Cima Aawaanne Aayyiyo Waati Heemmanaadan Geeshsha Maxaafay Zorii?
Geeshsha Maxaafaa zaaruwaa
Gastta naati bantta cima aawaanne aayyiyo heemmiyoogee keehi koshshiyaaba. Geeshsha Maxaafay gastta naati ‘Xoossaa milatiyoogaa bantta so asaa [xeelliyoogan bessananne yaatidi] banttana yelidaageetuyyo kushe [zaarana]’ koshshiyoogaa yootees. “Aissi giikko, hegee Xoossaa ufaissiyaabaa.” (1 Ximootiyoosa 5:4) Gastta naati bantta cima aawaanne aayyiyo heemmiyo wode, eta bonchchanaadan Geeshsha Maxaafan odettida azazuwaakka azazettoosona.—Efisoona 6:2, 3.
Cima aawaanne aayyiyo waati heemmanaakko Geeshsha Maxaafay shaakki yootenna. Gidoppe attin, yaatida ammanettida attumaasatubaanne maccaasatubaa odees. Qassi heemmiyaageeta maaddana danddayiya zoriyaa yootees.
Beni wode issi issi asati cima aawaanne aayyiyo waati heemmidonaa?
Eti hanotaadan dumma dumma ogetun hegaa oottidosona.
Yooseefi ba cima aawaa Yaaqoobappe haahosan deꞌees. Yooseefi bawu hanotay injjetin Yaaqoobi bawu matasan deꞌanaadan oottiis. Yaatidi, Yooseefi ba aawawu keettaanne miyoobaa giigissiis, qassi A naagiis.—Doomettaabaa 45:9-11; 47:11, 12.
Uruta ba bolloteera I biitti baada iyyo koshshiyaabaa kunttanawu minnada oottaasu.—Uruto 1:16; 2:2, 17, 18, 23.
Yesuusi hayqqanaappe guuttaa kasetidi ba aayyiyo Mayraamo heemmana ura dooriis; A he wode amꞌꞌe gidennan waaya aggana.—Yohaannisa 19:26, 27. a
Heemmiyaageeta maaddana danddayiya ay zore Geeshsha Maxaafay yootii?
Cima aawaanne aayyiyo heemmiyaageeta issi issitoo abbiyaa xayssiyaanne liiqissiya metuwaa genccidi aattanaadan maaddiya maarati Geeshsha Maxaafan deꞌoosona.
Nena yelidaageeta bonchcha.
Geeshsha Maxaafay yootiyoobaa: “Ne aawaanne ne aayyiyo bonchcha.”—Kessaabaa 20:12.
He maaraadan oottana danddayiyoobay aybee? Nena yelidaageeti banttawu koyidoogaadan deꞌanaadan oottiyoogan eta bonchcha. Danddayettida peeshshan, neeni eta waata xeellanaakko eti kuuyanaadan ootta. Hegaadankka, eta maaddanawu neeyyo danddayettidabaa oottiyoogan eta bonchcha.
Eta hanotaa akeeka, qassi atto ga.
Geeshsha Maxaafay yootiyoobaa: “Aawussi de7iya aadhdhida eratettai hanqquwaa mitissees; moorida urau atto giyoogeekka bonchchissees.”—Leemiso 19:11.
He maaraadan oottana danddayiyoobay aybee? Cimida ne aaway woy aayyiyaa loꞌꞌennabaa haasayikko woy ne maaduwaa nashshana xayikko nena hagaadan oychcha, ‘Tanakka etadan akataa xayssiyaakkonne hirggissiyaakko, woni ta waananee?’ Neeni eta hanotaa akeekada atto giyo wode, woni iitaa bolli yaa gujjakka.
Haratuura zoretta.
Geeshsha Maxaafay yootiyoobaa: “Zoretai xayikko, halchchidobai halettees; daro zoriyaageeti de7iyoosan halchchidobai polettees.”—Leemiso 15:22.
He maaraadan oottana danddayiyoobay aybee? Nena yelidaageeta sakkiyaabi deꞌikko waatanaakko pilgga. Eta heemmanawu maaddiyaabi heeran aybi deꞌiyaakko akeeka. Cima aawaanne aayyiyo kase heemmidaageeta haasayissa. Neeyyo ishanttinne michchontti deꞌikko, inttena yelidaageetussi aybi koshshiyaakko, eta waati xeellanaakkonne intte waani hashetanaakko issippe zorettanawu halchchite.
Cima aawaanne aayyiyo waati heemmanaakko so asay issippe zorettanawu halchchite
Ne danddayennabaa akeeka.
Geeshsha Maxaafay yootiyoobaa: “Ashkketettaara aadhdhida eratettai yees.”—Leemiso 11:2.
He maaraadan oottana danddayiyoobay aybee? Neeyyo danddayettennabay aybakko akeeka. Leemisuwawu, asa ubbaa wodeenne wolqqay likketti uttiis. Hegee ne aawaassinne aayeessi neeni issi issibaa oottana danddayennaadan teqqees. Ne aawaanne aayyiyo xeelliyoogee neessi keehi deexxikko, intte so asati harati woy eranchchati maaddanaadan oychcha.
Nebaakka yegga bayoppa.
Geeshsha Maxaafay yootiyoobaa: “Ba bollaa ixxiya asi mulekka baawa; shin . . . ooninne ba bollaa mizeesinne naagees.”—Efisoona 5:29.
He maaraadan oottana danddayiyoobay aybee? Neeni nena yelidaageeta xeellana koshshikkokka, nebaanne aqo oyqqidaba gidikko qassi ne so asaabaakka qoppana bessees. Neeni loytta maana koshshees. Koshshiyaagaa keenaa shemppananne xiskkana bessees. (Eranchchaa 4:6) Danddayettiyaaba gidikko guuttaa takka takkada xeellana koshshees. Yaatiyoogee ne aawaanne aayyiyo loytta xeellanaadan maaddees.
Cima aawaanne aayyiyo waati xeellanaakko Geeshsha Maxaafay shaakki qonccissii?
Gastta naati banttana yelidaageeta waati xeellanaakko qoncce kaaletoy Geeshsha Maxaafan deꞌenna. Issi issi keettan danddayettida keenan naati banttana yelidaageeta xeelloosona. SHin issi issi hanotan, naati banttana yelidaageeta cima asaa xeelliyoosan wottana danddayoosona. So asay issippe shiiqidi ubbawu goꞌꞌiyaabay aybakko kuuyana danddayees.—Galaatiyaa 6:4,
a Geeshsha Maxaafaabaa pilggido issi xuufee ha xiqisiyaabaa hagaadan giis: “Yooseefi [Mayraami azinay] hegaappe daro kasetidi hayqqennan waayi aggana; qassi I naꞌay Yesuusi O maaddennan aggenna, yaatin I hayqqana haniyo gishshawu iyyo aybi kehee? . . . Kiristtoosi yaatiyoogan, naati bantta cima aawatussinne aayetussi issi issibaa injjeyana koshshiyoogaa tamaarissiis.”—Zi NIV Matiwu Henrii Komenterii in Wan Voliyum, sinttaa 428-429.
Hageeta Beꞌadii?
WOCHCHIYO KEELAA
Siiqiyo Uri Harggidi Hayqqana Haniyo Wode
Harggidi hayqqana haniya siiqiyo uraa so asay waati minttettana danddayii? Harggissiyaageeti banttawu siyettiya dumma dummabaa waani genccana danddayiyoonaa?
GEESHSHA MAXAAFAN DEꞌIYA WAANNA TIMIRTTETA
Xoossay tuggaa aybissi coꞌꞌu giidi xeellii?
Ha alamiyan ixoynne tuggay daridoy aybissakko daro asay oychchees. Geeshsha Maxaafay hegawu minttettiya zaaruwaa immees.
NUBAA
Geeshsha Maxaafaa Tamaaranawu Oychcha
Geeshsha Maxaafaabaa woy Yihoowa Markkatubaa loytta erana.