Aayo. Muluku onnixanka vaavo murumeyi awe oniwereiwa awe. Biibiliya onihimya so: “Apwiya animwakhapelela okathi w’ohawa: animwakhomaliha okathi w’owereiwa ni wo wipulela”. (Esalimo 41:4) Akhala wira murina oretta ohinivoniwa, iponto sinittharelana sinimookhaliheryani vanceene:

1.   Nvekeleke wira Muluku oovaheeni ikuru wira nvilele. Mukupaliki ni murima wotheene wira onimoovahani “murettele wa Muluku, yoowo onvikana osuwela wotheene wa apinaatamu”. Nto eyo enoovukula oxanka wanyu ni wookhaliheryani ovilela.—aFilipi 4:6, 7.

2.   Mukhalaneke moonelo wooloka. Biibiliya onihimya wira: “Murima wottela murettele wa erutthu: murima woripiwa wumiha makhuva”. (Miruku 17:22, Biblia Solempwa Sowarya) Mwiimananiheke okhala mutthu oohakalala, nto eyo enimookhaliheryani ohiya paahi ohakalala mahiku ooriipiha murima, masi-tho enookhaliherya okumi anyu.

3.   Mulipiheke waamini mwanyu itthu Muluku onrowa awe opaka muhoolo. Nlipelelo nooloka nnimookhaliheryani ohakalala, hata murina ene oretta ohinivoniwa. (aRoma 12:12) Biibiliya onihimya wira onoophiya okathi “w’atthu ankhala mmuttettheni khavo-tho onkela ohimya wira: ‘Miyo ki muretta’”. (Yesaya 33:24) Muluku onoomaliha iretta sotheene sihinivoniwa, seiyo siensia ohiniwerya awe omaliha. Mwa ntakiheryo, Biibiliya onnooniherya wira atthu anrowa okhalaka ntoko amiravo, owo onihimya wira: “Siso irutthu saya sinotthikela okhalana ikuru s’omiravo aya: sinokhala-tho ntoko mahiku ònamwane aya”.—Yobi 33:25.

 Nkahaya nwehe ela: Nnaamwi nisuwelaka wira Muluku onninikhaliherya, Anamoona a Yehova annilooliwa oxiripitali akhala wira aakhalana oretta ohinivoniwa. (Marko 2:17) Masi khekhanle enamuna ya olooliwa nnootumereryahuni opaka, khula mutthu ohaana opaka soothanla sawe.