Ee. Sahettiya ba ashkkaratussi Xoossay qoppees. Ammanettida Xoossaa ashkkaratubaa Geeshsha Maxaafay hagaadan gees: “GODAI a harggiyaa hiittan de7ishinkka maaddees.” (Mazamure 41:3) Wolqqaama harggee nena sakkiiddi deꞌiyaaba gidikko, kaallidi deꞌiya heezzubati nena maaddana:

1.   Genccanawu wolqqaa demmana mala woossa. Metoy deꞌishinkka inttena maaddiya ‘eratettaa ubbaappe aadhdhiya Xoossaa sarotettaa,’ intte demmana.—Piliphphisiyuusa 4:6, 7.

2.   Loꞌꞌobaa qoppa. Geeshsha Maxaafay hagaadan gees: “Wozani ufaittiyoogee asassi lo77o xale; shin kayyottiyoogee asau wolqqaa xaissees.” (Leemiso 17:22) Neeni ubbatoo moocu giyoogee azzaniyoogaa agganaadana xalla gidennan ne payyatettawukka maaddana.

3.   Sinttappe ne demmana hidootaa mintta. Wolqqaama harggee deꞌishinkka ufayttanaadan hidootay nena maaddana danddayees. (Roome 12:12) Geeshsha Maxaafay, “Xiyoonen de7iya ooninne, ‘Taani harggais’” geennaagaa kasetidi yootiis. (Isiyaasa 33:24) Ha wodiyan zammaana sayinisiiyaa eran asay pattana danddayibeenna wolqqaama harggeta ubbaa Xoossay pattana. Leemisuwawu, cimidaageeti yelaganaagaanne payya gidanaagaa xeelliyaagan Geeshsha Maxaafay hagaadan gees: “a bollai yelagana; a yelagatettaa wolqqaikka ayyo simmana.”—Iyyooba 33:25.

 Hassayissuwaa: Yihoowa Markkati Xoossaa maaduwaa ekkiyaaba gidikkonne, wolqqaama harggee oyqqiyo wode aakkamettoosona. (Marqqoosa 2:17) Gidikkonne, hagaa mala akkamoy loꞌꞌo giidi nu qofaa yootokko; akkamuwaara gayttidabaa ooninne bawu doorana koshshiyoogaa akeekoos.