Nuumala ohihimuxiwa, Yesu aahipaka mareheryo wira okumane ni arummwa awe 11 omwaako wa oGalileya. Nave yaahikhala awiixutti 500, akina a yaawo ti yaale yaahaakupali wira Yesu aahihihimuxiwa. (Matheyo 28:17; 1 aKorinto 15:6) Masi etthu Yesu aahimmye awe yaahaakhaliherya okupali wira Yesu mukumi.

Yesu aahaatthokiherya wira Muluku onvaha okhulupale wiirimu ni valaponi. Tivonto aarumme awe wira: “Murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni” na munepa wootteela. “Mwawixuttiheke wettela sothene sòrumalyakani”. (Matheyo 28:18-20) Tthiri, nuumala Yesu ohihimuxiwa, nlelo aaniphavela wira ihapari sooreera silaleiwe.

Atthareli otheene a Yesu, alopwana, athiyana ni anamwane aavahiwa yooruma emosaru ya waapaka awiixutti. Nnaamwi awanani ahu aphavelaka onikhoottiherya olaleya ni wiixuttiha, Yesu oonilipiherya wira: “Kovahiwa owerya wothene wirimu ni vathí”. Eyo yaataphulela exeeni? Yesu aahaaleela wira: “Vano miyo kinokhala ni nyuwo mahiku othene, mpakha elapo omala”. Yesu khaaphavela ohimya wira, atthu otheene yaarowa olaleyaka ihapari sooreera yampakaka miiriirya. Masi, yanvikaniha okhaliheriwa ni munepa wootteela.

Nuumala ohihimuxiwa, Yesu aahaakhumelela awiixutti awe “mpakha ovira mahiku miloko mixexé [40]”. Ikwaha sinceene Yesu aahiwara erutthu ya opinaatamu wira ‘àthonyerye n’inamuna sinjene wira yowo àri mukumi’. Nave aahiwiixuttiha “s’Omwene wa Muluku”.​—Miteko 1:3; 1 aKorinto 15:7.

Woonasa wene, nlelo arummwa ari ene oGalileya, Yesu aahaaleela otthikela oYerusalemu. Nuumala Yesu waaphwanya oYerusalemu, aahaaleela wira: “Muhikhumé oYerusalemu, nto mmulipeleleke wenno ole Atithi amuhimyalyaya, yowo mukìwalyanyu kihimyaka wira onimorwa. Tthiri Yohani obatinze ni màsi: nto nyuwo, yavirá mahiku vakhani munobatiziwa” ni munepa wootteela.​—Miteko 1:4, 5.

Muhoolo mwaya, Yesu aahikumana-tho ni arummwa awe. Nto, Yesu “aharowana awixutti awe mpakha okherekhere w’oBethania”, mpantta onikhuma nsuwa wa Mwaako Olivera. (Luka 24:50) Hata Yesu aalenle itthu sinceene voohimya sa orowa wawe wiirimu, nlelo awo yuupuwela wira Omwene wa Muluku, waarowa okhala valaponi vaava.​—Luka 22:16, 18, 30; Yohani 14:2, 3.

Arummwa yaahimukoha Yesu wira: “Pwiya, ti yola okathi onrowanyu otthikiherya omwene wa Isarayeli?” Yesu aawaakhunle wira: “Khayí yawinyu osuwela okathi walá mahiku Atithi athanlalyaya votthuna waya”. Nto, ottittimiheryaka muteko yaarowa aya ovara, Yesu aahimmye wira: “Nyuwo munimwakhela ikuru” sa munepa wootteela sinrowa “wokhuruwelani; siso munrowa okhala anamon’aka oYerusalemu ni oYudeya wothene ni oSamariya, mpakha omalenle elapo”.​—Miteko 1:6-8.

Arummwa yaari Omwaako Olivera, vaavo Yesu aarowa awe wiirimu. Moohipisa meeku ooriipa yaahimukhuneela. Muupuweleke wira, Yesu aahiwara erutthu ya opinaatamu, nuumala ohihimuxiwa. Nto okathi ole, Yesu aahihiya erutthu ele onarowa wiirimu ntoko nlaikha. (1 aKorinto 15:44, 50; 1 Pedru 3:18) Vaavo arummwa oororomeleya yanweha aya Yesu orowaka, yahaakhumelela “atthu anli, yawanre ikuwo sottela”. Vano malaikha ale yaawanre irutthu sa opinaatamu, yaahaakoha wira: “Nyuwo alopwana òGalileya! Muhalenle-ni nwehaka osulu? Yes’ule okumihiwe variyari vanyu khuwelihiwa wirimu, onimorwa-tho sisale simonalyanyu awelaka weiwo”.​—Miteko 1:10, 11.

Yesu aahikhuma valaponi ohooniwaka ni atthu anceene. Masi paahi atthareli awe oororomeleya ti yanwenhe orowaka. Yesu onrowa  otthika “sisale”, eyo piiyo, ohooniwaka ni atthu otheene. Masi atthareli awe oororomeleya tanrowa osuwela wira oopacerya olamulela Moomweneni.

Nto arummwa yaahitthikela oYerusalemu. Mahiku yaattharelana, yaahithukumana ni awiixutti akina omuhela muhina “Maria, ame awe Yesu, n’axinn’awe Yes’uwo”. (Miteko 1:14) Atthu awo yaanivikaniha ovekela. Maana yaaphavela omuthanla mwiixutti mmosa aarowa omuranttela Yuda Isikaryoti, wira arummwa akhale 12. (Matheyo 19:28) Nto yaahimwaavya mwiixutti aawenhe miteko ni ohihimuxiwa wa Yesu. Ela ekwaha yookiserya Biibiliya onihimya awe sa waaveryerya wira asuwele yootthuna ya Muluku. (Esalimo 109:8; Miruku 16:33) Mathiya, yoowo aari mmosa a awiixutti 70 yaarummwale ni Yesu, taathanliwe “khukelihiwa munlokoni n’arummwa mulokó ni mmosá [11]”.​—Miteko 1:26.

Nuuvira mahiku 10 Yesu oronwe ene wiirimu, naahiphiya nihiku na Niira na Pentekoositi a 33 EC a aYuda. Nto awiixutti 120 yaahithukumana esaala ya vasulu oYerusalemu. Naananoru, wahiiwanyeya oruma okhumaka wiirimu waasanre mpaani motheene. Malumi a mooro yaahooniwa ari ene vamuru va khula mmosa. Vano awiixutti otheene yaahipacerya olavula mattaava oovirikana. Tthiri, eyo yooniherya wira Yesu aahaavaha munepa wootteela aaleihenrye awe!​—Yohani 14:26.