Nuuni issibaa kuuyiyo wode maaddiya loꞌꞌo kaaletuwa Geeshsha Maxaafay yootees. An xaafettidabay nuuni “aadhdhida eratettaanne akeekaa” demmanaadan maaddees. (Leemiso 4:5) Issi issi hanotatun, keehi loꞌꞌo kuushshay awugaakko yootees. Hara hanotatun qassi, nuuni loꞌꞌobaa kuuyanawu maaddiyabaa zorees.

Ha huuphe yohuwan

•  Loꞌꞌobaa kuuyanawu maaddiya zoreta

•  Taani kase kuuyaychchidobaa laammana koshshii?

•  Taani giigissana danddayenna iitabaa kuuyidaba gidikko shin?

•   Dirbban kuuyoppa. Geeshsha Maxaafay hagaadan gees: “Cinccai akeekidi tanggees.” (Leemiso 14:15) Neeni dirbban kuuyikko, maaddiya qofata akeekennan aggana danddayaasa. Neeni oottana danddayiyo ubbabata takki gaada qoppa.—1 Tasalonqqe 5:21.

•   Neeyyo siyettiyabaa denddo oottada kuuyoppa. Nuuni nu wozanay yootiyoban ubbatoo ammanettana danddayennaagaa Geeshsha Maxaafay yootees. (Leemiso 28:26; Ermmaasa 17:9) Leemisuwawu, nuuni yiillotido, unꞌꞌettido, hidootaa qanxxido, sahettido woy keehi daafurido wode loꞌꞌobaa kuuyennan aggana danddayoos.—Leemiso 24:10; 29:22.

•   Aadhdhida eratettaa demmanawu woossa. (Yaaqooba 1:5) Xoossay hegaa mala woosata zaaranawu koyees. I ba naati koshshenna metuwan gelanaadan koyenna siiqiya Aawa. “[Yihooway, NW] aadhdhida eratettaa immees; appe eratettainne akeekoi beettees.”  a (Leemiso 2:6) I he aadhdhida eratettaa waannatettan ba Qaalaa, Geeshsha Maxaafaa baggaara yootees.—2 Ximootiyoosa 3:16, 17.

•   Pilgga. Loꞌꞌobaa kuuyanawu neessi ammanttiya naqaashay koshshees. Geeshsha Maxaafay yootiyogaadan, ‘Aadhdhida eranchchati kaaletota siyidi, eraa gujjoosona.’ (Leemiso 1:5) Yaatin, ammanttiya naqaashaa awuppe demmana danddayay?

   Nena qofissida allaalliya xeelliyagan Geeshsha Maxaafay woygiyakko beꞌa. Nuna Medhdhidaagee nuussi aybi loꞌꞌokko eriyo gishshawu, A Qaalaa giddon ammanttiya zoree deꞌees. (Mazamure 25:12) Kuuyiyo issi issibata xeelliyagan, Geeshsha Maxaafan qoncce kaaletoy deꞌees; hegee higge woy azazo gidana danddayees. (Isiyaasa 48:17, 18) Gidikkonne, kuuyiyo harabata xeelliyagan Geeshsha Maxaafay ubbabaa qonccissidi yootenna. Shin, kaaleto gidana danddayiya maaraa yootees. Hegee, nuuni kuuyiyobay hara asaagaappe dummatiyaba gidikkokka, loꞌꞌobaa kuuyanaadan maaddana danddayees. Nena maaddiya Geeshsha Maxaafaa qofaa demmanawu, Geeshsha Maxaafaa qofay deꞌiyo huuphe yohota woy xuufeta pilgga. Hegaa mala xuufeta ha web saytiyan miishsha qanxxennan demmana danddayaasa. b

   Neeni issi issibata kuuyiyo wode, ammanttiya hara naqaashata pilggiyogee koshshana danddayees. Leemisuwawu, neeni issibaa shammanaappe kase, ubba hegee keehi alꞌꞌoba gidikko, hegee merettido hanotaabaanne A giigissida dirijjitiyabaa loytta pilggana koshshees; qassi hegee moorettikko woy neeni guyye zaaranawu koyikko waatana koshshiyakko erana bessees. Hegee nena loytti maaddana danddayiyakkokka shaakka erana koshshees.

   Geeshsha Maxaafay, “Zoretai xayikko, halchchidobai halettees” yaagees. (Leemiso 15:22) Yaaniyo gishshawu, issibaa kuuyanaappe kasetada, ammanttiya asata zoretaa bessa. Leemisuwawu, akkamuwara gayttidabaa kuuyanawu, aakimiya zoretaa bessana danddayaasa. (Maatiyoosa 9:12) Issi issi hanotatun, neegaa malabay gakkiiddi deꞌiyogeeta zoretaa bessana danddayaasa. Gidikkonne, kuuyiyaynne he kuushshay kaalettiyobay gakkiyoy nenappe attin, neeni zoretaa bessido asata gidennaagaa hassaya.—Galaatiyaa 6:4, 5.

•   Ubba hanotata yuushsha qoppa. Neeni ubba naqaashata pilggidoogaa maaran, issuwa issuwa maaduwanne qohuwa gujjin, neeni doorana danddayiyobata xaafana danddayaasa. Yaatada, neeni kuuyiyobay kaalettana danddayiyobata loytta qoppa. (Zaarettido Wogaa 32:29) Leemisuwawu, neeni kuuyiyobay nena, ne so asaa woy harata waati qohana danddayii? (Leemiso 22:3; Roome 14:19) Neeni he oyshaassi zaariyobaynne Geeshsha Maxaafaa maarata qoppiyogee, loꞌꞌobaa kuuyanaadan nena maaddana danddayees.

•   Kuuya. Issi issitoo, nuuni siriyo gishshawu issibaa kuuyanawu guyye gaana danddayoos. Shin nuuni kuuyennan aggikko, loꞌꞌobay nuuppe halana woy nuuni koyibeennabay hanana danddayees. Hegaa giyogee, kuuyennan coo aggiyogee, iitabaa kuuyiyogaadan qohiyaba gidana danddayees giyogaa. Geeshsha Maxaafay goshshaabaa leemisuwa goꞌettidi hagaadan gees: “Carkkuwaa hanotaa naagiya ooninne kattaa zerenna; qassi shaarai denddanaashin naagiya ooninne ba kattaa cakkenna.”—Eranchchaa 11:4.

 Keehi loꞌꞌo kuushshaykka wottiyobi baynnaba gidennaagaa hassaya. Issi issitoo, nuuni issibaa doorikko harabaa aggana koshshees. Qassi, nuuni qoppibeennabay hanana danddayees. (Eranchchaa 9:11) Yaatiyo gishshawu, neeni doorana danddayiyobatuppe kehiyagee awugaakko shaakkada, loꞌꞌo ayfiya demissana danddayiyagaa doora.

 Issitoo kuuyettida kuushsha ubbay wurssetta kuushsha giyogaa gidenna. Ne hanotay laamettana danddayees woy neeni kase kuuyidoy iitabaa kaalettidoogaa akeekana danddayaasa. Yaatiyo gishshawu, he hanotaabaa zaaretta qoppada, loꞌꞌo ayfiya demissana danddayiyabaa kuuyiyogee eratetta.

 Gidikkonne, neeni kuuyaychchido issi issibati laamettennan aggana danddayoosona. (Mazamure 15:4) Leemisuwawu, azinaynne machchiya eti aqo oyqqiyo wode gelido qaalaa naaganaadan Xoossay koyees. c (Milkkiyaasa 2:16; Maatiyoosa 19:6) Yaatiyo gishshawu, aqo deꞌuwan metoy merettiyo wode, he metuwa giigissanawunne aqo deꞌoy laalettennaadan oottanawu baaxetana koshshees.

 Nuuni ubbaykka issi issitoo iitabaa woy eeyyabaa kuuyoos. (Yaaqooba 3:2) Nuuni zilꞌꞌettana woy nuna mooranchchadan xeellana danddayoos; hegee wottin deꞌiyaba. (Mazamure 69:5) Nuussi issi issitoo hegaadan siyettiyogee nuuni issi malabaa zaarettidi balennaadan oottikko, hegee loꞌꞌoba! (Leemiso 14:9) Gidikkokka, Geeshsha Maxaafay nuuni mooridobawu bessiyagaappe aaruwan zilꞌꞌettennaadan zorees; gaasoykka hegee nuuni hidootaa qanxxanaadaaninne bessiyagaadan qoppennaadan oottana danddayees. (2 Qoronttoosa 2:7) d Yihooway “qarettiyaagaanne maariyaagaa” gidiyogaa Geeshsha Maxaafay yootees. (Mazamure 103:8-13) Yaatiyo gishshawu, neeni giigissana danddayenna iitabaa kuuyidaba gidikko, he balaappe tamaara qassi hanotay kaseppe loꞌꞌo gidanaadan neeyyo danddayettidabaa ootta.