Okhuma okathi yoole Yesu abatiziwe awe, owo aanisuweliwa vanceene. AYuda anceene yaahiweha miiriirya aapaka awe ni atthu a elapo ele yotheene yaahiiwa itthu sootikiniha aapaka awe. Vano, okathi wa Niira na Maxaxa oYerusalemu atthu anceene yaaniphavela onweha Yesu.

Masi atthu ale yaahikhalana moonelo woovirikana voohimya sa Yesu. Atthu akina yaahimya wira “owo t’òrera murima”. Akina yaahaakhula wira: “Nnari: owo oniwototha atthu”. (Yohani 7:12) Atthu ale yaahilavula itthu iye otepexa wene mahiku oopacerya a niira. Masi khaavo mutthu aalimpe murima wira omwaakiherye Yesu, okhala wira yaaniwoova makhulupale a aYuda.

Okathi wa niira nne, Yesu aahirowa otemplo. Atthu anceene yaahitikinihiwa moota Yesu iixuttiha awe. Okhala wira khaatonko orowa wiixuttihiwa ixikola sa awiixuttihi a ikano, aYuda yaanikoha wira: “Ola onsuwela sai vanjene sisa, ahisomme?”​—Yohani 7:15.

Yesu aahaatthokiherya wira: “Mwixuttiho aka khuhiyó wawaka: onkhuma wa Muluku òkirum-me. Akhalá mutthu omphavela wettela otthuna wa Muluku, onowerya wona mwixuttiho aka wàri wa Muluku, walá kàlavulaka sa mmuruni mwaka”. (Yohani 7:16, 17) Yesu iixuttiha moovarihana ni Nlamulo na Muluku, tivonto vannooneya wira aaphavela onvuwiha Muluku ohiya wiivuwiha mmensawe.

Nuumala-vo, Yesu aahimmye so: “Khahiyó Moise òvahaleni Ikano? Vano, khavo nnákhala mmosá a nyuwo onettela Ikano iyo. Nanso, mumphavelela-ni okìva?” Atthu akina a muttitthi ole woonasa wene yaakhumme ota wa epooma ele, khiyaasuwela tani yaaphavela omwiiva. Nave khiyaakupali wira yaahikhala atthu yaaphavela omwiiva mwiixuttihi ntoko ole. Nto yoona wira Yesu aarina muupuwelo woohiloka mwaha woohimya wira aamwiiviwa. Vano awo yaahimya wira: “Nyuwo mwá namukhwanepa. T’ani omphavela owivani?”—Yohani 7:19, 20.

Masi mwakha mmosa nnimeya waavinre, akhulupale a aYuda yaahiphavela omwiiva Yesu nuumala ompenuxa mulopwana nihiku na Saabadu. Vano Yesu aahilavula itthu saakhalihen-rye woona wira yaari atthu yahaarina othunku. Nave aahiwuupuxerya wira moovarihana ni Nlamulo, akhala wira mwaana mwaamulopwana aaniphiyeriha mahiku 8, hata nri ene nihiku na Saabadu, owo aahaana winnuwihiwa. Nuumala-vo, aahaakoha wira: “Siso nyuwo munimunnuwiha mutthu nihiku na Sábadu, muhivirikanyihaka Ikano sa Moise: vano munnanareliwa-ni ni miyo mwaha w’onvoniha vomalela mutthu nihiku na Sábadu? Muhimuthorihé mutthu muttharaka itthu sinòneya pahi: mwixutte olamula muttharaka exariya”.—Yohani 7:23, 24.

Atthu ooYerusalemu yaasuwenle mwaha ole, yaahimmye wira: “Khahiyó yola omphaveliwa [ni anamalamulela] wira ìviwe? Nto vano onnilavula vanlakani, khuhìrihiwa etthu. Khino makhulupal’ihu arosuwela tthiri wira owo ti Kristu?” Nto xeeni atthu yahaakupali aya wira Yesu ti Kristu? Awo yaahimmye wira: “Masi Kristu arwaka, khavo ontthuna osuwela onkhumawe: van’ola, hiyo nosuwela onkhumawe-wo”.​—Yohani 7:25-27.

Otemplo iwe, Yesu aahiwaakhula wira: “Nyuwo munnikisuwela! Nyuwo mosuwela onkhumaka-wo! Nto miyo nkirwiyé votthuna waka: òkhala okirumme ni t’èkekhai, yowo muhinimusuwelanyu. Miyo kinnimusuwela, okhala wira kinkhuma mwa yowo ni ti Yowo okirumme”. (Yohani 7:28, 29) Okhala wira Yesu aahaakhula mooluluwanya, awo yaaheererya onvara wira amurihele mukhatteya aahiiso omwiiva. Masi, khiyaawenrye maana okathi khiwaaphiyale wira Yesu iiviwe.

 Hata vari siiso, atthu anceene yaahimwaamini Yesu. Yesu aaheetta vasulu va maasi, omaaliha epheyo, aahaalyiha mwa mwiiriirya atthu ikonto sinceene orumeelaka ihopa ni iphaawu vakhaani, aahaavoniha aretta, alipa-oorakala, aahitthukula maitho a atthu yahoona, aahaapenuxa anamakuttula ni aahaahihimuxa atthu yaakhwiiye. Tthiri yaahikhalana mathowa wira akoheke so: “Vanrwawe Kristu, onimwira mitikiniho sulupalexa, ovikana iye sìralyawe Yes’ula?”​—Yohani 7:31.

Okathi aFarisi yaiwale aya muttitthi ohimyaka itthu iyo, awo ni mukhulupale a anamukuttho yaahaaruma maguarda orowa onvara Yesu.