Ee, Dabloosi tumuppe deꞌiyaaba. I iita gididi Xoossaa bolli makkalidanne ‘ha saꞌaa haariya’ ayyaana mereta. (Yohaannisa 14:30; Efisoona 6:11, 12) Kaallidi deꞌiya sunttatuuninne qonccissotun Dabloosi oonakko Geeshsha Maxaafay yootees:

• Seexaanaa, “Eqettiyaagaa” giyoogaa.—Iyyooba 1:6.

• Dabloosa, “Sunttaa Mooriyaagaa” giyoogaa.—Ajjuutaa 12:9.

• SHooshshaa, Geeshsha Maxaafan deꞌiya “Balettiyaagaa” giyo birshshettay deꞌiyo suntta.—2 Qoronttoosa 11:3.

• Paacciyaagaa.—Maatiyoosa 4:3.

• Worddotiyaagaa.—Yohaannisa 8:44.

Iitatetta eeshshaa gidenna

Seexaanaa Dabloosi nu giddon deꞌiya iitatettaa eeshsha giidi issoti issoti qoppoosona. SHin, Xoossay Seexaanaara haasayidoogaa Geeshsha Maxaafay yootees. Xoossay wottiyoobi baynnaagaa gidiyo gishshawu, I ba giddon deꞌiya iitabaara haasayiis gaana danddayettenna. (Zaarettido Wogaa 32:4; Iyyooba 2:1-6) Hegaadankka, an nagari mule baynna Yesuusa Seexaanay paacciis. (Maatiyoosa 4:8-10; 1 Yohaannisa 3:5) Yaatiyo gishshawu, Dabloosi tumuppe deꞌiyaabaappe attin asa milatissi qonccissido iitatetta gidennaagaa Geeshsha Maxaafay qonccissees.

Dabloosi tumuppe deꞌiyoogaa daro asay ammanennaagan nuuni maalaalettana koshshii? CHii, koshshenna. Ayssi giikko, Seexaanay ba halchchuwaa polanawu asaa cimmiyoogaa Geeshsha Maxaafay yootees. (2 Tasalonqqe 2:9, 10) I deꞌiyoogaa asay ammanennaadan oottiyoogee, I asaa keehi cimmiyo ogetuppe issuwaa.—2 Qoronttoosa 4:4.

Tumaa: Issi issi Geeshsha Maxaafaa birshshettatun “Lusifer” geetettida Ibraawetto qaalay, “pooꞌiyaagaa” giyoogaa. (Isiyaasa 14:12) Keehippe otorettido gishshawu Xoossay kawushshana Baabiloone haaruwaa he qaalay qonccissiyoogaa yuushuwan deꞌiya qofaappe akeekoos. (Isiyaasa 14:4, 13-20) Baabiloone haaroy kunddi simmin eta baceessanawu, “pooꞌiyaagaa” giya qaalaa asay goꞌettiis.

Tumaa: Dabloosi Xoossawu morkkeppe attin, ayyo oottiyaagaa gidenna. Seexaanaa Dabloosi Xoossawu oottiya asaa eqettees, qassi wordduwan mootees.—1 PHeexiroosa 5:8; Ajjuutaa 12:10.