Ori ene oYerusalemu, okathi wa Paasikha a 30 EC, Yesu aahipaka itthu sootikiniha aahiiso miiriirya. Nto atthu anceene yaahimwaamini. Nikodemo, aari nFarisi iirela mpantta nikhuuru na makhulupale a eSineedrio ya aYuda. Otikinihiwe ene, aahimuxukurya Yesu ohiyu, maana aanoova wooniwa ni ahooleli a aYuda akina, okhala wira eyo yanwiiriha omunyokha.

Nikodemo aahimmye so: “Pwiya! Hiyo nosuwela wira mwá mwixuttihi okhumme wa Muluku. Tthiri khavo onwerya wira mitikiniho sinìranyu, Muluku ahikhanle ni yowo”. Omwaakhulaka Nikodemo, Yesu aahimmye so: wira mutthu okele Momweneni mwa Muluku, ohaana ‘oyariwa-tho vasyá’.​—Yohani 3:2, 3.

Ophavelaka osuwela akhala wira vaaniweryaneya mutthu oyariwa-tho vasya, Nikodemo aahimukoha Yesu wira: “Onowerya ohokolowela mmirimani mw’ame awe, n’oyariwa-tho vasyá?”​—Yohani 3:4.

Nnaari. Oyariwa-tho vasya khonitaphulela otthikela mmirimani mwa amamawe. Yesu aahimutthokiherya wira: “Khavo onwerya okela Momweneni mwa Muluku, ahiyariwe ni màsi” ni munepa. (Yohani 3:5) Vaavo Yesu aabatiziwa awe, munepa wootteela waahimukhuruwela. Nto okathi ole, Yesu ‘ahiyariwa ni màsi’ ni munepa. Nave, naahiiwanyeya nsu naakhuma wiirimu nihimyaka wira: “Ola Mwan’aka onimphentexaka: miyo kosiveliwa ni yowo”. (Matheyo 3:16, 17) Tivonto, Muluku aahimuhimya Yesu okhala mwanawe oomunepani ni aahinvaha eparakha ya okela moMweneni mwa wiirimu. Muhoolo mwaya, atthu otheene yaabatiziwe Pentekoositi a 33 EC, yaahaakhela munepa wootteela, khuyariwa-tho vasya ntoko anamwane oomunepani a Muluku.​—Miteko 2:1-4.

Vaaninvila Nikodemo wiiwexexa mwiixuttiho wa Yesu voohimya sa Omwene. Tivonto, Yesu aahimuleela itthu sikina sa muteko awe wa vameekhaaya ovahiwa awe ni Tiithi awe. Nto Yesu aahimuleela wira: “Ntoko Moise vathomeiyawe enowa ya yuma mothakoni, siso-tho Mwana a mutthu ohana othomeiwa, wira othene ale animwamini, ekhalane mwa yowo ekumi ehinimala”.​—Yohani 3:14, 15.

Khalai, aIsarayeli yaale yaalummwa inowa sootakhala, yaahaana oweha enowa ya yuuma ya eboronze wira yoopowe. (Mothakoni 21:9) Moolikanasa, apinaatamu otheene ahaana omwaamini Mwaana a Muluku wira yoopoliwe itampi saya, ni ophwanya okumi woohimala. Ottittimiheryaka niphento na Yehova, Yesu aahimuleela Nikodemo wira: “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. (Yohani 3:16) Tivonto, myeeri 6 saavinre okhuma vaavale aapacenrye awe olaleerya oYerusalemu, Yesu aahooniherya wira yena tori moopoli aapinaatamu.

Yesu aahimuleela Nikodemo wira: “Muluku khamurumme Mwan’awe mulaponi wira àhukhumu atthu”. Eyo enitaphulela wira Yesu khaarwiiye waaphukela apinaatamu otheene wira apwetexiwe. Masi Yesu aahihimya wira ‘arummwale wira atthu yopoliwe ni yowo’.​—Yohani 3:17.

Okhala wira Nikodemo aanoova vanceene, aahirowa okumana ni Yesu ohiyu. Vano, iihimyaka mmensawe Yesu aahimaliha ovaanela wawe  ni Nikodemo oriki: “Mulattu w’ohukhummwa t’ula: warya [eyo piiyo, okumi ni mwiixuttiho wa Yesu] ohòrwa mulaponi, vano atthu yahikhotta warya, khíyatthara epiphi, okhala wira miteko saya sari sonanara. Tthiri othene ale anìra sonanara, anninyokha warya, khuhinattamela warya iwo, wira miteko saya sihòneye. Nto ale anettela ekekhai, annattamela warya, wira miteko saya sòneye, okhala wira sìriwe ntoko Muluku sintthunawe”.​—Yohani 3:19-21.

Vano, Nikodemo yoowo aari nFarisi ni mwiixuttihi a Isarayeli, aahaana wuupuwelela oratteene itthu sotheene iixuttihiwa awe ni Yesu voohimya sa yoolakela ya Muluku.