Moohipisa nuumala obatiziwa, ni ohinatthi muteko awe woolaleerya, Yesu aaheehereriwa ni nwanani aaphavela ohonona waamini wawe. Ikwaha sinceene, Diabo aahimweehererya Yesu. Muhoolo mwaya, Yesu aahimuhimya nwanani owo oriki: “Mulupale òlumwenk’ula ohanle orwa. Nto owo kharina etthu ni miyo”.​—Yohani 14:30.

Murummwa Yohani aahoonihiwa vahinatthi “enow’eyo yulupalexa t’inowa yele ya khalai, enìhaniwa Nwanani walá Satana”. Nwanani ola ootakhala a apinaatamu, aamoomoliwa wiirimu “ananariwene vanjene, okhala wira òsuwela wira orina okathi vakhani pahi”. (Wisupulula 12:9, 12) MaKristau aakhalana mathowa ooloka anaakupaliha wira ankhala “okathi vakhani” ni moohipisa ‘enowa yulupalexa’, enrowa oriheliwa moowiixani iyaakha 1.000 sa olamulelo wa Kristu Moomweneni mwa Muluku.​—Wisupulula 20:1, 2.

Exeeni yaarowa wiiraneyaka valaponi, okathi owo vakhaani? Atthu yaarowa okhalaka ni makhalelo xeeni? Yesu aahaakhula makoho ala. Nlikanyiho aapanke awe na ipwittipwitthi ni ipuri, Yesu aahooniherya ele yaarowa owiiraneela anaxariya yaawo anlikana ni ipwittipwitthi ni anaakhaliherya annawe Yesu. Nave Yesu aahihimya ele yaarowa owiiraneela atthu animulupattha Yesu, yaawo anlikanyihiwa ni ipuri, oriki: “Ala [ipuri] animomoleliwa wohawani wohimala: vano, anaxariya [ipwittipwitthi] anorowa wekumini ehinimala”.​—Matheyo 25:46.

Eyo enninikhaliherya wiiwexexa moolumo Yesu aamulenle awe nakrime aakhomeliwe nihiku nne. Yesu khanvahale nlipelelo nimosaru aavanha awe arummwa awe oororomeleya, yaawo aaleihenrye awe wiirela mpantta Omwene wa wiirimu. Ohiya-vo, Yesu aahimuleiherya  nakrime ole aattharunwe wira: “Tthiri olelo kinoohimeeryani ekhweeli wira: munrowa okhala ni miyo mParayiisu”. (Luka 23:43, Tradução do Novo Mundo) Tivonto, mulopwana ole aaleiheriwe okhala mParayiisu valaponi, eyo piiyo, ejardim yooreera aahiiso eparkhi. Tthiri atthu yaale olelo-va anlikana ni ipwittipwitthi, “anorowa wekumini ehinimala”, niire so, mParayiisu valaponi.

Eyo ennivarihana ni masu a murummwa Yohani, yoowo aahimmye makhalelo anrowa okhala valaponi, oriki: “Emp’ela, empa ya Muluku variyari v’atthu. Muluku onokhala ni yawo: awo anrowa okhala atthu awe. Muluku onrowa okhalaka ‘Muluku vamosá ni yawo’. Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.​—Wisupulula 21:3, 4.

Wira nakrime ole ophwanye eParayiisu, ohaana ohihimuxiwa mwa alipa-ookhwa. Nave anookhala atthu akina anrowa ohihimuxiwa. Maana Yesu aahimmye wira: “Onophiya okathi onìraya atthu othene ari mmahiye, yiwe nsu na Mwana a mutthu, ekhume mmahiye: ale avanre miteko sorera anohihimuwa, ephwanyé ekumi; vano ale avanre miteko sonanara anohihimuwa, ephwanyé” olamuliwa.​—Yohani 5:28, 29.

Ankhi arummwa oororomeleya ni atthu akina vakhaani anrowa okhalaka ni Yesu wiirimu? Biibiliya onaakhula so: “Awo anrowa okhala anamukuttho a Muluku ni a Kristu, anokhalihiwa mamwene mpakha iyakha iye ekonto emosá [1.000]”. (Wisupulula 20:6) Atthu awo anrowa olamulelaka ni Kristu, anrowa okhala alopwana ni athiyana athanliwe valaponi. Tivonto, anrowa okhala atthu oomoriwa ikharari ni anrowa owoonelaka othunku atthu anrowa aya waalamulelaka valaponi.​—Wisupulula 5:10.

Yesu onrowa orumeela mukuttho awe wowoopola wira aareelihe atthu valaponi ni omaliha ohaawa okumiheriwe mwaha wa etampi. Yesu ni anamalamulela akhwaawe, anrowa waakhaliherya apinaatamu okhala oomalela. Nto, apinaatamu anrowa opuhaka okumi Muluku aalakenle awe okathi aamulenle awe Adamu ni Eva wira, ayaraneke ni asareye valaponi. Okhwa ni etampi ekumiheriwe ni Adamu khenrowa okhala-tho!

Nto, Yesu onrowa omaliha muteko ovekeliwa awe ni Yehova. Nuumala Eyaakha Ekonto Emosa ya Olamulelo awe, Yesu onrowa onvahererya Tiithi awe Omwene ni apinaatamu oomalela. Olavulaka sa wiiyeviha nno wuulupale wa Yesu, murummwa Paulo olempe so: “Nave itthu sothene samwìwelelakaru Kristu, vano Kristu yowo, Mwana a Muluku, onomurumela Tithi awe, onvaherenrye sothene. Siso Muluku onomaliherya oruma sothene”.​—1 aKorinto 15:28.

Mwekeekhai, Yesu ookhalana muritti muulupale wira omaliherye yootthuna ya Muluku. Vaavo yootthuna eyo enrowa aya wiiraneyaka mahiku otheene, Yesu onrowa okhalaka moovarihana ni masu awe oowi: “Miyo k’ephiró. Miyo k’ekekhayí. Miyo k’ekumí”.​—Yohani 14:6.