Mattuman Ta Mala Uraa Siiqays—Hegaa Giyoogee Mattuman Ta Mala Gidida Uraara Aqo Oyqqanawu Koyays Giyoogee?
Mule gidenna!
Tumaa: Mattuman issi mala gidida uraa siiqiyoogee darotoo takkiyaaba gidenna.
Layttay 16 gidido Liizeta he qofaa maayawusu; A issi wode issi naꞌiyo siiqaasu. A hagaadan gaasu: “Timirtte keettan bayoloojiyaa tamaariyo wode, panttatettaa wodiyan hormoniyaa yesoy keehi gujjiyoogaanne guuxxiyoogaa tamaaraas. Daro yelagati bantta bolla giddon hanettiyaabaa loytti eriyaakko, mattuman issi mala gidida ura siiqiyoogee takkennaba gidiyoogaa akeekananne attumaagee attumaagaara maccaagee maccaagaara mattumaa gayttanaadan oottiya paaciyaa eti xoonana gaada qoppays.”
Ubba yelagatikka maattumaara gayttidaagan alamee kaalliyo moorettida kandduwaa woy Xoossaa qaalan deꞌiya xoqqa kandduwaa maaraa kaallanawu doorana bessees
SHin mattuman issi mala gidida ura siiqiyoogee aggiigiyaabaa gidana xayikko shin? Mattuman ba mala gididaagaa siiqiya ura Xoossay attumaagee attumaagaara maccaagee maccaagaara mattumaa gayttennaadan azazidoogee Xoossaa meqetta iita giissii?
Wurssetta oyshaa ee gaada zaariyaaba gidikko, hegaa mala qofay asay ba ashuwaa amuwaa polana koshshiyaabadan qoppiyo iita qofa gidiyoogaa neeni akeekana koshshees. Asay hegaa mala ba iita amuwaa agganawu doorana danddayiyoogaa yootiyoogan Geeshsha Maxaafay eta bonchchees.—Qolasiyaasa 3:5.
Geeshsha Maxaafay oosuwan peeshshana danddayiyo kaaletuwaa yootees. Geeshsha Maxaafay “shaaramuxappe baqatite” yaagees. Mattuman ba mala gidenna ura siiqiya urawu imettida ha azazoy mattuman ba mala gidida uraara mattumaa gayttanawu paacettiya urawukka haniyaaba. (1 Qoronttoosa 6:18) Mattuman banttappe dumma gidiya ura machchidi deꞌiya miilooniyan qoodettiyaageeti ay paacee gakkishinkka, Geeshsha Maxaafay yootiyo maaraadan bantta huuphiyaa naagidi deꞌoosona. Mattuman bantta mala uraa machchidi deꞌanawu paacetiyaageetikka, tumuppe Xoossaa ufayssanawu koyiyaaba gidikko banttana naagidi deꞌana danddayoosona.—Zaarettido Wogaa 30:19.
Hageeta Beꞌadii?
YELAGATI OYCHCHIYO OYSHAA
Attumay Attumaara Maccay Maccaara Zinꞌꞌiyoogee Balee?
Geeshsha Maxaafay mattuman masatettiya uraara inddan gayttiyaageeti iita asa gii? Issi Kiristtaanee mattuman masatettiya ura qaaqqatiiddi Xoossaa ufayssana danddayii?
