Anaxikola ahu a Biibiliya ahaana okhalana waamini woolipa, wira amusivelihe Muluku. (aHe 11:6) Nnoowerya opaka eyo nirumeelaka eliivuru Okumi Woohimala! Eliivuru eyo yookhalana soolepa sooreerela, miyuupuwelo sooloka, makoho ooreerela, iviidiyu soovara murima ni ifootu sooreera. Wira anaxikola ahu a Biibiliya akhalane mikhalelo sooloka ni wira akhale mpatthani a Yehova, nihaana waateka ni ikaruma soolipa ni sihinivya.—1 aKo 3:12-15.

Atthu akina anuupuwela wira khahiyo vookhweya okhala mpatthani a Muluku, okhala wira owo khonooneya. Nto, nihaana waakhaliherya anaxikola ahu a Biibiliya omusuwela Yehova ni omuroromela.

NWEHE EVIIDIYU ENI: MWAAKHALIHERYE ALE MUNAASOMIHA ANYU BIIBILIYA, OMWAAMINI YEHOVA MURUMEELAKA ELIIVURU “OKUMI WOOHIMALA!”, NUUMALA-VO MWAAKHULEKE MAKOHO ALA ANITTHARELANA:

• Exeeni ennikupaliha wira murokora ole ahiilokiherya saana wira iirihe yoosoma?

• Murokora ole aarumeelale sai makoho oowuncererya, wira osuwele moota naxikola oonela awe yoolepa ya Yesaya 41:10, 13?

• Moota xeeni eviidiyu ni soolepa sa mBiibiliyani sanvanre aya murima naxikola?

Anamunceene khanisuwela efaita erina aya yowoopola, maana anuupuwela wira khahiyo yoovaha ya Muluku. (aGa 2:20) Ti vo, nihaana waakhaliherya wira yaaminiki mukuttho wowoopola wa Yesu.

NWEHE EVIIDIYU ENI: MWAAKHALIHERYE ALE MUNAASOMIHA ANYU BIIBILIYA, OMWAAMINI YESU MURUMEELAKA ELIIVURU “OKUMI WOOHIMALA!”, NUUMALA-VO MWAAKHULEKE MAKOHO ALA ANITTHARELANA:

• Exeeni ennikupaliha wira munna ole aahilokiherya saana wira iirihe yoosoma?

• Moota xeeni aarumenle awe epantte eni: “Nwehe Itthu Sikina” uupuwelaka makhalelo a naxikola awe a Biibiliya?

• Xeeni vari aya vooloka ovekela vamosa ni naxikola anyu?