Ha huuphe yohuwan

•  Aqo oyqqanawu qoppidi wodiya aattiyogaa giyogee woygiyogee?

•  Aqo oyqqanawu qoppada wodiya aattiyogaa doommanawu gakkadii?

 Issi issi asay aqo oyqqanawu qoppidi wodiya aattiyogaa coo ufayttanawu oottiyobadan xeellees. Gidikkokka, ha huuphe yohuwan, “Aqo oyqqanawu qoppidi wodiya aattiyogaa” giyogee issi attumaageenne maccaara issoy issuwawu haniya aqo laggekkonne eranawu issippe aattiyo wodiya qonccissiyaba. Yaatiyo gishshawu, aqo oyqqanawu qoppidi wodiya aattiyogawu halchchoy deꞌees. Hegee mattuman banttappe dummatiya uran dosettanawu koyidi coo oottiyoba gidenna.

 Aqo oyqqanawu qoppidi wodiya aattiyogee, guyyeppe aqo oyqqanawu woy siiqettiyogaa agganawu kuuyanaadan maaddana koshshees. Neeni aqo oyqqanawu qoppada wodiya aattiyogaa doommiyo wode, ha naaꞌꞌubaappe issoy haniyogee attennaagaa erana bessees.

 Kulkka qofaa: Neeni aqo oyqqanawu qoppada wodiya aattiyogaa doommanawu giigettidoogaa ammanettikko, aqo oyqqanawu giigettidoogaakka ammanettana bessees.

 Aqo oyqqanawu qoppidi wodiya aattiyogee aqo deꞌuwakko kaalettana danddayees, yaatiyo gishshawu neeyyo deꞌiya eeshshatubaa pilggiyogan neeni ay mala aqo lagge gidanaakko qoppana koshshees. Leemisuwawu, kaallidi deꞌiyabata akeeka:

•   So asaara deꞌiya dabbotettaa. Neeni unꞌꞌettiyo wodekka, nena yelidaageeta, qassi ne ishanttanne michchontta oyqqiyo ogee, ne aqo laggiya ne waata oyqqanaakko qonccissana danddayees.

   Geeshsha Maxaafaa maaraa: “Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite.”—Efisoona 4:31.

   Nena hagaadan oychcha: ‘Tabaa oychchiyakko tana yelidaageeti, qassi ta ishatinne michchoti taani eta bonchchiyogaa yootanee? Etappe issuwara maayettennabay merettiyo wode, woppu gaada etaara haasayiyanaayye, hanqquwa suulliyanaanne palamettiyanaa?’

•   Ne goꞌꞌaa agga bayiyogaa. Neeni aqo oyqqiyo wode, ne aqo laggee koyiyobaa akeekana, qassi darotoo ayyo woy iyyo koshshiyabaa kaseyanawu ne goꞌꞌaa agga bayana koshshiyogaa akeekana bessees.

   Geeshsha Maxaafaa maaraa: “Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.”—1 Qoronttoosa 10:24.

   Nena hagaadan oychcha: ‘Ubbabay taani koyiyo oge xallan hananaadan koyiyanaa? Hanotaadan haniya asadan harati tana xeelliyonaa? Taagaappe aaruwan haratu koshshaa kaseyiyogaa ayba ogetun bessaydda deꞌiyanaa?’

•   Ashkketettaa. Loꞌꞌo aqo laggee ba balaa ammaneesinne hegawu wozanappe maarotaa oychchees.

   Geeshsha Maxaafaa maaraa: “Nuuni ubbaikka daroban baleettees.”—Yaaqooba 3:2.

   Nena hagaadan oychcha: ‘Ta balaa sohuwara ammaniyanaayye, woy hegawu gaaso shiishshiyanaa? Harati taani giigissana koshshiyabaa zoriyo wode sohuwara lancciyanaa?’

•   Miishshaara gayttidabaa. Aqo laggetu giddon darotoo karssikarssay merettanaadan oottiyabatuppe issoy miishshaa. Neeni miishshaa maara goꞌettiyaba gidikko, hegaa malabay merettennaadan oottana danddayaasa.

   Geeshsha Maxaafaa maaraa: “Gimbbe keettaa keexxanawu koyidi hegaa polanawu koshshiyabay deꞌiyogaa koyro uttidi qoppennay intteppe oonee?”—Luqaasa 14:28.

   Nena hagaadan oychcha: ‘Taani miishshaa maara goꞌettiyanaayye, darotoo acuwan geliyanaa? Taani miishshaa maara goꞌettiyogaa waata bessaydda deꞌiyanaa?’

•   Ayyaanaaban minnidi deꞌiyogaa. Neeni Yihoowa Markka gidikko, ubbatoo Geeshsha Maxaafaa xannaꞌananne Kiristtaane shiiqota shiiqana koshshees.

   Geeshsha Maxaafaa maaraa: “Ayyaanaabaa saamettiyageeti ufayttoosona.”—Maatiyosa 5:3.

   Nena hagaadan oychcha: ‘Taani ta ammanuwa minttada deꞌanawu baaxetiyanaa? Taani ayyaanaabaa meezeta aybippenne kaseyiyanaayye, harabati kelttiya gelanaadan oottiyanaa?’

 Kulkka qofaa: Neeni ekkiyo woy geliyo urawu, neeni loꞌꞌo aqo lagge gidana koshshees. Ne hegaa mala asa gidanawu baaxetaydda deꞌikko, neegaadan oottiiddi deꞌiya loꞌꞌo aqo laggiya demmana danddayaasa.