Yesu ni awiixutti awe yaahilapuwa Muro Yordani waattamela muttetthe wa oYerikho, akhumaka oPereya arowaka oYerusalemu. Atthu akina yaahimutthara Yesu amurowelaka Paasikha a 33 EC.

Otthariwaka ni awiixutti awe, Yesu aaheetta mowaakuveya maana aaphavela ophiya oYerusalemu ohinatthi Paasikha. Masi awiixutti yaanoova. Muupuweleke wira, okathi Laazaro aakhwiiye awe, vaavo Yesu aakhuma awe oPereya orowaka oYudeya, Tome aahaahimeerya awiixutti akhwaawe wira: “Ni hiyo nrowé, nakhwé vamosá n’Apwiya!” (Yohani 11:16, 47-53) Tivonto, woova wa awiixutti waari wookhalela, maana orowa oYerusalemu vaanoopiha.

Wira aakhaliherye mwaha wa etthu yaarowa wiiraneya, Yesu aahiwiitthana okhwipi aaleela wira: “Mwiwe sana; vano ninrowa owela oYerusalemu. Weiwo, Mwana a mutthu onovahereriwa alupale ànamukuttho n’awixuttihi a ikano. Awo anomulamula wira iviwe, anonvelela w’amàlapo, wira envehe, emmane, emukhomele” vamwirini va nihaaxeryo. “Vano mmurottoni mwaya onohihimuwa mokhwani”.​—Matheyo 20:18, 19.

Ela ekwaha ya neeraru Yesu aaleelale awe awiixutti awe voohimya sa okhwa ni ohihimuxiwa wawe. (Matheyo 16:21; 17:22, 23) Masi, ekwaha ela Yesu aahimmye wira aamukhomeliwa vamwirini va nihaaxeryo. Awo yaahinwiriyana, masi khiyaiwexenxe ele aahimya awe. Waaniheryasa, yuupuwela wira omwene wa Isarayeli waarowa ottikiheriwa okathi ene yoole wira apuheke vamosa ni Kristu vathi vaava.

Woonasa wene, Salome, maama awe Yakobo ni Yohani aari mukwaha yoole. Yesu aahaavaha arummwa ale anli nsina naataphulela “Àna Ètari”, maana yaari ookhummwa murima ni oowaakuva onanariwa. (Marko 3:17; Luka 9: 54) Mukwaha mukina awiixutti ale anli yaatoko ophavela okhala ni Kristu Momweneni. Nto maama aya aanisuwela eyo. Vano maama aya aahimwaattamela Yesu, khukokhora ohoolo wawe, wira onvekele etthu. Nto Yesu aahimukoha wira: “Mumphavela-ni?” Salome aakhunle so: “Kimphavela wira an’ak’ala anli yakilathi mukina mono anyu wolopwana, mukina mono anyu wothiyana, Momweneni mwanyu”.​—Matheyo 20:20, 21.

Yooveka ele yaakhuma tthiri wa Yakobo ni Yohani. Nnaamwi yaapanke yooveka ele, Yesu iira olavunle ene niinaano wira aarowa ohaaxiwa vootakhala, oriki: “Nyuwo khamunsuwela envekelanyu. Munowerya owurerya ekahi y’ohawa, miyo kinrowaka owurerya?” Awo yaahaakhula wira: “Ayo! Nnowerya!” (Matheyo 20:22) Mwekeekhai nlelo awiixutti ale khiyaiwexenxe ele Yesu aahimya awe.

Vano Yesu aahaaleela wira: “Tthiri ekahi aka munowurerya. Nto okilathi mono aka wolopwana, walá mono aka wothiyana, nkihiyó miyo kiniwirelani: Atithi t’aniwirela ale athanlalyaya”.—Matheyo 20:23.

Vaavo arummwa muloko yaasuwenle aya ele Yakobo ni Yohani yaavekenle aya, yaahitikinihiwa. Niireke Yakobo ni Yohani ti yaatempe wooniherya ophavela okhulupale, okathi yoole arummwa yaanyakulihanne aya aphavelaka omusuwela ti pani aari muulupale? (Luka 9:46-48) Hiyo khaninsuwela, masi yooveka ele ennooniherya wira arummwa ale 12, khiyaavarihenle muteko miruku Yesu aavanhe awe sa waathokorerya atthu akina okhala aalupale. Nlelo awo yaaniphavela okhulupale.

Yesu aahilavula mwaha ole nnaamwi oona wira yaamuriipiwa murima. Nto aahiwiihana arummwa ale 12, aavaha miruku moophenta, oriki: “Mosuwela wira ale asuweliwe okhala mamwene a vathí-va annaruma atthu ntoko p’awaya, makhulupale annakukhumula n’uwerya waya. Nto wa nyuwo khahi siso: ohiya vo, ole omphavela okhala mulupale varíyari vanyu, ohana warumela akhw’awe; n’ule omphavela okhala òpajerya varíyari vanyu, aìkhalihe epottha y’atthu othene”.​—Marko 10:42-44.

Vano Yesu aahaavaha ntakiheryo nawe wira atthareke. Owo aahimmye so: “Tthiri Mwana a mutthu kharwenle orumeliwa: orwenlé warumela atthu n’uleva ekumi awe, wira awopole atthu othene”. (Matheyo 20:28) Iyaakha tthaaru saavinre, Yesu aahaarumeela atthu. Nave ampaka eyo vaavo aarowa awe waakhwela apinaatamu! Nto awiixutti ale yaahaana okhalana moonelo wa Kristu. Awo yaahaana ophavela waarumeela atthu, ohiya ophavela orumeeliwa ni wiiyeviha ohiya ophavela okhulupale.