Okathi Yesu aalya awe vatthokoni va aFarisi, yaahikhala atthu ikonto sinceene yaamulipelela vate, ntoko siisaale muttitthi wa oGalileya waamulipelela aya. (Marko 1:33; 2:2; 3:9) OYudeya, atthu anceene yaaphavela onweha ni onwiriyana yaahikhalana moonelo woovirikana ni aFarisi akina yaalya ni Yesu.

Etthu Yesu aapacenrye awe ohimya yaahikhalana yootaphulela yuulupale wa awiixutti awe. Owo aahimmye so: “Mwipasope ni miropo s’aFarisi, ori wototha”. Yesu ootoko waalopola awiixutti awe, masi etthu oonale awe okathi wa yoolya yaanittittimiherya otthuneya waya wiiwelela nlopolo nne. (Luka 12:1; Marko 8:15) Woonasa wene, aFarisi ale yeererya ovitha otakhala waya yooniheryaka wira yaari atthu oothunku. Masi eyo yaari yoowoopiha okhala wira yaamusuweliwa. Yesu aatthokihenrye so: “Khivo ekhuneliwe ehinrowa wupululiwa: khivo evithiwe ehinrowa osuweliwa”.​—Luka 12:2.

Woonasa wene, atthu ale yaamurukurenrye Yesu yaari a oYudeya ni khiyaamwiiwale iixuttihaka oGalileya. Nto aahitthikela olavula iponto suulupale seiyo aalavunle awe. Yesu aahaalopola atthu otheene yanwiriyana wira: “Muhiwoveké ale anìva erutthu, numalá ehinawerya-tho wira etthu”. (Luka 12:4) Ntoko aahimmye awe vahinatthi, Yesu aahaatumererya atthareli awe otthuneya waya ororomela wira Muluku aamwaakhapelela. Nave yaahaana omusuwela Mwaana a mutthu ni okupali wira Muluku aamwaakhaliheryaka.​—Matheyo 10:19, 20, 26-33; 12:31, 32.

Nuumala-vo, mulopwana mmosa aari muttitthi ole aahihimya etthu uupuwela awe, oriki: “Mwixuttihi, mmulèle munn’aka wira akikawele muhakhu ohiyeriwahu n’atithi”. (Luka 12:13) Nlamulo naahimya wira mwaana oopacerya oyariwa aahaana ovahiwa ipantte piili sa soohiyeriwa, nto khivaatthuneya onyakulihaniwa. (Otumererya 21:17) Woonasa wene, mulopwana ole aaphavela itthu sinceene ovikana iye aarowa awe ovahiwa. Mwa miruku, Yesu aahimwaakhula wira: “Mulopwana, t’ani okikhalinhe mphuki anyu, walá mulipa-òwokawelani muhakhu anyu?”​—Luka 12:14.

Nuumala-vo, Yesu aahaalopola oriki: “Nwiriyane sana. Mwipasope: muhikhalé atthu òwùnlela muhakhu, okhala wira ekumi ya mutthu thajiri khinlipana ni watta wa mihakhu sirinawe”. (Luka 12:15) Hata mutthu orina ene muhakhu munceene, owo pooti onimookhwa ohiye itthu sotheene orina awe. Yesu aahittittimiherya mwaha owo olavulaka nlikanyiho nooniherya otthuneya waya okhalana wataana wooloka ni Muluku.

Yesu aahimmye wira: “Ahikhala mulopwana mmosá thajiri aharere oruwerya. Owo ahikelela wupuwela so: ‘Nkirina nipuro n’osuka solya saka. Kìré sai?’ Numalá ahihimya wira: ‘Ayo! Kinrowa wira so: kapwanyule alumasiy’aka, kateke akina alupale. Kisukeke memmo solya saka ni muhakhu aka. Numalá kinohimerya murim’aka wira: Murim’aka, we wokhalana muhakhu munjene osukiwe, oniphiyerya iyakha sinjene. Vano omumuleke, olyeke, owuryeke, opuheke’. Vano Muluku ahimuhimerya wira: ‘We muloló! Ohiyu yola onimwakhiwa eroho [okumi] awo. Vano, itthu iye sisukalyawo sinrowa okhala sawani?’ Vanomukhumelela siso mutthu onìthukumanyerya mihakhu: ahinaphavela okhala thajiri vamaithoni va Muluku”.​—Luka 12:16-21.

Awiixutti a Yesu ni atthu ale yanwiriyana vaaniweryaneya omorela muraakho wa ophavela ni othukumanya muhakhu. Aahiiso mixankiho sa okumi pooti ovuvurya omurumeela Muluku. Tivonto, Yesu aatthikenle awe ohimya miruku  aalavunle awe eyaakha emosa nnimeya okathi aalavula awe Mwaha Vamwaako.

Yesu aahimmye so: “Muhukhuweké ni yolya emphavelelanyu olipana, nnákhala ni sowara simphavelelanyu erutthu anyu. . . . Nkaweheni anakhuku: khanàla walá khanihepha, kharina empa y’osuka yolya, nnákhala ntatha. Vano Muluku onnalyiha. Nto nyuwo muhavikana vanjene axinuni! . . . Nkawehani ithutu, enamuna sininnuwaya! Khasinvara muteko, nnákhala otthava. Vano miyo kinohimyeryani wira: nnákhala mwené Salomoni, eyulupale awe yothene, khanaware sorera ntoko emosá ya ithutu seiyo. . . . Tivó, muhavyeké entthunanyu olya n’uwurya, nnákhala muhùkhuweké. . . . Atith’inyu annisuwela wira munnihawela seiyo. Mpajeryeke ophavela Omwene wa Muluku: vano sikina sothene Muluku onimovahani ni wunjererya”.—Luka 12:22-31; Matheyo 6:25-33.

Tani onipacerya ophavela Omwene wa Muluku? Yesu aahihimya wira atthu vakhaani, niire so, “nikoto namukhani” na apinaatamu oororomeleya. Muhoolo mwaya naarowa wooniheriwa wira ari atthu 144.000 paahi. Awo arina nlipelelo xeeni? Yesu aahaalipiherya wira: “Atith’inyu ohasivela wovahani Omwene aya”. Awo khaniimananiha othukumanya mihakhu valaponi-va, vaava anawiiye aakhanle aya oowiiya. Masi, aniimananiha ni murima wotheene ‘withukumanyerya wirimu muhakhu ohinihononeya’, weiwo anrowa aya olamulelaka ni Kristu.​—Luka 12:32-34.