1. Nivekelo xeeni nihireere osuweliwa?

ATTHU imilyau sinceene aalimalela nivekelo noovuwa nisuweliwe okhala Tiithi Ihu muri wiirimu aahiiso Nivekelo n’Apwiya. Yesu aarumenle nivekelo nna wira owiixuttihe atthareli awe moota woovekela. Itthu xeeni aavekenle awe? Ni xeeni nivekelo nna nryaaya nootepa otthuneya olelo-va?

2. Itthu xeeni tthaaru sootthuneya Yesu oniixuttinhe awe ovekela?

² Yesu aahimmye wira: “Vano, mulompeke so: ‘Tith’ihu, muri wirimu! Nsina nanyu nivuwihiwe [aahiiso nitteelihiwe]; omwene anyu orwe; otthuna wanyu wireye ntoko wirimu siso vathí-va’”. (Mmusome Matheyo 6:9-13.) Xeeni Yesu ohalaka oniixuttiha ovekela itthu iyo tthaaru?​—Nwehe Enoota 20.

3. Exeeni enitthuneya ahu osuwela voohimya sa Omwene wa Muluku?

³ Hiyo nihiixutta wira nsina na Muluku ti Yehova. Nave nihiixutta yootthuna ya Muluku wa apinaatamu ni elapo ya vathi. Masi Yesu aaphavela ohimya exeeni ni masu oowi: ‘Omwene anyu orwe’? Nto ninrowa wiixutta ele enitaphulela aya Omwene wa Muluku, ele enrowa aya opaka, ni moota sinrowa aya wiiriha nsina na Muluku otteelihiwa.

4. Omwene wa Muluku exeeni, nto ti pani ori Mwene aya?

⁴ Yehova ootikitherya eguvernu awe wiirimu ni oomuthanla Yesu okhala Mwene. Biibiliya onihimya wira eguvernu ela ti Omwene wa Muluku. Yesu “Mwené a mamwene, Pwiya a mapwiya othene”. (1 Timótheyo 6: 15) Tivonto, Yesu toniwerya opaka itthu sooloka onvikana khuta mwene, ni tooweryexa waavikana mamwene otheene.

5. Eguvernu ya Muluku enrowa olamulelaka eryeene woowi? Nto enrowa olamulelaka exeeni?

⁵ Nuuvira mahiku 40 Yesu ohihimuxiwe ene, owo aahitthikela wiirimu. Ohoolo waya, Yehova aahimuthanla okhala Mwene a Omwene awe. (Miteko 2:33) Eguvernu ya Muluku, nnaamwi eryeene wiirimu, enrowa olamulelaka elapo yotheene. (Wisupulula 11:15) Ti maana aya Biibiliya vanihimya awe Omwene wa Muluku okhala “Omwene wa wirimu”.​—2 Timótheyo 4:18.

6, 7. Xeeni Yesu oryaawe mwene oolokexa onvikana mwene oopinaatamu?

⁶ Biibiliya onihimya wira Yesu ti muulupalexa onvikana khuta mwene mwaha woowi “yowo pahi t’òhimala”, aahiiso khonikhwa-tho. (1 Timótheyo 6:16) Mamwene oopinaatamu annookhwa, masi Yesu khonlipelela okhwa. Nave sotheene sooreera onrowa awe opaka mmureerelo ahu khasinrowa omala.

⁷ Simuhimyaka Yesu, iprofesia sa Biibiliya sinilavula wira Yesu Mwene a xariya ni oothunku. Biibiliya onihimya so: ‘Mwa yowo enokhala eroho y’Apwiya: eroho y’osuwela ni y’ankhili, eroho ya miruku ni yo wilipiha, eroho y’osuwela ni y’omuttittimiha Muluku. Yowo onolipihiwa mwaha w’omova Muluku. Yowo khonalamula atthu ntoko sinòneyaya: khomphuka milattu [aahiiso ovaha miruku] mwaha wo wiwa pahi. Masi onowirela exariya amasikhini, onowakiha n’ikekhai alipa-òhawa’. (Yesaya 11:2-4) Mwaaniphavela okhalana mwene ntoko ola?

8. Ninsuwela sai wira Yesu khonrowa olamulelaka mekhawe?

⁸ Muluku ohaathanla atthu akina wira yalamuleleke ni Yesu momweneni wa wiirimu. Mwa ntakiheryo, olavulaka  ni Timootheyo, murummwa Paulo aahimmye so: “Nalipiheryaka wamini mohawani, nnottikhiwa omwene vamosá ni yowo”. (2 Timótheyo 2:12) Atthu akavi anrowa olamulelaka ni Yesu?

9. Atthu akavi anrowa olamulelaka ni Yesu? Nto Muluku opacenrye silini waathanla?

⁹ Ntoko niixuntte ahu Muru 7, moolohani murummwa Yohani aahoonihiwa Yesu ntoko Mwene wiirimu oryeene ni 144.000 mamwene. Tani ari 144.000? Yohani onitthokiherya wira atthu awo taale “yalempwe vayuji nsina na Mwapwittipwitthi [Yesu] ni nsina n’Atithi awe”. Nto aahihimya-tho wira: ‘Awo t’ale animutthara Mwapwittipwitthi [eyo piiyo, Yesu] nipuro ti nipuro ninrowawe. Awo yòpoliwe ehavuliwaka mw’atthu akina othene’. (Mmusome Wisupulula 14:1, 4.) Nto 144.000 maKristau oororomeleya yaawo Muluku aathanlale awe wira ‘awettiheke atthu a vathí-va’, vamosa ni Yesu. Okathi onikhwa aya, annihihimuxiwa wira yakhaleke wiirimu. (Wisupulula 5:10) Okhuma okathi wa arummwa, Yehova onnaathanla maKristau oororomeleya wira omalelihe nummuru na mamwene ala 144.000.

10. Munoonela sai Yehova omuthanla Yesu ni atthu 144.000 wira anilamuleleke?

¹⁰ Yehova onniniphenta vanceene maana ohaathanla apinaatamu wira yalamuleleke ni Yesu. Nto Yesu onrowa okhala namalamulela oolokexa, maana onnisuwela mukhalelo wa pinaatamu. Onnisuwela ele enitaphulela aya okhala pinaatamu ni ohaawa. Paulo onihimya wira Yesu onnisuwela ohaawa wahu, okhala wira “ohawa ni hiyo mwaha w’olosowa wahu tthiri Kristu ahehereriwa ntoko hiyo mwa sothene”. (aHéberi 4:15; 5:8) Nave 144.000 annisuwela ele enitaphulela aya okhala pinaatamu. Maana atthu awo aawanana etampi ni iretta. Tthiri  nihaana okupali wira Yesu ni atthu ale 144.000, anrowa onikhapelela saana maana annisuwela moonelo ahu ni mixankiho sahu.

11. Xeeni Yesu ohalaka owiixuttiha atthareli awe ovekela wira yootthuna ya Muluku yiireye wiirimu?

¹¹ Yesu aahiwiixuttiha atthareli awe ovekela wira yootthuna ya Muluku yiireye wiirimu. Nthowa xeeni? Nihiixutta Muru 3 wira Satana Diabo aahimmwareela Yehova. Nuumala Satana omwareya, Yehova aahimweemererya owo ni malaikha makina oohiroromeleya aahiiso axetwani, okhala wiirimu okathi vakhaani. Tivonto, khahiyo wira malaikha otheene yaapaka yootthuna ya Muluku wiirimu. Muru 10, ninrowa wiixutta itthu sikina voohimya sa Satana ni minepa sawe.

12. Itthu xeeni piili sootepa otthuneya sinihimmwa eliivuru ya Wisupulula 12:10?

¹² Biibiliya onnitthokiherya wira nuumala Yesu okhalihiwa Mwene a Omwene wa Muluku, moohipisa aarowa owana ni Satana. (Mmusome Wisupulula 12:7-10.) Eversiikulu 10 ennihimya itthu piili sootepa otthuneya. Omwene wa Muluku woopacerya olamulela, nto Yesu Kristu ti Mwene, nave Satana ooriheliwa vathi. Nto muhoolo ninrowa woona wira itthu iyo sihiiraneya.

13. Exeeni ekhumelenle wiirimu nuumala Satana oriheliwa vathi?

¹³ Biibiliya onnihimya ohakalala waakhumenle wa malaikha oororomeleya nuumala Satana ni axetwani awe oriheliwa vathi. Hiyo ninsoma wira: “Tivó, erimu yothene etteliweke murima, ni nyuwo othene munkhala weiwo!” (Wisupulula 12:12) Vano wiirimu wookhala murettele ni wiiraana maana malaikha otheene anipaka yootthuna ya Muluku.

14. Exeeni eniiraneya valaponi mwaha wa Satana oriheliwa vathi?

 ¹⁴ Masi valaponi-va, okumi khoreere oxankiha. Itthu sootakhala sinnaakhumelela atthu okhala wira “Satana òkhuruwela” vathi “ananariwene vanjene, okhala wira òsuwela wira orina okathi vakhani pahi”. (Wisupulula 12:12) Nto Satana oonanariwa vanci. Owo ohoomoliwa wiirimu ni onnisuwela wira onrowa opwetexiwa moohipisa-va. Ti maana aya onikumiherya awe maxakha a khula enamuna, owereya, ni ohaawa olumwenku wotheene.

15. Tiivi ekhanle yootthuna ya Muluku ni elapo ela?

¹⁵ Tthiri yootthuna ya Muluku ni elapo ela enimwiiraneya. Maana Muluku oniphavela wira atthu oohittheka akhaleke mparayiisu valaponi. (Esalimo 37:29) Nto Omwene wa Muluku onrowa opaka exeeni wira yootthuna eyo yiiraneye?

16, 17. Exeeni Daniyeli 2:44, enniixuttiha aya voohimya sa Omwene wa Muluku?

¹⁶ Eprofesia ya Daniyeli 2:44, enihimya so: “Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”. Vano eprofesia ela enniixuttiha exeeni voohimya sa Omwene wa Muluku?

¹⁷ Yoopacerya: enniixuttiha wira Omwene wa Muluku onrowa opacerya olamulela “mahiku òmwene owo”. Ela enitaphulela wira Omwene wa Muluku, waarowa opacerya olamulela nlelo iguvernu sa apinaatamu silamulelaka vathi-va. Yanenli: enniixuttiha wira Omwene wa Muluku, khiwaarowa omala nnakhala orantteliwa ni eguvernu ekina. Yaneeraru: enooniherya wira enookhala ekhotto eriyari ya Omwene wa Muluku ni iguvernu sa elapo ela. Omwene wa Muluku onrowa oxintta ekhotto eyo, ni owo  paahi ti eguvernu enrowa olamulelaka elapo yotheene. Nto apinaatamu anrowa okhalana eguvernu yootepa oloka ehitonko aya okhalana.

18. Eniihaniwa sai, ekhotto yookiserya ya Omwene wa Muluku ni iguvernu sa elapo ela?

¹⁸ Moota xeeni Omwene wa Muluku onrowa aya olamulelaka elapo ya vathi? Ehinatthi ekhotto yookiserya ya Harmagedoni, axetwani anrowa waawokaka “mamwene a mulaponi mothene, wira yathukumanyerye owana ekhotto ya nihiku nulupale na Muluku Òwerya Sothene”. Tthiri, iguvernu sinrowa owana ni Omwene wa Muluku.—Wisupulula 16:14, 16; nwehe Enoota 10.

19, 20. Xeeni vanitthuneya aya Omwene wa Muluku olamulela elapo ela?

¹⁹ Xeeni vanitthuneya aya Omwene wa Muluku? Nrowe niwehe mathowa mararu. Noopacerya: hiyo noorava yoottheka nto ninniwereiwa ni okhwa. Masi Biibiliya onihimya wira moMweneni mwa Muluku ninrowa okhalaka mahiku otheene. Tthiri Yohani 3:16, onihimya so: “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.

²⁰ Nthowa na nenli: Omwene wa Muluku ti wootepa otthuneya mwaha woowi valaponi atthu anceene anipaka itthu sootakhala. Atthu anceene annootha aahiiso owoka, ni orupihana moohiloka. Hiyo khanniwerya omaliha itthu iyo, masi Muluku onoomaliha. Nto atthu yaale ahinittharuwa opaka itthu sootakhala anrowa opwetexiwa ni ekhotto ya Harmagedoni. (Musome Esalimo 37:10.) Nthowa na neeraru: Omwene wa Muluku ti wootepa otthuneya mwaha woowi iguvernu sa apinaatamu khasirina owerya, ti sootakhala, ni sowootha. Khasinaakhaliherya atthu omwiiwelela Muluku. Biibiliya onihimya wira  “àkhala-tho akina anihawa epuheriwaka n’awo”.​—Musuweli 8:9.

21. Moota xeeni Omwene wa Muluku onrowa aya wiiriha otthuna wa Muluku wiiraneya valaponi?

²¹ Nuumala Harmagedoni, Omwene wa Muluku onimwiiriha wiiraneya yootthuna ya Muluku valaponi. Mwa ntakiheryo, onrowa ompwetexa Satana ni axetwani awe. (Wisupulula 20:1-3) Nto khuuvo onrowa owereiwaka aahiiso okhwa. Maana mukuttho wa Yesu, onoowiiriha apinaatamu otheene oororomeleya okhala mParayiisu mahiku otheene. (Wisupulula 22:1-3) Omwene onrowa otteeliha nsina na Muluku. Ela enitaphulela exeeni? Enitaphulela wira vaavo eguvernu ya Muluku enrowa aya olamulelaka valaponi, apinaatamu otheene anrowa ovuwihaka nsina na Yehova.​—Nwehe Enoota 21.

22. Ninsuwela sai wira Yesu khaakhanle Mwene okathi aaryaawe valaponi aahiiso omalakaru ohihimuxiwa?

²² Yesu aahiwiixuttiha atthareli awe ovekela wira: ‘Omwene anyu orwe’. Ela enooniherya wira eguvernu ya Muluku yaamoorwa muhoolo. Wanipacerya Yehova aarowa otikitherya eguvernu awe ni omukhaliha Yesu Mwene. Niireke Yesu aahikhalihiwa Mwene omalakaru ophiya wiirimu?  Nnaari, maana aahaana owehererya. Okathi omosa nuumala Yesu ohihimuxiwa, Pedru ni Paulo yaahiiwanyeiha eprofesia ya Esalimo 110:1, wira yaamuhimya Yesu. Eprofesia ela Yehova onihimya wira: “Mukilathi mono aka wolopwana, kinimwakuxa awanan’inyu ekhalé ipottha sanyu”. (Miteko 2:32-35; aHéberi 10:12, 13) Nto Yesu aarowa owehererya mpakha silini, Yehova ohinatthi omukhaliha Mwene?

23. (a) Yesu opacenrye silini olamulela ntoko Mwene a Omwene wa Muluku? (b) Exeeni enrowa ahu wiixutta muru onittharelana?

²³ Mwa iyaakha sinci ohinatthi mwaakha wa 1914, nikhuuru nimosa na maKristau eekeekhai naahiiwexexa wira mwaakha ola waarowa okhala wootthuneya moovarihana ni iprofesia sa Biibiliya. Nto sowiiraneya sa olumwenku okhuma mwaakha wa 1914, sahooniherya wira wiiwexexa wa atthu awo waari wekeekhai. Yesu opacenrye olamulela ntoko Mwene mwaakha yoola. (Esalimo 110:2) Moohipisa, Satana aahiriheliwa valaponi, nto vano orina “okathi vakhani pahi”. (Wisupulula 12:12) Muru onittharelana, onrowa onikhaliherya woona wira ninkhala mahiku ookiserya. Nave, nnimwiixutta wira moohipisa, Omwene wa Muluku onimwiiriha yootthuna ya Muluku wiiraneya vathi-va.​—Nwehe Enoota 22.