Niireke murina iyaakha sinikhuma 23 mpakha 65 ni munvara muteko wa Muluku wa okathi wotheene? Niireke okumi anyu ti wooloka ni onniweemereryani orumeela mapuro oothowa anamalaleerya? Akhala wira munaakhula wira aayo makoho ala, niireke mootoko wuupuwelela orowa Exikola ya Anamalaleerya a Omwene? Okhuma vaavale epacenrye aya exikola eyo, anna ni arokora anceene oothela, oohithela wala oohitheliwa aavekela orowa exikola eyo. Hata vari siiso, nlelo ninnaaphavela anna anceene oohithela wala oohitheliwa aniphavela orowa exikola eyo. Munvekeleke Yehova wira muncererye ophavela wanyu omusiveliha ni omutakiha Mwanawe. (Esa 40:9; Mat 20:28; aHe 10:7) Nuumala-vo, muupuweleke marukunuxo mukhanle anyu oopaka mweekumini mwanyu, ohela muhina muteko anyu ni itthu sikina, wira mphwanelele.

Iparakha xeeni aphwannye aya anna ni arokora aronwe exikola eyo? Anaxikola akina aathanleliwa orowa orumeela mapuro anilavuliwa mattaava makina wala orowa olaleerya mapuro oowaatta atthu. Nave muhoolo mwaya akina aathanleliwa orumeela ntoko axitokweene a esirkwiitu ookhaliherya, nave akina ntoko axitokweene a esirkwiitu wala mamissionaario. Muupuweleleke muteko mukhanle anyu onvarela Yehova, ntoko profeta Yesaya yoowo aahimmye so: “Miyo kiri va: kirumekeni”.—Yes 6:8.

NWEHE EVIIDIYU, MAMISSIONAARIO—YAAWO ANIVARA MUTEKO WOOHEPHA , NUUMALA-VO MWAAKHULEKE MAKOHO ALA ANITTHARELANA:

• Mamissionaario anithanliwa sai?

• Muteko xeeni wooreera mamissionaario anivara aya?

• Mareeliho xeeni aniphwanya aya ale ari mamissionaario?