Yehova onnoona ekasamento okhala ya efaita. Owo ohimmye wira mulopwana ni muthiyana ahaana okhala erutthu emosa. (Mat 19:5, 6) Aakhala matakiheryo manceene ooloka a arumeyi a Muluku arina ekasamento yooloka. Masi, khiivo ekasamento eri yoomalela. Okathi mukina sinookhumelelaka mixankiho. Saakhumelelaka mixankiho nihitthareke muupuwelo wa anamunceene anoona wira ovalaana ni omwalana, enamuna yookhweya ophuka mixankiho. Moota xeeni maKristau akhanle aya ookhapelela ekasamento aya?

Nrowe nithokorerye mavalo 5 ooreerela.

1. Mukhapeleleke murima anyu mukhoottaka opaka itthu sikhanle oohonona ekasamento anyu ntoko: Olavula, owehana aahiiso opaka itthu sikina moovekana ni matthekulelo oohiloka.—Mat 5:28; 2 Pe 2:14.

2. Mulipiheke waataana wanyu ni Muluku, ni muncereryeke ophavela wanyu omusiveliha mukasamentoni mwanyu.—Esa 97:10.

3. Nvikaniheke owara omutthu musya, ni mpakeke itthu sikhanle oomwiiriha ole muthelanne anyu ohakalalaka.—aKol 3:8-10, 12-14.

4. Muttittimihaneke ni mulavulihaneke saana.—aKol 4:6.

5. Musiveliweke ni mumphenteke ole muthelanne anyu.—1 aKo 7:3, 4; 10:24

Okathi maKristau anttittimiha aya ekasamento, ammuttittimiha ole Okumihenrye ekasamento eyo, Yehova.

NWEHE EVIIDIYU ENI: ‘HIYO NIHAANA ‘OLIPIHERYA OTTHIMAKA’—NITTHARIHELEKE IKANO SA OXINTTANA NNO, NUUMALA-VO MWAAKHULEKE MAKOHO ALA ANITTHARELANA:

• Mixankiho xeeni sikhanle ookhumelela mukasamentoni hata eyo epaceryaka saana?

• Malakiheryo a mBiibiliyani anaakhaliherya sai ale anoona wira khamphentiwa mukasamentoni mwaya?

• Malakiheryo xeeni a ekasamento Yehova okumihenrya awe?

• Exeeni anamathelana akhanle aya oopaka wira ekasamento aya ekhumele saana?