Nlelo Yesu iira ori ene oYerusalemu Niira na Maxaxa, nave aaniwiixuttiha atthu ikeekhai suulupale. AYuda akina yaari niira nne yaahimuleela Yesu wira: “Hiyo nri a nloko n’Abrahamu: khinnakhale ipottha sa mutthu”. Yesu aahiwaakhula wira: “Miyo kosuwela wira mw’à nloko n’Abrahamu. Nto nyuwo khamunakhelela molumo aka: hatá khíyaphavela okìva. Miyo kinnihimya itthu sònalyaka w’Atithi: nave nyuwo munnìra itthu mwiwalyanyu wa tith’inyu”.—Yohani 8:33, 37, 38.

Masu ale yaari ookhweya wiiwa, maana Tiithi awe toovirikana ni tiithi aya. Okhala wira aYuda khiyiiwexenxe ele Yesu aahimya awe, awo yaahimuleela wira: “Tith’ihu t’Abrahamu!” (Yohani 8:39; Yesaya 41:8) Mwekeekhai aYuda ale yaari a nloko na Abrahamu. Tivonto, yoona wira yaahikhalana waamini ntoko Abrahamu mpatthani a Muluku.

Masi Yesu aahiwaakhula mwa enamuna yaatikininhe, oriki: “Mwàri àna Àbrahamu, nanso mwireke sìralyawe Abraham’uwo”. Tthiri mwaana eekeekhai onnimutakiha tiithi awe. Nto Yesu aahivikaniha oriki: “Nyuwo mumphavela okìva miyo kòhimenryeni ekekhai emwiwalyaka Muluku. Abrahamu khìrale etthu ila”. Yesu aahilavula etthu yaanyoonyale oriki: “Nyuwo munnivara miteko sa tith’inyu”.​—Yohani 8:39-41.

Nlelo aYuda ale khiyaamusuwela ole Yesu aamuhimya awe. Awo yaathipelela ohimya wira yaari anamwane eekeekhai, ariki: “Hiyo khanihiyó àna òrarùwa. Hiyo nrina tith’ihu mmosá pahi: Muluku!” Niireke tthiri Muluku aari Tiithi aya? Yesu aawaakhunle wira: “Tith’inyu àri Muluku, nyuwo mwamukiphenta, okhala wira vekekhai kikhumme wa Muluku, kihorwa. Miyo nkilakelenle orwa: Atithi t’akirumme”. Nto vano, Yesu aahipaka nikoho aakhunle awe mmansawe, iiraka: “Muhinìwela-ni sinihimyaka? Mana muhojela owiriyana molumo aka”.​—Yohani 8:41-43.

Yesu aaheererya owooniherya ele yaarowa waakhumelela mwaha woomukhootta. Owo aahaaleela mooluluwanya wira: “Nyuwo, tith’inyu ti Satana: nyuwo munnitthuna wira sintthunawe tith’iny’uwo”. Mukhalelo xeeni orina awe tiithi aya? Yesu aahihimya mukhalelo wa tiithi aya oriki: “Owo ti mulipa-òwiva okhuma wopajeryani. Owo khanakhale n’ikekhai, okhala wira mwa yowo khivo ekekhai”. Nave aahincererya wira: “Ole onkhuma wa Muluku, onniwiriyana sinihimyawe Muluku. Vano nyuwo khamunkhuma wa Muluku: tivó muhinwiriyananyu sinihimyawe Muluku”.​—Yohani 8:44, 47.

Masu a Yesu yaahiwiiriha aYuda onanariwa vanceene, anamwaakhula wira: “Hiyo khannotha nahimyaka wira mwá muSamariyá ni wira muri ni nlaikha na Satana!” Mwaha woomuhimya Yesu okhala “muSamariyá”, awo yammunyohola. Yesu khaacalenle, masi aahiwaakhula wira: “Miyo nkina nlaikha na Satana! Miyo kinattittimiha Atithi: nto nyuwo munnikhotta okittittimiha”. Omukhootta waya Yesu waari mwaha muulupale, nto Yesu aahaaleela wira: “Ale anettela molumo aka, khankhwa-tho”. Eyo khentaphulela wira arummwa ni atthu akina yaamutthara khiyaarowa okhwa. Masi, awo khiyaarowa opwetexiwa moomalela, niire so, ‘okhwa wanenli’, okhwa voohikhalana nlipelelo na ohihimuxiwa.​—Yohani 8:48-51; Wisupulula 21:8.

Masi aYuda ale khiyiiwexenxe saana moolumo a Yesu, tivo yaahimmye aya wira: “Vano nosuwelexa wira muri ni nlaikha na Satana. Abrahamu ohòkhwa, maprofeta àkhwasa-tho. Vano nyuwo munihimya sai wira: ‘Ale anettela molumo aka, khankhwa-tho’? Tith’ihu Abrahamu ohòkhwa: nyuwo munìkhaliha mulupale onvikana yowo? . . . Nyuwo munìsira tani?”​—Yohani 8:52, 53.

Ekeekhai wira Yesu aahiihimya okhala Mesiya. Masi ohiya owaakhula mooluluwanya, owo aahimmye wira: “Miyo kaìvuwihaka mmansaka,  ovuwa waka nno khuhiy’etthu. Atithi t’ankivuwiha, yawo munahimyanyu wira Muluku anyu. Nto nyuwo khamunimusuwela: ti miyo kinimusuwelaka. Kahimyá wira nkinimusuwela, kamukhala nawothe ntoko nyuwo”.​—Yohani 8:54, 55.

Vano Yesu aahitthikela olavula nlikanyiho na muhavinre aya oowaamini, oriki: ‘Abrahamu, tith’inyu, ahitteliwa murima aroromelaka wona nihiku naka: ohòna tthiri, khusareya otteliwa murima’. Tthiri Abrahamu aanaamini yooleiherya ya Muluku, nto aanilipelela orwa wa Mesiya. Nuumala-vo, aYuda yaahimukoha wira: “Nyuwo nlelo khamunatthi ophiya iyakha miloko mithanú [50]: mmonne sai Abrahamu?” Yesu aahiwaakhula wira: “Kinolèlani ekhweli wira: Abrahamu ahinatthi okhala, miyo t’ule onkhala”. Yesu aahimya okathi yoole aari awe wiirimu ntoko nlaikha noowerya.​—Yohani 8:56-58.

AYuda ale, yaahinanariwa vanceene mwaha wa Yesu ohimya wira aahikhala ahinatthi Abrahamu. Nto yaahiphavela onvonyakasa maluku. Masi Yesu aahikhuma ohivulalihiwe.