Okhuma eyaakha ela, nnookhalanaka okathi munceene wira niilokiherye nihinatthi ophiya nihiku na Wuupuwelela okhwa wa Kristu. Akhala wira Wuupuwelela onrowa okhala eriyari ya esumana, mithukumano sa Okumi ni Orummwa Ahu khasinrowa okhala esumana eyo. Nave wakhala wuumalani wa esumana, khonrowa okhala mwaha wa atthu otheene ni Yoosoma ya Owehaweha. Munrowa orumeela sai mwa miruku okathi owo woomumula? Moolikanasa ni okathi wa makristau oopacerya, okathi wa yowiiraneya eyo ya vameekha aya, onitthuneya wiilokiherya saana. (Luk 22:7-13; km 3/15 epaax. 1) Masi otheene ahu nihaana olokiherya murima ahu. Ninrowa opaka sai eyo?

• Mutthokeleleke otthuneya waya orowa muthukumano owo.​—1 aKor 11:23-26

• Nvareryeke waataana wanyu ni Yehova ni nvekeleke voohimya sa mwaha owo.​—1 aKor 11:27-29; 2 aKor 13:5

• Musomeke ni mutthokeleleke myaha sa mBiibiliyani sinitthokiherya yootaphulela ya Wuupuwelela.​—Yoh 3:16; 15:13

Anamalaleerya akina annisoma soolepa sinilokiheriwa wira nisomeke okathi wa Wuupuwelela, siri elivirinyu Ovarerya Soolempwa Khuta Nihiku. Akina annirumeela eprograma ya etabela eri mwaha ola. Nave-tho akina annitthikela osoma myaha sa Owehaweha sinilavula voohimya sa Wuupuwelela ni ophenta onoonihenrye awe Yehova ni Yesu. Otthara eprograma, etthu yootthuneya, ni enoonikhaliherya, omwaattamela Yehova ni Mwanawe.