Nlelo Yesu khaaphiyale oYerusalemu, woonasa wene aari ni awiixutti awe etthoko ya Zakeyo. Awo yoona wira “Omwene wa Muluku” waahanle vakhaani otikitheriwa ni Yesu okhalihiwa Mwene. (Luka 19:11) Awiixutti a Yesu khiyiiwexenxe mwaha ole, ntoko siisaale yahiiwexenxe aya wira Yesu aahaana wiiviwa. Tivonto, Yesu aahipaka nlikanyiho wira aakhaliherye atthu ale, woona wira Omwene waarowa orwa muhoolo.

Yesu aahimmye so: “Mulopwana mmosá, ètthoko yosuwanyeya, ahivenya arowaka elapo y’ottaiwene, wira aheliwe omwene, numalá ahokoloweke”. (Luka 19:12) Owo waari mukwaha woorakama. Tthiri, Yesu tori “Mulopwana mmosá, ètthoko yosuwanyeya”, yoowo aaronwe “elapo y’ottaiwene”, eyo piiyo, wiirimu, wira avahiwe owerya wa omwene ni Tiithi awe.

Yesu aahilavula wira ohinatthi okhuma “mulopwana [ole] mmosá, ètthoko yosuwanyeya”, aahiwiihana arumeyi awe wira aavahe musurukhu wa miina ya eparatha, aaleela wira: “Nvareleke muteko musurukh’ula, murelanyihe, mpakha miyo ohokolowa”. (Luka 19:13) Miina mamosa a eparatha waari musurukhu wa maluku wa eparatha. Wira mulimi aakhele musurukhu ole, aahaana ovara muteko myeeri miraru.

Awiixutti yaahisuwela wira yaalikana ni arumeyi ale a nlikanyiho na Yesu, maana Yesu aahaalikanyiha ni anamuteko anihepha. (Matheyo 9:35-38) Tthiri, khahiyo wira Yesu aavekenle orowa omatta wira yahephe ipyo. Masi Yesu aahaaleela wira yaahaana waaphavela awiixutti akina wira yiirele mpantta Omwene wa Muluku. Tivo, awiixutti yaahaana wiimananiha wira yaaphwanye atthu anceene wira akele Momweneni.

Itthu xeeni sikina Yesu oonihenrye awe nlikanyiho nawe? Yesu aahimmye wira atthu a elapo awe “yanimunyokha, [atthu oosuwanyeya] khwaruma anamuhupi ottuli wawe ohimya wira: ‘Khanimmutthuna ola okhala mwené ahu’”. (Luka 19:14) Awiixutti ale yaahisuwela wira aYuda khiyaamwaakhenle saana Yesu, nave akina a yaawo yaaniphavela omwiiva. Nuumala Yesu okhwa ni ohihimuxiwa wira orowe wiirimu, aYuda yaanaalupattha awiixutti awe yooniheryaka wira khiyamphavela Yesu. Tthiri awo yaahooniherya wira khiyamphavela Yesu okhala Mwene aya.​—Yohani 19:15, 16; Miteko 4:13-18; 5:40.

Arumeyi ale 10, yaarumenle sai musurukhu ole wa “mulopwana mmosá, ètthoko yosuwanyeya” mpakha owo ovahiwa “omwene, numalá ahokoloweke”? Yesu aahimmye wira: “Vaheliwawe omwene, ahihokolowela elapo awe. Nuphiyá, ahiwihaniha arumeyi awe awo yàvaherenryawe musurukhu, wira asuwele musurukhu warelanyihalyawe khula mmosá. Òpajerya ahirwa, khumuhimerya pwiy’awe wira: ‘Pwiya! Musurukhu anyu ohinjerereya mpakha mulokó’. Mwené ahimuhimerya wira: ‘Varera, murumeyi òroromeleya! Okhala wira nyuwo munniroromeleya n’itthu vakhani, mwakhele owerya wo wettiha mittetthe mulokó’. Anenli ahirwa, khwira: ‘Pwiya! Musurukhu anyu ohinjerereya mpakha mithanú’. Mwené ahimuhimerya wira: ‘Nyuwo-tho mwakhele owerya wo wettiha mittetthe mithanu’”.​—Luka 19:15-19.

Akhala wira awiixutti yaamoona wira yaaniimananiha ntoko ipottha iye vaavo yaapaka aya awiixutti akina, yaahaana okupali wira Yesu aamusiveliwa ni waareeliha. Tthiri ale oororomeleya anrowa otthuveliwa mwaha wa wiimananiha waya. Masi awiixutti a Yesu aavirikana mikhalelo, maana iparakha ni itthu aniwerya aya opaka ti soovirikana. Okhala wira Yesu aarowa oheliwa “omwene”, aamusuwela ni waareeliha atthareli awe mwaha wa wiimananiha waya waapaka awiixutti.​—Matheyo 28:19, 20.

Moone wira Yesu aahimaliha nlikanyiho nawe ohimyaka ovirikana wa makhalelo a arumeyi ale, oriki: “Ahirwa-tho [murumeyi] mukina, khwira: ‘Pwiya! Musurukhu anyu t’ula: kisunke vanttapwattani. Kàmova, okhala wira  mwá mutthu òwali: munnikuxa itthu sihisunkyanyu, munnihepha vahànlyanyu’. Owo ahimwirela: ‘Nyuwo, murumeyi òtakhala! Kinolamulani ni molumo anyu yala. Mwahisuwela wira miyo ka mutthu òwali, kinkuxa kihisunkyaka, kinihepha vahànlyaka. Vano mwahakophiherya-ni musurukhu aka atthu yawerya orelanyiha? Vahokolowaka, kanwerya okuxa vowunjerereya’. Numalá aharuma atthu yari vavo wira: ‘Mmwakhe musurukh’uwo, munvahe ole orina mulokó’”.​—Luka 19:20-24.

Okhala wira epottha ele yaahinyoonyiwa wuncererya muhakhu wa omwene wa pwiya awe, owo aahaakhiwa musurukhu aavahiwe awe. Arummwa ale yaanilipelela olamulelo wa Yesu Momweneni wa Muluku. Moovarihana ni masu Yesu aahimmye awe a murumeyi ole ookiserya, awiixutti yaahoona wira yaahiimananihe vale khiyaarowa okela Moomweneni.

Masu a Yesu yahaakhaliherya awiixutti oororomeleya wuncererya wiimananiha waya. Nto Yesu aahimaliha oriki: “Miyo kinolèlani wira othene ale arina, anovahiwa-tho, nto ale òthoiwa, hatá ele erinaya animwakhiwa”. Yesu aahooniherya wira awanani awe, yaawo yahamphavela “okhala mwené aya” yaarowa opwetexiwa. Nto vano, Yesu aahivikaniha mukwaha awe orowaka oYerusalemu.​—Luka 19:26-28.