Ebroxura eni Munwiriyaneke Muluku epakeliwe wiixuttiha ikeekhai soopacerya sa mBiibiliyani sirumeeliwaka ilatarato wira yaakhweiherye ale ahinisuwela osoma. Khula yoosoma erina ipaaxina piili ni sookhala ilatarato sooreera, yootthokihiwa mwa enamuna enikhweya aya osuwela elatarato enittharelana.

Ebroxura Munwiriyaneke Muluku Wira Mphwanye Ekumi Ehinimala, yookhalana ilatarato imosaru sirina aya ebroxura Munwiriyaneke Muluku, masi eyo yookhalana masu oolempwa nave enooweryaneya orumeeliwa ni atthu anisuwela osoma vakhaani. Ikwaha sinceene anamalaleerya onnaasivela orumeela eyo ntoko ebroxura ya mwiixuttihi nto ole onisomihiwa onarumeela ebroxura Munwiriyaneke Muluku. Ipaaxina sinceene sookhalana ekaaxa enihimya itthu sikina ekhanle oorumeeliwaka okathi wa yoosoma moovarihana ni makhalelo a mutthu owo.

Ibroxura iyo soopiili pooti okaiwa khula okathi hata ohikhanle mweeri onikaiwa aya. Okathi oniiriha anyu yoosoma ya Biibiliya, murumeeleke ilatarato wira mwiiwanyeihe nuulumo na Muluku. Mpakeke makoho animwiiriha mutthu owo ohimya ele yiixuntte awe. Musomeke ni otthokiherya khula yoolepa eri vathi va khula epaaxina. Mwamaliha osoma ebroxura eyo, musomeke eliivuru eni Biibiliya Onniixuttiha Exeeni? wira mmukhaliherye mutthu owo mpakha obatiziwa.