Okhuma mwaakha wa 2018, irevista sahu aniroiheliwa atthu otheene, sooturukeya. Khula nummuru na erevista ninttittimiherya mwaha mmosa. Irevista iyo sotheene siniirela mpantta ekaaxa ahu ya ikaruma ennikhaliherya Wiixuttiha. Nave nihaana orumeela okathi woolaleerya. Hiyo pooti nave okuxa mmurupani mwahu irevista sintthokiherya myaha soovirikana okathi nneetta ahu mukwaha wala ninrowa ahu omerkaatu. Nave khaninrumeela irevista sahu wira niirihe soosoma sa Biibiliya, masi iyo pooti waakhaliherya atthu wiixutta voohimya sa Muluku.

Okathi munivaanela anyu ni mutthu, musomeke yoolepa ya mBiibiliyani ni mulavuleke mwaha ori murevistani onrowa onvara murima. Mwa ntakiheryo, vakhala wira mutthu owo ookhalana anamwane, oonyoonyiheya aahiiso ooriipiwa murima mwaha wookhweliwa, nyuwo pooti ohimya so: “Koosoma etthu yooreera voohimya sa mwaha owo erevista ela. Kiireke munniphavela oweha?” Akhala wira mutthu owo onoosiveliwa, munvahe erevista eyo, wala pooti omwinviyarela eletroniko, hata niri ene nihiku noopacerya ovaanela. Yoolakela ahu khahiyo ovaha iliivuru paahi, masi irevista iyo sinoonikhaliherya waaphwanya atthu aniphavela weettela ele aniixutta aya.—Mit 13:48.