Palano ooSineedrio oophavela omwiiva Yesu khaakhumenle saana, maana Yesu aahirowa mpantta onikela epheyo wa oYerusalemu, muttetthe wEfrayimi. Yesu aahikhala weiwo ni awiixutti awe ottaiwene wa awanani awe. (Yohani 11:54) Nto okhala wira aanaattamela Paasikha a 33 EC, moohipisa Yesu aamweetta mukwaha. Owo aahivira mpantta onikela epheyo wa oSamariya orowaka oGalileya, ekwaha yookiserya oxukurya oGalileya ohinatthi wiiviwa.

Wanipacerya wa mukwaha awe, vaavo Yesu aarowa awe muttetthe mukina, aahikumana ni anamakuttula 10. Ikwaha sikina, eretta ela ennihonona mipantta sikina sa erutthu, ntoko ikatha, ilipwi ni maaru. (Mothakoni 12:10-12) Nlamulo na Muluku naahimya wira namakokho aahaana okhuwela oriki: “Ka namwikho! Ka namakuttula!”, wira atthu ahimwaattamele.​—Onamukuttho 13:45, 46.

Nto anamakuttula ale 10 khiyaamwaattamenle Yesu. Hata vari siiso, awo yaanikhuwela ariki: “Yesu, Mwixuttihi! Munimorele ikharari!” Aawehaka anamakokho ale, Yesu aahimmye wira: “Murowé mwaisoniherye w’alipa a mukuttho”. (Luka 17:13, 14) Masu ala a Yesu anooniherya wira aanittittimiha Nlamulo na Muluku, nenlo naaweemererya anamukuttho ohimya wira mutthu aarina makuttula vano ammalela. Nto anamakuttula ale yaahaana otthikela okhala ni atthu.​—Onamukuttho 13:9-17.

Anamakokho ale 10 yaanikupali wira Yesu ookhalana owerya wa opaka miiriirya. Vano yaahirowa okumana ni anamukuttho hata yahaapenuxiwe. Yeettaka mphironi, yaahipenuwa mwaha woomwaamini Yesu. Nto yaahoona wira yaahivonihiwa!

Alopwana 9 yaawo yaapenuxiwe, yaahirowa. Masi mmosa khaapanke eyo. Owo aari muSamariya, yoowo aatthikenle wa Yesu. Nthowa xeeni? Nthowa noowi aamuxukhurela Yesu mwaha wonvoniha. Mulopwana ole “aninvuwiha Muluku ni nsu nulupale”, okupaliki wira Muluku tanvoninhe. (Luka 17:15) Nuumala omphwanya Yesu, aahikokhora ohoolo wawe onamuxukhurela.

Yesu aahaakoha atthu yaari vaavale wira: “Miyo nkavoninhe atthu mulukó? Akina athanu n’axexe ahanle vai? Khavo ohokolonwe wira anvuwihe Muluku, ahikhanle mmálap’ola!” Vano Yesu aahimwiirela muSamariya ole wira: “Nvenyé, muroke: wamini wanyu wowopolani!”​—Luka 17:17-19.

Okhala wira Yesu aahaavoniha anamakokho 10, eyo yooniherya wira aakhaliheriwa ni Yehova Muluku. Vano atthu ale 10, mmosa paahi toonihenrye wira aahiphwanya ephiro ya okumi. Olelo-va, Muluku khonimurumeela Yesu wira aavoniheke atthu. Masi akhala wira nnoomwaamini Yesu, nnoowerya otthara ephiro eniphwanyiha okumi woohimala. Niireke ninnixukhurela ntoko muSamariya ole?