Ihasara sa ephattu sinnitepa okhumelela mahiku ala. Okathi enikhumelela aya ehasara, mareheryo a moota woowaakhaliherya atthu aphwanyiwe ni ihasara, ahaana okhala ootthokiheya. Wiira eyo eweryaneye, Nikhuuru Noolamulela noopaka mareheryo wiira efiliyaali ya khula elapo, ekhalane eDepartamento Enaakhaliherya Anna Aphwanyiwe ni Ihasara.

Okathi anna a edepartamento eyo anisuwela aya wiira yookhumelela ehasara, moowaakuveya awo annaalikarela axitokweene a muttetthe owo, wiira asuwele etthu ekhanle aya oopaka wiira yaakhaliherye anamalaleerya. Vakhala wiira ehasara eyo yookumiherya mixankiho anamalaleerya ahinwerya aya wiikhaliherya, efiliyaali enimwaathanla anna oophwanelela wiira yaakhaliherye anamalaleerya awo. Anna awo pooti waavekela mavoluntaario, aahiiso waavaha itthu sene anamalaleerya awo amphavela aya. Wala awo pooti othuma ni okawa muttetthe yoowo.

Orumeela enamuna eyo yookhaliherya, ennikumiherya mireerelo sinceene. Okhala wiira eyo, ennivukula ovariwa muteko munceene, osyaka onyakulihana ni orumeela saana musurukhu aahiiso mireerelo. Mixankiho seiyo saarowa okhumelela vakhala wiira khula munna aarowa ophavelaka opaka itthu mwa enamuna awe.

Anna anithanliwa ni efiliyaali, takhanle oohimya nummeru na mavoluntaario anireerela ni musurukhu kavi onrowa ophiyerya wiira orumeeliwe wiira akhaliheriwe anna aphwanyiwe ni ihasara. Nave awo ahaana wiiwanana ni makhulupale a muttetthe owo, maana awo pooti okhaliherya wiira muteko owo ovariwe moowaakuveya. Nave-tho ahikhale atthu anrowa ovekela musurukhu aahiiso eyoolya wiira aroihe mapuro akhumelenle ehasara vahikhanle wiira aroovekeliwa.

Hata vari siiso, okathi enikhumelela aya ehasara hiyo nihaana okhaliherya. (aHe 13:16) Maana ninnaaphenta annihu! Nto exeeni nikhanle ahu oopaka? Etthu yuulupale nikhanle ahu oopaka, waavekelela anna aphwanyiwe ni ehasara vamosa ni anna anaakhaliherya. Nave hiyo pooti ovaha musurukhu ahu, wiira nikhaliherye muteko onivariwa olumwenku wootheene. Sihooleliwaka ni Nikhuuru Noolamulela, ifiliyaali sikhanle oohimya moota woorumeeliwa musurukhu owo, wiira akhaliheriwe anna. Akhala wiira munniphavela okhaliherya, mpriyenxeri epetisau Voluntário do Departamento Local de Projeto/Construção (DC-50).

NWEHE EVIIDIYU ENI: OSAREYA WA MAASI, ONNIHONONA ITTHU OBRASIL. NUUMALA-VO MWAAKHULE NIKOHO NINTTHARELANA:

Exeeni yoosivenleni ni moota Anamoona a Yehova yaakhalihenrye aya atthu nuumala osareya maasi oBrasil, mwaakha wa 2020?