OTTHUNEYA WAYA: Atthu ahaana wiixutta malakiheryo a Yehova ni okhala moovarihana ni malakiheryo awo wira aweryeke omukokhorela vooweemereriwa. (Yes 2:3, 4) Eliivuru eni: ‘Mukhaleke Mophentani Mwa Muluku’, yeeyo eri eliivuru ahu yanenli ya yoosoma ya Biibiliya, ennaakhaliherya atthu anaasomiha ahu wiiwexexa ni ovarihela muteko malakiheryo a Muluku mweekumini mwaya. (aHé 5:14) Hiyo nihaana wiimananiha wira naavare murima okathi onaasomiha ahu wira yooneke oreerela waya opaka marukunuxo.—aRo 6:17.

MOOTA WOOPAKA EYO:

• Mwiilokiheryeke saana, muupuwelelaka makhalelo a ole onimusomiha anyu. Muupuweleleke makoho anrowa omukhaliherya owo ohimya moonelo awe ni muupuwelo awe voohimya sa mwaha onisommwa.—Mir 20:5; be-T 259.

• Murumeeleke ikaaxa siri muliivuruni mmo wira mmukhaliherye ole onimusomiha anyu woona ovareleya waya muteko malakiheryo a mBiibiliyani.

• Mmukhaliheryeke ole onimusomiha anyu osuwela orumeela yowuupuxerya ya murima awe, masi muhimpakeleke soothanla.—aGa 6:5.

• Mwaarumeeleke ankhili wira moone vakhala wira ole onimusomiha anyu onitthuneya okhaliheriwa ottharihela malakiheryo a mBiibiliyani. Mulavulaka voomureerela murima mmulakiherye wira opakeke marukunuxo mwaha wa omphenta Yehova.—Mir 27:11; Yoh 14:31.