Yesu aahiixuttiha itthu suulupale okathi aalya awe etthoko ya mukhulupale a aFarisi. Okathi aarowa awe oYerusalemu, Yesu aanitthariwa ni muttitthi muulupale. Nthowa xeeni? Niireke yaaphavela tthiri okhala atthareli awe, ahinatthi wupuwelela mwaha ole?

Yeettaka mphironi, Yesu aahaaleela etthu yaaxankinhe, oriki: “Akhalá mutthu onrwa okitthara miyo, khuhahiya atithi awe n’ame awe n’amwar’awe, n’àn’awe n’axinn’awe n’axirokor’awe, hatá ekumi awe, khanwerya okhala mwixutti aka”. (Luka 14:26) Masi, Yesu aaphavela ohimya exeeni ni masu ala?

Yesu khahiyo wira aahimya wira atthu otheene anikhala atthareli awe ahaana waanyokha amusi aya. Masi, aaphavela ohimya wira awo yaahaana omphentexa Yesu ovikana amusi aya. Nave khiyaatthuneya okhala ntoko mulopwana aakhoottale nlattulo na vameekhaaya, mwaha woowi aathenle niinaanoru. (Luka 14:20) Biibiliya onihimya wira Yakobe muhavinre aya aYuda ‘khamphenta’ Liya, masi amphenta Rakheli, eyo piiyo, amphenta vakhaani Liya onamphenta vanceene Rakheli.​—Maphattuwelo 29:31.

Moone wira, Yesu aahimmye wira awiixutti awe yaahaana onyokha ‘ekumi aya’. Eyo enitaphulela wira awiixutti eekeekhai ahaana omphentexa Yesu ovikana okumi aya, hata oleva okumi aya akhala wira vannitthuneya. Tthiri okhala mutthareli a Kristu muritti muulupale. Khahiyo etthu yoothweeliha aahiiso enipaka ahu nihuupuwenle.

Okhala mutthareli a Yesu pooti omwiiriha mutthu othanyiwa ni olupatthiwa ntoko Yesu aahimmye awe, oriki: “Ole ohinkuxa” mwiri awe wa nihaaxeryo “anakitthara miyo, khanwerya okhala mwixutti aka”. (Luka 14:27) Tthiri, mutthareli eekeekhai a Yesu ohaana weemererya onyoholiwa ntoko Yesu aanyoholiwa awe. Yesu aahihimya wira aamwiiviwa ni awanani awe.

Tivonto, muttitthi ole weetta ni Yesu waahaana osuwela saana ele enitaphulela aya okhala mutthareli a Kristu. Yesu aahittittimiherya eyo opakaka nlikanyiho nna: “Tthiri t’ani a nyuwo, àphavelaka oteka empa yorekama, ahinapajerya okilathi, khupuwela musurukhu orinawe okumiha, wira asuwele waphiyeryaka omalihana? Ahiré siso, athipelaka emp’eyo, òjelaka omaliha, othene ale yamonne anopajerya omutheya”. (Luka 14:28, 29) Mwekeekhai, ahinatthi okhala mutthareli a Yesu, atthu ale yeetta mukwaha ole ni Yesu arowaka oYerusalemu, yaahaana wuupuwela akhala wira yanwerya omaliherya muritti wa okhala mutthareli a Yesu. Okhala wira khiyaiwexenxe, Yesu aahipaka nlikanyiho nikina.

Yesu aahimmye wira: “Mwené t’ani onìra arowaka owana ekhotto ni mwené mukina, khuhipajerya okilathi, khíyupuwela wira: ‘Nwanani  aka onrwa okituphela n’atthu awe ikonto miloko mili [20.000]. Miyo kirina anakhotto ikonto mulokó [10.000] pahi: siso kinowerya owana n’uwo?’ Ahiweryeke, onimwaruma atthu awe orowa ovanelela murettele ni mwené owo, akhalaka nlelo ottaiwene”. Ottittimiheryaka mwaha ole, Yesu aahimmye so: “Siso, khula mutthu a nyuwo ohinihiya sothene sirinawe, khanwerya okhala mwixutti aka”.​—Luka 14:31-33.

Tthiri, Yesu khahiyo wira aaleela atthu ale paahi yaamutthara orowaka oYerusalemu. Khula mutthu oniixutta sa Kristu ohaana ophavela opaka ele Yesu aahimmye awe. Eyo enitaphulela wira ohaana oleva itthu sotheene orina awe, ohela muhina okumi awe, wira okhale mutthareli a Kristu. Eyo etthu enireerela awe mutthu wuupuwelela ni ovekela.

Vano Yesu aahitthikela olavula etthu yeeyo aahimmye awe Mwaha aalavunle awe Vamwaako. Owo aahimmye wira awiixutti awe yaari “makha a mulaponi”. (Matheyo 5:13) Woonasa wene, aaphavela ohimya wira ntoko siisaale maakha aniiriha aya etthu ohintta, awiixutti awe yaanaakhapelela atthu wira akhalane mweettelo ni mukhalelo womunepani wooloka. Nto vaavo muteko awe woolaleerya waaphiya aya wanikisa, Yesu aahihimya wira: “Makha etthu yorera tthiri. Masi, awo-tho yahiyá osiva, ninwerya sai ohokoloxerya osiva iwo?” (Luka 14:34) Atthu ale yanwiriyana yaanisuwela wira maakha yaakhanle muttetthe ole yaari oohiloka, maana yaanaakanyereya ni etthaya, nto yahiya osiva waya khiyaarina-tho muteko.

Yesu aahooniherya wira atthu yaale apacenrye khalai omutthara, ahaana wiikasoopa wira ahitthikele ottuli. Vano akhala wira annitthikela ottuli, awo kharina efaita, anlikana ni maakha ahiyale osiva waya. Nto atthu pooti opacerya waaramusa. Mootepa oriipiha murima, atthu awo khaneemereriwa ni Muluku ni pooti onyoholiha nsina nawe. Yesu aahittittimiherya otthuneya waya oheemererya eyo enikhumelelaka, vaavo aahimmye awe wira: “Ari ni màru òwìwa, yiweke”.​—Luka 14:35.