Issi issi haymaanootetun “Geeshsha Mikaaꞌeela” geetettiya Mikaaꞌeeli, saꞌaa yaanaappe kasenne saꞌaappe bi simmin Yesuusawu imettida suntta gidiyoogee qoncce. a Mikaaꞌeeli muusee hayqqi simmin, Seexaanaara palamettiis; qassi hananabaa yootiya Daaneelassi Xoossaa kiitaa yootanaadan issi kiitanchchaa maaddiis. (Daaneela 10:13, 21; Yihudaa 9) Mikaaꞌeeli Xoossaa haaruwawu exatiyoogaaninne A morkketuura olettiyoogan, “Xoossaa mali ooni deꞌii?” giya ba sunttaa birshshettaara maayettiyaabaa oottiis.—Daaneela 12:1; Ajjuutaa 12:7.

 Yesuusi kiitanchchatu halaqaa Mikaaꞌeela geetettana bessiyoy aybissakko akeeka.

•   Mikaaꞌeeli “Kiitanchchatu halaqaa.” (Yihudaa 9) Geeshsha Maxaafan, “kiitanchchatu halaqaa” giya bonchcho sunttay naaꞌꞌu xiqisetu xallan deꞌees. He qaalay naaꞌꞌu xiqisetunkka cora gidiyoogaa bessenna gishshawu, he bonchcho sunttay deꞌiyoy issi kiitanchcha xalla. He xiqisetuppe issoy, hayquwaappe denddida Godaa Yesuusi ‘azazuwaara, kiitanchchatu halaqaa cenggurssaara saluwaappe wodhdhanaagaa’ yootees. (1 Tasalonqqe 4:16) Yesuusi kiitanchchatu halaqaa Mikaaꞌeela gidiyo gishshawu, A cenggurssay ‘kiitanchchatu halaqaa cenggurssa.’

•   Yesuusi olanchcha kiitanchchata azazees. “Mikaa7eeli ba kiitanchchatuura issippe miimminttiyaara,” Seexaanaara olettiis. (Ajjuutaa 12:7) Mikaaꞌeeli ‘kiitanchchatu halaqatuppe issuwaa,’ qassi ‘gita halaqaa’ geetettido gishshawu, ayyo saluwan gita maatay deꞌees. (Daaneela 10:13, 21; 12:1) Ooratta Maachchaa eranchchay Devid I. Awuni yootidoogaadan, he bonchcho sunttati Mikaaꞌeeli ‘olanchcha kiitanchchata azaziya xoqqa halaqa’ gidiyoogaa bessoosona.

   Olanchcha kiitanchchatu bolli maatay deꞌiyo ura hara sunttay, Geeshsha Maxaafan issuwaa xallay odettiis. Azazettennaageeta qaxxayanawu, ‘Goday Yesuusi ba wolqqaama kiitanchchatuura tamaa lacuwaa giddon saluwaappe yaanaagaa’ Geeshsha Maxaafay yootees. (2 Tasalonqqe 1:7, 8; Maatiyoosa 16:27) Yesuusi “Saluwaa biidi . . . kiitanchcha ubbaa, maataara de7iyaageetanne wolqqaamata haarees.” (1 PHeexiroosa 3:21, 22) Xoossay, geeshsha kiitanchchata kaalettiya, issoy issuwaara keesettiya Yesuusanne Mikaaꞌeela sunttees giidi qoppiyoogee milatennaba. Hegaappe, Yesuusinne Mikaaꞌeeli, naaꞌꞌaykka issi ura suntta giidi qoppiyoogee bessiyaaba.

•   Mikaaꞌeeli hegaappe kase hani erenna sinttawukka hanenna ‘meto wodiyan’ “denddana.” (Daaneela 12:1) Daaneela maxaafan, “denddana” giya qaalay darotoo issi kawoy issi dummaba oottanawu denddiyoogaa bessees. (Daaneela 11:2-4, 21) “Xoossaa Qaalaa” geetettida Yesuus Kiristtoosi ‘kawotu Kawuwaa’ gidiyoogaadan, Xoossaa asaa ashshanawunne Xoossaa morkketa ubbaa xayssanawu dummabaa oottana. (Ajjuutaa 19:11-16) I ‘saꞌay merettoosappe hachchi gakkanaashin deꞌibeennanne hagaappe sinttawukka mule deꞌenna iita waayiyaa’ wode hegaadan oottana.—Maatiyoosa 24:21, 42.