Nkahaya muupuwele mukhalaka oGalileya okathi wa Yesu. Muneetta mukwaha murowaka oYerusalemu wira muupuwelele Niira na Maxaxa. Epooma ele ehaatta anamakokhorela anikhuma mittetthe soorakamela ni soovirikana. Nyuwo muniphavela onvaha mukuttho Yehova. Mukunxe ene epwittipwitthi, munnipacerya weetta eriyari ya atthu anceene murowaka opooma opuro yaari aya etemplo. Okathi muniphiya anyu, munnoona wira aakhala atthu anci aniphavela ovaha mukuttho aya. Nuumala-vo, enniphiya ekwaha anyu yowaavahererya epwittipwitthi anyu alipa a mukuttho. Okathi yoowo munnimuupuwela munninyu, woonasa wene ori eriyari ya atthu wala epantte ekina ya epooma, yoowo ohikhanle ni murettele ni nyuwo. Yesu onnitthokiherya etthu enitthuneya anyu opaka. (Mmusome Matheyo 5:24.) Moota xeeni nyuwo ni munninyu owo munrowa anyu okhala ni murettele ntoko Yesu aalakihenrye awe? Murumeelaka elista ela, muhele ekanyeryo opuro munoona anyu wira ohaakhuliwa saana.

NYUWO MUHAANA . . . 

• olavula ni munninyu vakhala wira nyuwo munoona wira yena ookhalana mathowa ooloka animwiiriha oxankiheya

• weererya oturuka muupuwelo wa munninyu akhala wira munoona wira waakuva onanariwa, aahiiso omooniherya wira ookhalana nthowa

• onwiriyana munninyu moopixa murima okathi onilavula awe. Nave nnaamwi muhiiwexexaka saana, munvekeleke musammaha mwaha wa etthu enimuxankiha wala epanke anyu moohilakela

MUNNINYU OHAANA . . . 

• ophavela nikhaliheryo na atthu akina mmulokoni aaleelaka moota mmutthekenle anyu

• woopwapwelani, ohimyaka khula etthu mmwiirihe anyu, ni wookhanyereryani weemererya yoovonya anyu

• osuwela wira vaatthuneya wiiyeviha ni olipa murima wira mulavule ni yena, ni woolevelelani ni murima wotheene

Nnaamwi mahiku ala okokhorela wahu ohivekelaka ovaha mikuttho sa inama, exeeni Yesu enniixuttiha awe voohimya sa moota wookhala a murettele ni annihu wira Muluku eemererye okokhorela wahu?