Okathi muniweha anyu ifilori sa ikoore sooreera, erimu yoosareya itheneeri, aahiiso maasi ekhuruwaka vamwaako, niireke munnoona wira itthu iyo sookhalana Mpattuxa? Soopattuxiwa, sinnooniherya mikhalelo sihinooneya sa Yehova. (aRo 1:20) Okathi nnuupuwelela ahu itthu ninweha ahu, ninnoona owerya wa Muluku, ophenta, ankhili, exariya ni oreera wawe murima.​—Esa 104:24.

Soopattuxiwa xeeni sikina sa Yehova muniweha anyu khula nihiku? Hata mukhalaka osidade, waanyiheryasa munnaaweha axipalame ni miri. Oweha ni ephoole soopattuxiwa sa Yehova, onninikhaliherya ovukula oxanka, opweha nipuro noopacerya itthu sootthuneya, ni wuncererya waamini wahu wira Yehova onoowerya oneettiha mwa mahiku otheene. (Mat 6:25-32) Akhala wira mookhalana anamwane, muhaana waakhaliherya oweha mikhalelo sa Yehova sookuxa murima. Vaavo nninnuwa ahu niwehaka soopattuxiwa siri mapuro ninkhala ahu, ninniwerya omwaattamela Mpattuxa.​—Esa 8:3, 4.

NWEHE EVIIDIYU ENI: SOOPATTUXIWA SINNOONIHERYA OVUWA WA MULUKU—OMWALEYA WA NSUWA NI IKOORE , NUUMALA​-VO MWAAKHULEKE MAKOHO ALA ANITTHARELANA:

• Moota xeeni ipigmento sinnikhaliherya aya oweha ikoore?

• Xeeni okathi itthu sinaarya aya sinooniherya aya ikoore sa ekhweyi?

• Xeeni nnoona ahu ikoore soovirikana okathi ninweha ahu meeku?

• Muttetthe onikhala anyu, ikoore xeeni sookuxa murima sa soopattuxiwa muniweha anyu?

• Xeeni nintthuneya ahu wiivaha okathi wira niweheke itthu sipattuxiwe?