Xeeni annisivela aya vanceene a kongresu ahu? Ntoko mithukumano sa aIsarayeli, akongresu ahu olelo-va, anninivaha eparakha yoomukokhorela Yehova vamosa ni annihu imilyau sinceene. Hiyo enninisivela vanceene eyoolya ya omunepani nnaakhela ahu okathi owo. Nave ti voohakalaliha okhala vamosa ni apatthani ni amusi okathi owo. Enamuna emosa ninrowa ahu wooniherya wira ninnivaha efaita soovaha iyo sa Yehova, wiimananiha wira niwehe mithukumano iyo mahiku ooraaru a kongresu.

Okathi ninkhalana ahu eparakha eyo yoothukumana vamosa ni axinnihu, nihaana wooniherya ophenta ohiya paahi ophavela mureerelo ahu wala wiisupuwelaka mmansihu. (aGa 6:10; aHe 10:24, 25) Vaavo nimpaka ahu itthu ntoko ohula mukhora wira munna wala murokora ovire ni orumeela paahi opuro ninrowa ahu ophavela, eyo ennooniherya wira ninnihela soophavela sa atthu akina ohoolo. (aFi 2:3, 4) Okathi wa kongresu, munnikhalana eparakha yoowaasuwela apatthani asya. Wanipacerya ni wanikisa wa mithukumano wala okathi woophumurya, nyuwo pooti okhalana yoolakela yoovaanela ni mutthu muhinimusuwela anyu. (2 aKo 6:13) Opatthani nimpaka ahu, pooti okhala wa mahiku otheene! Ohiya-vo, okathi atthu akina ahinimurumeela Yehova aniweha aya ophentana wahu wekeekhai, pooti ophavelaka wiixutta voohimya sa Yehova.—Yoh 13:35.

NWEHE EVIIDIYU, ‘OPHENTA KHONIMALA-THO’! KONGRESU INTERNACIONAL, NUUMALA-VO MWAAKHULEKE MAKOHO ALA ANITTHARELANA:

• Anna yaawoonihenrye sai niphento anna a ilapo sikina yaamurwenle kongresu internacional a 2019?

• Xeeni wiiraana ni ophenta wa arumeyi a Yehova ori aya wa vameekhaaya?

• Exeeni anna akina a Nikhuuru Noolamulela ahimmye aya sa ophenta okhanle eriyari ya maKristau?

• Ophenta waakhalihenrye sai anna a wAlemanha ni oCoreia do Sul okhala oowiiraana?

• Exeeni mulakenle anyu opaka?