Saꞌan sarotettay deꞌanaadan oottanay Kiristtoos Yesuusi haarana Xoossaa Kawotettaa, woy saluwaa kawotettaa. Asay baaxetidi hegaadan oottana danddayenna. Ha ufayssiya hidootaa xeelliyaagan Geeshsha Maxaafay yootiyoobaa akeeka.

1.   Xoossay “sa7an a ufaissiya asaassi sarotettai” deꞌanaadan oottanawu gelido qaalaa poliyoogan, “sa7aa gaxaa gakkanaassi de7iya olaa” teqqana.—Mazamure 46:9; Luqaasa 2:14.

2.   Xoossaa Kawotettay saluwan gididi kumetta saꞌaa haarana. (Daaneela 7:14) He kawotettay kumetta saꞌaa haariyo gishshawu, ooshshawu waanna gaaso gidida zariyan zaggiyoogaa xayssana.

3.   Xoossaa Kawotettaa Kawoy Yesuusi, “Sarotettaa Halaqaa” geetettiis; qassi I, “sarotettau zawai [deꞌennaadan]” oottana.—Isiyaasa 9:6, 7.

4.   Makkalabaa oottanawu koyiya asay he Kawotettaa haaruwan deꞌana danddayenna. Ayssi giikko, “hanttaarabaa siiqiyaageeta [Xoossay] keehippe ixxees.”—Mazamure 11:5; Leemiso 2:22.

5.   Sarotettan deꞌana danddayiyo ogiyaabaa Xoossay bawu haarettiyaageeta tamaarissees. Hegaadan tamaarissiyoogee waati maaddiyaakko Geeshsha Maxaafay hagaadan gees: “Eti bantta bisuwaa marasha, bantta tooraakka baaca kessanau qoxxana. Kawotettai kawotettaa bolli bisuwaa denttenna. Hegaappe guyyiyan eti mulekka olaa timirttiyaa tamaarokkona.”—Isiyaasa 2:3, 4.

 Ha wodiyan, miilooniyan qoodettiya asay sarotettan deꞌana danddayiyo ogiyaabaa Xoossaappe tamaariiddi deꞌees. (Maatiyoosa 5:9) Nuuni Yihoowa Markkati dumma dumma zariyaappe yiidabanne 230ppe dariya biittatun deꞌiyaaba gidikkonne, hara asaa qohanawu olaa miishshaa oyqqokko.