Sookhala iviidiyu xexe nikhanle ahu oorumeela aka muteko woolaleerya. Nto khula eviidiyu erina yoolakela xeeni?

• Xeeni Vanitthuneya Anyu Omusoma Biibiliya? — Eviidiyu Yoomalela. Eviidiyu ela, epakeliwe atthu yaale anisiveliwa ni Biibiliya moohicikha etiini aya wala itthu anikupali aya. Nave ennaatumererya atthu ophwanya waakhuliwa wa makoho aya ootepa okhalana efaita mookumini mwaya. Nave-tho ennitthokiherya moota woovekela yoosoma ya Biibiliya.

• Xeeni Vanitthuneya Anyu Omusoma Biibiliya? (eviidiyu yookhuveya). Eviidiyu ela, enoolikana ni eviidiyu yoomalela niromonle ahu wanipacerya. Nto eyo epakeliwe atthu ahirina okathi munceene woovaanela.

• Enipakiwa Sai Yoosoma ya Biibiliya? Eviidiyu ela, epakeliwe wiira yaasiveleke atthu akina aniphavela omusoma Biibiliya ni waakhula makoho voohimya sa eprokrama eyo, ohela muhina moota woovekela yoosoma ya Biibiliya.

• Munnaakheliwa Kursu Ola a Biibiliya. Eviidiyu ela, epakeliwe wiira yooniheriweke alipa-oomusoma Biibiliya. Nnaamwi eviidiyu ela eri ene epaaxina 2 ya eliivuru Okumi Woohimala!, nyuwo pooti wooniherya okathi munipaceriha anyu yoosoma murumeelaka ebroxura Okumi Woohimala!. Maana eviidiyu eyo enitthokiherya soosoma siri eliivuru eyo ni ele naxikola onrowa awe wiixutta okathi wa yoosoma.

Nnaamwi khula eviidiyu erina ene yoolakela aya, hiyo pooti orumeela khula eviidiyu wiira niwooniherye atthu akina aahiiso owinviyarela okathi wooreerela. Nto anamalaleerya annitumereriwa wiira alimaleleke iviidiyu iyo ni arumeeleke saana okathi woolaleerya.