Nlelo Yesu aari oSamariya aahiiso oGalileya. AFarisi yaahimukoha Yesu moota Omwene waarowa aya orwa, maana yuupuwela wira waarowa orwa mowooneya. Nto Yesu aahiwaakhula wira: “Omwene wa Muluku khunrwa woneyaka. Khavo onrowa ohimya wira: ‘Ola va!’ walá: ‘Ole vale!’, okhala wira Omwene wa Muluku ori variyari vanyu”.​—Luka 17:20, 21.

Atthu akina yuupuwela wira Yesu aahimya wira Omwene waari vamurimani va arumeyi a Muluku. Masi Yesu khaaphavela ohimya yeeyo, okhala wira Omwene khiwaakhanle vamurimani va aFarisi yaawo Yesu aalavulana awe. Tthiri omwene waari eriyari aya, okhala wira ole othanliwe wira okhale Mwene a Omwene wa Muluku, eyo piiyo, Yesu, aari eriyari aya.​—Matheyo 21:5.

Nuumala aFarisi okhuma, Yesu aahaaleela awiixutti awe itthu sikina voohimya sa orwa wa Omwene. Olavulaka sa okathi wa okhala-vo wawe ntoko Mwene, Yesu aahaalopola wira: “Onophiya okathi onìranyu mphaveleke omona Mwana a mutthu mano okathi vakhani pahi, mojele omona”. (Luka 17:22) Yesu aahooniherya wira olamulela wa Mwaana a mutthu waarowa wiiraneya muhoolo. Ohinatthi ophiya okathi owo, woonasa wene, awiixutti akina yaarowa ophavelaka onweha. Masi awo yaahaana ovikaniha owehererya okathi Muluku aathanlale awe wira Mwaana a mutthu orwe.

Yesu aahivikaniha oriki: “Mwalèliwa wira: ‘Ole vale!’, walá: ‘Ola va!’, muhirowé-wo, muhitthimakelé-wo. Okhala wira Mwana a mutthu nihiku ninrwawe onotutuxerya, ntoko ontutuxeryaya overunya, wàryaka erimu yothene okhuma mpantte mukina mpakha mukina”. (Luka 17:23, 24) Exeeni yaarowa waakhaliherya awiixutti a Yesu ohiwokiwa ni mamesiya oowootha? Yesu aahimmye wira orwa wa Mesiya eekeekhai waarowa wooniwa opuro wotheene. Ethoonyeryo ya okhala-vo ni owerya wa Omwene, waarowa wooniwa ni atthu yaavaha ephoole iprofesia sa Biibiliya.

Nuumala-vo, Yesu aahilavula itthu siiraneyale khalai wira ooniherye mukhalelo atthu yaarowa aya okhalana wanikisa wa olumwenku ola oriki: “Ntoko sìraneiyaya mahiku a Nowé, siso sinimwiraneya-tho okathi onrwawe Mwana a mutthu . . . Vanimwiraneya-tho ntoko viraneiyaya mahiku a Lothi: atthu yanilya, yaniwurya, yanithuma, yanitumiha, yanàla, yaniteka ipa saya. Vano, nihiku Lothi navenyalyawe oSodoma, Muluku ahimoriha osulu malumi ni maluku a moro, khwapwetexa atthu ale othene. Siso, vanimwiraneya nihiku Mwana a mutthu ontthunawe wisoniherya”.​—Luka 17:26-30.

Yesu khaaphavela ohimya wira atthu a mahiku a Nowe aahiiso a Lothi, yaahipwetexiwa mwaha woovara miteko ntoko: waala, olya, owurya, othuma, otumiha, ni oteka ipa. Maana Nowe ni Lothi ni imusi saya yaanivara miteko iyo. Masi moovirikana ni Nowe ni Lothi, atthu akina okathi ole yaanivara miteko iyo ahivahaka  ephoole yootthuna ya Muluku ni itthu siiraneya. Nto Yesu aahaatumererya awiixutti awe ovaha ephoole ni oluttuweliwa opaka yootthuna ya Muluku. Owo aahiwooniherya moota yaarowa aya woopoliwa, niire so, ovikaniha okhala akumi vaavo Muluku aarowa awe waapwetexa atthu muhoolo mwaya.

Awiixutti yaahaana ovaha ephoole wira ahihapuxiwe ni “itthu sirinaya” sa olumwenku. Yesu aahimmye wira: “Nihiku nenlo, ale ari vaté ehikelé mpani okuxa itthu sirinaya memmo; siso-tho, ale ari omatta, ehihokolowelé owani. Mmupuwele mwar’awe Lothi”. (Luka 17:31, 32) Mwaara a Lothi aahithatuwa nripu na maakha.

Yesu aahivikaniha olavula itthu saarowa wiiraneya vaavo Mwaana a mutthu aarowa awe okhala Mwene, oriki: “Ohiyu yowo, yakhalá atthu anli erupaka nipuro nimosá, mukina onokuxiwa, mukina ahiwe”. (Luka 17:34) Eyo enithoonyerya wira, atthu akina yaarowa woopowa, masi akina yaarowa opwetexiwa.

Awiixutti yaahimukoha wira: “Pwiya, itthu iya sinrowa wiraneya vai?” Yesu aahiwaakhula wira: “Vakhwenle enama, anakhuku anthukumana vavo”. (Luka 17:37) Tthiri awiixutti a Yesu yaarowa okhala ntoko axawawe aniwerya oweha ari ene ottaiwene. Awiixutti yaarowa omutthara Kristu eekeekhai, Mwaana a mutthu. Yesu aahihimya wira muhoolo aamwaavaha awiixutti awe ekeekhai enoopola okumi wa atthu anaamini.