Okathi mulopwana ni muthiyana anikhalana aya ekasamento yooloka, awo anninvuwiha Yehova ni annihakalala. (Mar 10:9) Wira akhalane ekasamento yooloka, makristau ahaana otthara oratteene malakiheryo a mBiibiliyani okathi animuthanla aya mutthu aniphavela aya othelana.

Niireke munnuupuwela onamorari? Vaamuloka olipelela ovira “iyaakha sa omiravo” okathi yoowo ophavela orupihana onitepa aya, nto eyo pooti owiirihani opaka yoothanla yoohiloka. (1 aKo 7:36) Murumeeleke okathi ola muhithenle anyu aahiiso muhitheliwe anyu wira mulipihe ompatthani anyu ni Yehova ni okhalana mikhalelo sooloka sa ekristau. Mwiira siiso, munookhalana ekasamento yooloka.

Muhinatthi othelana nviriheke okathi munceene muri ene hoothe wira musuwele oratteene ‘murima awe’. (1 Pe 3:4) Akhala wira munniweha etthu yoohiloka, muhaana ovaanela ni mutthu owo munnamorarina anyu. Ntoko eniiraneya aya ni apinaatamu ootheene, nuumala othelana muhaana wiimananiha opaka itthu sinimusivela ole muthelanne anyu ohiya opakeliwa itthu sinoosivelani. (aFil 2:3, 4) Akhala wira munimweettelaka malakiheryo a mBiibiliyani muhinatthi othela aahiiso otheliwa, eyo enimookhaliheryani okhalana ekasamento yoohakalala.

MOONIHERYE EVIIDIYU ENI: MALAKIHERYO ANIVAHIWA AYA ALE ANUUPUWELA OTHELA WALA OTHELIWA — MPANTTA 3: ‘NWEHEKE’ AKHALA WIRA MUNOOWERYA, NUUMALA-VO MWAAKHULE MAKOHO ANITTHARELANA:

• Onamorari wa murokora ninwehe ahu nviidiyuni ni Shane, weetta sai?

• Etthu xeeni murokora ole aawenhe awe nuumala omusuwela oratteene?

• Anamuyari awe murokora ole yaamukhalihenrye sai ni yoothanla xeeni yooloka aapanke awe?