Xoossay koyro azinaanne machchiyo medhdhi simmidi, eti aqo oyqqidi issippe deꞌanaadan oottiis. Aqo deꞌoy issi attumaagaanne maccaari giddon merettiya duuxxenna dabbotetta gidana mala, qassi etinne eta naati woppu giidi deꞌanaadan maaddiyaaba gidana mala Xoossay giigissiis.—Doomettaabaa 1:27, 28; 2:18.

 Aqo laggeti ufayttanaadan Xoossay koyees. (Leemiso 5:18) I aqo deꞌoy ufayssiyaagaa gidanaadan maaddiya kaaletotanne maarata Geeshsha Maxaafan yootiis.

Ha huuphe yohuwan

•  Aqo deꞌuwa xeelliyaagan Xoossay kessido maaray aybee?

•  Coo shaahettiyoogaanne paraman shaahettiyoogaa xeelliyaagan Geeshsha Maxaafay woygii?

•  Aqo deꞌoy Xoossaa ufayssiyaagaa gidanaadan higgiyan paramettana koshshii?

•  Azinaynne machchiya oottana koshshiyaabaa, qassi etawu deꞌiya aawatettaa xeelliyaagan Geeshsha Maxaafay woygii?

•  Xoossay aqo laggeti ha wodiyan naata yelana bessees gii?

•  Geeshsha Maxaafay ta aqo deꞌuwan waati maaddana danddayii?

•  Aqo deꞌuwaabaa yootiya Geeshsha Maxaafaa xiqiseta

 Doomettan, Xoossay issi attumaageenne maccaara aqo deꞌuwan waaxettanaadan medhdhiis. (Doomettaabaa 2:24) Dawuttaa ekkiyoogaa, attumay attumaara maccay maccaara zinꞌꞌiyoogaa, woy higgiyan paramennan issippe deꞌiyoogaa Xoossay ixxees. (1 Qoronttoosa 6:9; 1 Tasalonqqe 4:3) Xoossay aqo deꞌuwa xeelliyaagan doomettan kessido maaraa kaallanaadan Yesuusi banan kaalliyaageeta tamaarissiis.—Marqqoosa 10:6-8.

 Xoossay aqo deꞌuwa duuxxenna dabbota ootti xeellees. Issi attumaageenne maccaara aqo oyqqiyo wode, issoy issuwawu ammanettanawunne paxa deꞌido wode ubban issippe deꞌanawu qaalaa geloosona. Eti he gelido qaalaa naaganaadan Xoossay koyees.—Marqqoosa 10:9.

 Aqo laggetuppe issoy bantta so asawu koshshiyaabaa kunttanawu qoppennan xeesettidi biyoogaa mala wodetun, geella issoy issuwaappe shaahettiyoogee koshshana danddayees. SHin, aqo deꞌuwan merettiya metotu gaasuwan shaahettiyoogaa Geeshsha Maxaafay diggees. Aqo laggeti hegaa mala wodetun hanotaa giigissanawu baaxetanaadan Geeshsha Maxaafay zorees.—1 Qoronttoosa 7:10.

 Issi azinay woy machchiya paraman shaahettana danddayiyoy wodiraa laammiyoogaa xallaana gidiyoogaa Geeshsha Maxaafay yootees. (Maatiyoosa 19:9) Hegaa gishshawu, wodiraa laammennan hara gaasuwan issi azinaynne machchiya paraman woy coo shaahettanawu kuuyikko, naaꞌꞌaykka hara ura ekkana woy gelana danddayennaagaa Geeshsha Maxaafay yootees.—Maatiyoosa 5:32; 1 Qoronttoosa 7:11.

 Aqo deꞌuwa xeelliyaagan kawotettay kessido higgiyawu Kiristtaaneti azazettanaadan Xoossay koyees. (Tiitu 3:1) Danddayettiyaaba gidikko, aqo laggeti higgiyan paramettiyoogee eti kawoy kessido higgiyaanne aqo deꞌuwan shaahettennan deꞌanaadan Xoossay kessido maaraa bonchchiyoogaa bessees. a

•   Etawu deꞌiya aawatettaa. Azinatinne machchoti issoy issuwa siiqananne bonchchana koshshees. (Efisoona 5:33) Eti mattuman issoy issuwawu koshshiyaabaa siiquwan kunttananne ammanettennaadan oottiya ubba hanotaappekka haakkana koshshees. (1 Qoronttoosa 7:3; Ibraawe 13:4) Etassi naati deꞌikko azinaynne machchiyaa eta dichchanawu bantta aawatettaa polana bessees.—Leemiso 6:20.

   Azinaynne machchiya kareeninne sooni oottana koshshiyaabata xeelliyaagan Geeshsha Maxaafay ubbabaa qonccissi yootenna. Bantta soo asawu loꞌꞌo gididabaa eti naaꞌꞌay kuuyana danddayoosona.

•   Azinaa aawatettaa. Azinay “ba maccaaseeyyo huuphe” gidiyoogaa Geeshsha Maxaafay yootees. (Efisoona 5:23) I huuphe giyoogee, ba soo asaa kaalettana, qassi ba machchiyoonne naata goꞌꞌiyaabaa kuuyana koshshees giyoogaa.

   Payyatettan, qofaaninne ayyaanaaban etawu koshshiyaabaa I kunttana bessees. (1 Ximootiyoosa 5:8) I issibaa ba keettaayeera issippe oottiyoogan, qassi issibaa kuuyiyo wode A qoppiyoobaanne iyyo siyettiyaabaa loytti akeekiyoogan ba keettaayee eeshshaanne eraa xoqqu ootti xeelliyoogaa bessees. (Leemiso 31:11, 28) Issi azinay ba aawatettaa siiquwaa bessiya ogiyan polana bessiyoogaa Geeshsha Maxaafay yootees.—Qolasiyaasa 3:19.

•   Machchee aawatettaa. Issi machchiyaa ‘ba azinaa wozanappe bonchchana bessiyoogaa’ Geeshsha Maxaafay yootees. (Efisoona 5:33) Xoossay azinatussi immido aawatettaa machchiyaa bonchchiyo wode I ufayttees.

   Iyyo deꞌiya aawatettay ba azinaa maaddiyoogaa, I loꞌꞌobaa kuuyanaadan kaafiyoogaa, qassi I huuphe gididi oottiyooban aara hashetiyoogaa. (Doomettaabaa 2:18) Aqo deꞌuwan ba aawatettaa poliya maccaasiyo Xoossay nashshiyoogaa Geeshsha Maxaafay yootees.—Leemiso 31:10.

 Akkay. Beni wode, Xoossay awu goynniyaageetuppe amaridaageeti naata yelanaadan azaziis. (Doomettaabaa 1:28; 9:1) SHin he azazoy Kiristtaaneti kaallana koshshiyaaba gidenna. Yesuusi bana kaalliyaageeti naata yelanaadan mule azazibeenna. Beni wode, I erissiyo ashkkaratuppe ooninne aqo oyqqidaageeti naata yelana bessees gibookkona. Aqo laggeti naata yelanawu woy yelennan agganawu koyikko banttawu kuuyana danddayoosona.

 Aqo laggeti koyruwaappe doommidi bantta aqo deꞌuwa giiga oottanaadan maaddiya maarati Geeshsha Maxaafan deꞌoosona. Qassi, Geeshsha Maxaafaa maarati metiya hanotati merettikko giigissanawu woy merettennaadan oottanawu aqo laggeta maaddana danddayoosona.

 Geeshsha Maxaafaa maarati aqo laggeti kaallidi deꞌiyaabata oottanaadan maaddana danddayoosona:

•   tumuppe siiqanaadan.—1 Qoronttoosa 13:4-7; Qolasiyaasa 3:14.

•   dummatettaa danddayidi deꞌanaadan.—1 Qoronttoosa 10:24.

•   loytti ezggiyaageeta gidanaadan.—Yaaqooba 1:19.

•   bonchchiyaageeta gidanaadan.— Roome 12:10.

•   atto giyaageeta gidanaadan.—1 PHeexiroosa 4:8.

•   ammanettiyaageeta gidanaadan.—Marqqoosa 10:9.

•   danddayanchcha gidanaadan.—Efisoona 4:2, 3.

•   hashetidi oottanaadan.—Eranchchaa 4:9.

•   bantta gelido qaalaa minttanaadan.— Siiquwaa Sabaa 8:7.