Okhumaka oPereya, Yesu aahiphiya oBethania muttetthe waarakamenle ikiloomo 3, mpantta onikhuma nsuwa wa oYerusalemu. Maria ni Martha, yaahiriipiwa murima mwaha wa okhweliwa murokoraya iitthaniwa Laazaro. Nto atthu anceene yaahirowa waamaaliha.

Vano aahikhala mutthu aamulenle Martha wira Yesu aanirwa, nto Martha aahirowa okumana Yesu. Vano Martha aahimuleela Yesu etthu owo ni Maria yuupuwela aya mahiku ale maxexe yaavinre, oriki: “Pwiya! Nyuwo mwàri vava, murokor’aka khakhwá”. Masi, eyo khenooniherya wira khiyaarina nlipelelo. Maana Martha aahimuleela Yesu wira: “Kosuwela wira Muluku onimovahani sothene sintthunanyu onvekela”. (Yohani 11:21, 22) Woonasa wene, awo yuupuwela wira Yesu anwerya omukhaliherya murokoraya.

Yesu aahaakhula wira: “Murokor’inyu onohihimuwa”. Martha oona wira Yesu aahimya ohihimuxiwa wa atthu anrowa okhalaka valaponi muhoolo, ntoko aamini awe Abrahamu ni atthu akina. Nto aahooniherya waamini iwo oriki: “Miyo kosuwela wira onohihimuwa nihiku nokiserya, atthu othene yahihimuwaka”.​—Yohani 11:23, 24.

Niireke Yesu aamwaakhaliherya okathi ene yoole? Yesu aahimuupuxerya Martha wira aahivahiwa ni Muluku owerya onivikana okhwa, oriki: “Ole onikamini, hatá anakhwaru, onokhala-tho mukumi. Vano ole onetta ekumi, onikamini miyo, khankhwa-tho”.—Yohani 11:25, 26.

Yesu khahiyo wira aahimya wira awiixutti awe yaawo yaari akumi khiyaarowa okhwa. Maana owo aamookhwa ntoko aaleelale awe arummwa. (Matheyo 16:21; 17:22, 23) Yesu aaphavela ohimya wira mwaha woomwaamini, awo yamphwanya okumi woohimala. Atthu anceene anrowa ophwanya okumi owo nuumala ohihimuxiwa. Masi, atthu oororomeleya anrowa okhala wanikisa wa olumwenku ola, woonasa wene, khanrowa okhwa. Tthiri khula mutthu onimwaamini Yesu hata okhwaaka, okupaliki wira onoohihimuxiwa.

Masi niireke Yesu, yoowo aahimmye wira “miyo ki ohihimuwa n’ikumi” ammuhihimuxa Laazaro yoowo aavirinhe mahiku maxexe okhwiiye ene? Yesu aahimukoha Martha wira: “Nyuwo munnamini etthu ila?” Owo aahaakhula wira: “Ayo, Pwiya! Miyo kinnamini wira nyuwo Kristú, Mwana a Muluku, yowo atthuna orwa molumwenkuni-mu”. Okhala wira Martha aanaamini wira Yesu ampaka etthu wira omukhaliherye, owo aahirowa omuleela Maria okhwipi, wira: “Apwiya ahòrwa, anowihanani”. (Yohani 11:25-28) Okathi owo, Maria aahikhuma owannyawe otthariwaka ni atthu akina, yaawo yuupuwela wira aarowa opuro aavithiwe Laazaro.

Ohiya-vo, Maria aahirowa aari Yesu, nto inlaka aahikokhora ohoolo wa Yesu, khuhimya etthu emosaru Martha aahimmye awe oriki: “Pwiya! Nyuwo mwàri vava, murokor’aka khakhwá”. Okathi oonale awe wira Maria ni muttitthi ole waaninla, Yesu aahiriipiwa murima onapacerya wunla. Nto eyo yaahaavara murima atthu ale. Masi atthu akina yaaniikoha wira: “[Yesu] ola, amutthukunle maitho mulipa-òhona, khawerya wira Lázaro ahikhwé?”​—Yohani 11:32, 37.