Yesu aahiwiixuttiha atthareli awe nlikanyiho nooniherya otthuneya waya othipelela ovekela. (Luka 11:5-13) Waaniheryasa, Yesu aari oSamariya aahiiso oGalileya, nto aahitthikela ottittimiherya otthuneya waya ovikaniha ovekela. Yesu aahipaka eyo olavulaka nlikanyiho nikina.

Yesu aahimmye wira: “Muttetthe mmosá, ahikhala mphuki ahamòva Muluku, nnákhala wattittimiha atthu. Muttetthe yowo, ahikhala-tho muthiyana namukhweli arowa omuhimerya wira: ‘Mukiphukele mulattu aka ni mutthu onwananaka’. Owo ahimukhottela mahiku manjene: nto nihiku nimosá ahitthokelela wira: ‘Vekekhai nkinimova Muluku, hatá nkinattittimiha atthu: ohiya vo, kinrowa omwirela exariya namukhweli ula, mana kharere okùkhula, wira ahitepé okinyonyiha mahiku othene’”.​—Luka 18:2-5.

Ooniheryaka ovareleya waya muteko nlikanyiho nawe, Yesu aahimmye wira: “Nwiriyane enihimyawe mphuki uwo òtakhala murima. Ankhi Muluku khaniwirela exariya ale àthanlalyawe, yawo animukhuwelela othana n’uhiyu? Walá onopisa wakhaliherya?” (Luka 18:6, 7) Nlikanyiho na Yesu aaphavela ohimya exeeni sa Tiithi awe?

Mwekeekhai Yesu khaaphavela ohimya wira Yehova Muluku onoolikana ni mphuki ole oohixariya. Masi aaphavela wooniherya ovirikana okhanle eriyari ya mphuki oohixariya ni Yehova. Akhala wira mphuki oohixariya onniwerya omukhaliherya mutthu mwaha woothipelela, moohaaniherya, Muluku onoowerya waakhaliherya ale aninvekela. Maana Muluku taxariya ni tooreera murima, nto onoowaakhula ale anthipelela onvekela. Ninniwerya woona eyo ni masu a Yesu oowi: “Miyo kinohimeryani wira [Muluku] onowirela exariya nananoru”.​—Luka 18:8.

Ikwaha sinceene, atthu oohaawa ni oowiiyeviha khaniireliwa exariya, masi ale oothaaciri ni arina owerya anniireliwa. Masi Muluku khonipaka eyo. Okathi waphiya, onoopaka itthu mwa xariya, aahukhumuku atakhali ni waavaha arumeyi awe okumi woohimala.

Tani arina waamini ntoko wa naamukhweli ole? Atthu akavi anikupali wira Muluku “onowirela exariya nananoru”? Yesu aahilavula otthuneya waya othipelela ovekela. Vano, ophavelaka wooniherya owerya orina aya nivekelo, Yesu aakonhe wira: “Mwana a mutthu, ahokolowelaka vathí-va, onimwaphwanya nlelo atthu òwamini?” (Luka 18:8) Yesu aahilavula eyo ophavelaka wooniherya wira okathi onrwa awe woonasa wene, onimwaaphwanya atthu oowaamini.

Atthu akina yanwiriyana Yesu yaanikupali wira yaahikhalana waamini. Maana yiixoona okhala anaxariya, masi khiyaawoonela vatthu atthu akina. Nto owuupuwelaka atthu awo yiixoona okhala anaxariya, Yesu aahipaka nlikanyiho nikina.

Yesu aahimmye wira: “Alopwana anli yahikela mpani mwa Muluku, wira elompe. Mukina ari nFarisi, mukina ari mulipa-òliviha mpósito. NFarisi uwo, emenlene, anilompa ni murim’awe, ìraka: ‘Múluku! Kinnoxukhuruni mwaha w’ohilikanaka miyo n’atthu akina, akhanle anawiye, òtakhala murima, anamararuwa: nnákhala nkikhanle ntoko natampi ula. Miyo kinnitthukwa  mahiku manli khula esumana. Kinnivaha mwàvulo wa itthu sothene sirinaka’”.—Luka 18:10-12.

AFarisi yaahisuweliwa okhala atthu yaaphavela wooniwa okhala anaxariya. Tivo yaanipaka eyo moophavela owooniherya atthu akina. Awo yaatthukwa Segunda-feira ni Namaxexe, wira awehiweke ni atthu, maana mahiku awo imerkaatu saanaatta atthu. Nave yaanivaha mpantta wa namuloko wa makukhu anlyiwa. (Luka 11:42) Myeeri vakhaani vahinatthi, aFarisi yaahooniherya wira khiyaasiveliwa ni atthu pure, ariki: “Atthu ale ahisuwenle Ikanó [moovarihana ni moonelo wa aFarisi] t’òthanyeya”.—Yohani 7:49.

Yesu aahivikaniha nlikanyiho nawe oriki: “Mulipa-òliviha mpósito, emenle ottaiwene, khatthuna hatá ottukhula maitho awehaka osulú. Animana etthirim’awe ahimyaka wira: ‘Múluku! Mukimorele ikharari, mana kanatampí’”. Mowiiyeviha, mulipa-ooliviha mpoosito aanisuwela soovonya sawe. Yesu aahimaliha nlikanyiho nawe oriki: “Miyo kinolèlani wira: ola ahokolowenle owani aleveleliwene. NFarisi uwo khaleveleliwe. Vekekhai ale anisinnuwiha, anoyevihiwa: vano ale anìyeviha, animunnuwihiwa”.​—Luka 18:13, 14.

Tthiri Yesu aahooniherya otthuneya waya wiiyeviha. Nave, miruku sa Yesu saahaakhaliherya awiixutti awe, okhala wira yaakhala eriyari ya aFarisi, yaawo yaixoona okhala anaxariya ni yaavaha efaita vanceene okhulupale. Nave nla nlopolo nootthuneya wa otheene animutthara Yesu.