Mpantta onikhuma nsuwa wa Mwaako Olivera, ikiloomo 3 okhumaka oYerusalemu, waahikhala muttetthe wiitthaniwa Bethania. (Yohani 11:18) Yesu aahikela empa ya Martha ni Maria. Awo ni murokoraya iitthaniwa Laazaro yaari apatthani a Yesu ni yaahimwaakhela saana.

Nave yaanoona okhala eparakha omwaakhela Mesiya vatthokoni vaya. Okhala wira Martha aaphavela olokiherya yoolya wira onvahe Yesu, owo aahipacerya olokiherya itthu sinceene. Okathi aalokiherya awe, Maria aahimwaattamela Yesu onanwiriyana. Nto Martha aahimuleela Yesu wira: “Pwiya, khamunona wira munn’aka onikihiya mekhaka, keteteyaka ni miteko iya? Mmulèle wira akikhaliherye”.​—Luka 10:40.

Ohiya ompwapwela Maria, Yesu aahimuhimeerya Martha wira aanixankiheya ni itthu sinceene, oriki: “Martha! Martha! Nyuwo munnikhummwa murima, munnivelavela n’itthu sinjene. Vano etthu emosá pahi t’imphavelexiwa. Maria òthanla mpantte worerexa, ohinrowawe-tho wakhiwa”. (Luka 10:41, 42) Yesu aahittittimiherya wira khivaatthuneya oviriha okathi munceene olokiheryaka yoolya yinceene. Masi yoolya vakhaani yamphiyerya.

Martha aahikhalana moonelo wooloka. Owo aaphavela omwaakhela saana Yesu. Masi, okhala wira aahixankiheya ni olokiherya yoolya, eyo yaahimwiiriha opweteiwa eparakha ya wiixuttihiwa itthu sootthuneya ni Mwaana a Muluku! Yesu aahittittimiherya wira Maria aahipaka yoothanla yooloka. Yoothanla awe yammukhaliherya mahiku otheene. Nave hiyo ninniixutta etthu khula okathi nimmuupuwela ahu.

Okathi mukina, Yesu aahilavula mwaha woovirikana wira iixuttihe etthu emosaru. Vano awiixutti awe yaahimukoha wira: “Pwiya, munixuttihe olompa, ntoko Yohani siwixuttihalyawe awawe”. (Luka 11:1) Eyaakha emosa nnimeya yaavinre, Yesu iira owiixuttinhe ene Mwaha Aalavunle awe Vamwaako. (Matheyo 6:9-13) Waaniheryasa, mwiixutti ola khaakhanle okathi Yesu iixuttiha awe moota woovekela. Tivonto Yesu aahitthikela olavula iponto suulupale sa nivekelo nne. Nuumala-vo, Yesu aahilavula nlikanyiho naattittimiherya otthuneya waya othipelela ovekela.

Yesu aahimmye so: “Mutthu mmosá a nyuwo, akhalana mpatthani awe, arowá omphwanya ohiyu eríyari, ahimyaka wira: ‘Mpatthani, mukòlihe iphau ttharú. Orwiye mpatthani aka, ori ni mukwah’awe: nkirina etthu y’onvaha’. Vano ole ori mpani amwakhula wira: ‘Muhikùkhulé: mukhora wowaliwa, miyo kihimmathi, nave àn’aka anorupasa. Nkinwerya ovenya wovahani’. Miyo kinohimeryani wira: ahinavinyerye onvaha mwaha w’okhala mpatthani awe, onovenya mano mulattu w’othipelela wawe, ononvaha sothene simphavelawe”.​—Luka 11:5-8.

Yesu khaaphavela ohimya wira Yehova khoniphavela waakhula mavekelo ahu ntoko mpatthani ole. Masi aahooniherya wira mpatthani ole aahimwaakhula mpatthani awe mwaha woothipelela. Mwa enamuna emosaru, Tiithi ihu oophenta a wiirimu onnaakhula mavekelo arumeyi awe oororomeleya anipaka aya ni murima wotheene! Yesu aahivikaniha oriki: “Vano miyo kinohimeryani wira: Nvekeleke: munovahiwa. Mwavyeke: munophwanya. Mmané mukhora: munohuleliwa. Tthiri, othene ale anvekela, annivahiwa; ale anavya, anniphwanya; ale animana mukhora, annihuleliwa”.​—Luka 11:9, 10.

Nuumala-vo, Yesu aahipaka nlikanyiho na tiithi, oriki: “T’ani a nyuwo, onìra mwan’awe anvekelaka ehopa, ananvaha enowa? Walá anvekelaka noje, khunvaha eyalala? Munamwi muri nyuwo, muri òtakhala murima, munasuwela wavaha àn’inyu itthu sorera, Atith’inyu ari wirimu anotepa wavaha eroho [munepa] yowarya ale anavekela”. (Luka 11:11-13) Tthiri ela enninikupaliha wira Tiithi ihu onniphavela owiriyana ni waakhula mavekelo ahu!