MAKHALELO A MAKRISTAU
Nipakeke Exeeni Etthoko Enimphwanya ahu Mwaana?
Vakhala wira nnimphwanya mwaana vatthokoni, ninvekeleke wira nimphavela olavula ni anamuyari awe. Eyo enimooniherya wira ninnaattittimiha axineene etthoko. (Mir 6:20) Vakhala wira mwaana onninlattula wira nivoloweke, hiyo nihaana okhootta. Nto anamuyari awe yaahikhale vakhiviru, nihaana otthikela empa eyo okathi mukina.
Hata mwaana owo oryeene muulupale, woonasa wene orina iyaakha 18 orowa ohoolo, nlelo vannitthuneya onvekela wira owiitthane anamuyari awe. Nto anamuyari awe yaahikhale, hiyo pooti omukoha vakhala wira onneemereriwa othanla iliivuru sinisoma awe. Vakhala wira owo onneemereriwa, hiyo pooti onvaha iliivuru wala omuthoonyerya esaiti jw.org.
Okathi onitthikela ahu omuxukurya mmiravo yoowo oonihenrye osiveliwa ekeekhai, nihaana onvekela wira nilavule ni anamuyari awe. Eyo enooneemererya waatthokiherya yoolakela ya waaxukurya wahu ni owooniherya malakiheryo oororomeleya ni oovareleya muteko ari mBiibiliyani anivahiwa imusi. (Esa 119:86, 138) Waattittimiha wahu anamuyari onoonikhaliherya waalaleerya ni onivaha eparakha ya owiixuttiha ekeekhai atthu a etthoko eyo.