhotto ni atthu oovuwa a epooma ya oGalileya. Okathi wa efesta, mwali Salome mwaana Herodiya aamuyanre awe ni Filipi, aahiina ohoolo wa atthu yaalattuliwe. Atthu ale yaahisiveliwa moota mwali ole iinale awe.

Osiveliwe ene vanceene ni wiina wa mwali ole, Herodi aahimwiirela wira: “Mukivekele entthunanyu, miyo kinimovahani”. Nave aahilapha oriki: “Etthu p’itthu enkivekelanyu, kinimovahani: hatá eriyari y’omwene aka”. Ohinatthi waakhula, Salome aahikhuma orowaka omukoha maama wira: “Kavekele exeni?”​—Marko 6:22-24.

Ola waari okathi wira Herodiya opake ele aaphavela awe! Moohipisa aahimwaakhula mwanawe wira: “Muru wa Yohani Mbatiza”. Moowaakuveya Salome aahirowa wa Herodi khuhimya wira: “Kintthuna mukivahe nanano vava, mukamelani, muru wa Yohani Mbatiza!”​—Marko 6:24, 25.

Nnaamwi Herodi aaxankale vanceene, ale aalattunle awe yaahimwiiwa omulaphelaka Salome. Okhala wira Herodi aamuuliwa muru ohipaka ele aaleihenrye awe, aahiruma wiiviwa mutthu ahaarina nthowa. Tivonto Herodi aahimuruma guarda orowa okhatteya wira amwiive Yohani. Moohipisa guarda ole aahiruuha muru wa Yohani mukamelani. Owo aahinvaha Salome, yoowo aamuroihenle maama awe.

Nuumala awiixutti a Yohani osuwela eyo, yaahirowela murutthu wa Yohani khusikha. Nave yaahimuleela Yesu.

Muhoolo mwaya, vaavo aiwale awe wira Yesu aanaavoniha atthu ni woomola malaikha ootakhala, Herodi aahoova vanceene. Owo aaphavela osuwela akhala wira mulopwana aapaka itthu iye, eyo piiyo, Yesu, aari Yohani Mbatiza ‘àhihimunwe mokhwani’. (Luka 9:7) Tivonto, Herodi Antipa aaniphavela vanceene onweha Yesu. Herodi khaaphavela osuwela olaleerya wa Yesu. Masi, Herodi aaphavela onweha Yesu wira osuwele akhala wira itthu iiwale awe saari sekeekhai.