Mwaha wookhala atthu oottheka, nihaana wiimananiha vanceene wira nikhapelele miyuupuwelo sahu soohiloka. Okathi nneemererya ahu itthu iyo soohiloka sikhalaka mmuupuweloni mwahu, waataana wahu ni Yehova pooti ohononeya aka. Mwa ntakiheryo, atthu akina mwaha woohikhalana eyoolya, ikuwo, opuro wookhala annihonona omphenta waya Yehova. Akina anneemererya mweettelo wa orupihana woohiloka, ahononaka waataana waya ni Yehova. (aRo 1:26, 27) Nave atthu akina anneemererya okathi anikhanyereriwa aya opaka itthu soohiloka, aphavelaka waasiveliha apatthani aya.—Okh 23:2.

Nipakeke exeeni wira miyuupuwelo sahu soohiloka sihihonone mweettelo ahu? Nihaana wiimananiha vanceene wira nipake itthu sinimusivela Yehova. (Mat 4:4) Ohiya-vo, nihaana omuxonttela Yehova wira onikhaliherye okhapelela miyuupuwelo sahu soohiloka. Mwaha wa xeeni? Okhala wira owo onnisuwela etthu yooloka wa hiyo ni onoowerya okhapelela miyuupuwelo sahu soohiloka.—Esa 145:16.

NWEHE EVIIDIYU ENI: MUHIMUHIYE SIKARO OHONONA AKA OKUMI ANYU, NUUMALA-VO MWAAKHULEKE MAKOHO ALA ANITTHARELANA:

• Xeeni atthu akina animpaha aya sikaro?

• Mixankiho xeeni sikaro okhanle awe owookumiheryani?

• Xeeni vari aya vootakhala ompaha sikaro?—2 aKo 7:1

• Munrowa owerya sai okhootta okathi muneehereriwa anyu ompaha sikaro? Aahiiso munrowa owerya sai ohiya ompaha sikaro?