Mattuman gakkiya qohoy mattumaara gayttidaagan hanana bessenna ay eeshshaara, hegeekka bochchiyoogaa woy ubba mattumaara gayttidaagan haasayiyoobaara gayttidaagaa. SHin issi issitoo naachchaa, lambbeechchuwaanne mattuman gakkiya qohuwaa giddon deꞌiya dummatettaa eranawu metana danddayees.

 Hegeetu giddon deꞌiya dummatettaa eray?  Mattuman gakkiya qohuwaa xeelliyaagan hagan deꞌiya oyshaa beꞌada shaakka era!

 Mattuman gakkiya qohoy darotoo neeni timirttiyaa wurssa simminkka attiyaaba gidenna. Gidoppe attin, neeni tamaariyo wode mattuwan gakkiya qohuwaa eqettiyoogaa meezetikko, oosuwaa doommiyo wodekka neeni hegaa eqettanawu maaddees. Qassi mattuman qohiya uray haratakka qohennaadan maaddana danddayaasa!

 Mattuman gakkiya qohoy aybakko, qassi hegaa waati eqettanaakko erikko teqqana danddayaasa! Kaallidi deꞌiya heezzu hanotatanne he hanotati nena gakkiyo wode neeni waatana danddayiyaakko qoppa.

 HANOTAA:

“Ooso sohuwan taappe keehi cimiya attuma asati taani keehi loꞌiyoogaanne yelaga gidorkkonishsha giidi tawu daroto yootoosona. Ubba etappe issoy taappe guyyeera kaallidi ta huuphiyaa singgiis!”—Taabito, 20.

 Taabita hagaadan qoppana danddayawusu: ‘Taani coo gaada genccikko I aggiigana danddayees.’

 Hegee maaddennay aybissee? Eranchchati mattuman gakkiya qohuwaa issi uri coꞌꞌu giidi aadhdhiyoogee darotoo gujji gujji baanaadaaninne ubba wolqqaamabay gakkanaadan oottiyoogaa yootoosona.

 Hagaadan oottanawu mala: Mattuman qohiya uri I haasayiyoobay woy haniyoobay nena yiilloyiyoogaa woppu giida hanotan zirxxi oottada yoota. Layttay 22 gidido Taariyina hagaadan gaasu, “Issi uri tana bessenna ogiyan bochchikko, taani guyye simmada naaꞌꞌantto tana hegaadan mule bochchennaadan yootays. Yaatiyo wode he uri darotoo maalaalettees.” Mattuman qohiya uri hegaa aggennaba gidikko hidootaa qanxxennan eqetta. Xoqqa kandduwaa maaraa kaalliyoogaa xeelliyaagan Geeshsha Maxaafay: ‘Minni eqqanaadaaninne poli ammananaadan’ zorees.—Qolasiyaasa 4:12.

 Mattuman qohuwaa gattiya uray nena qohanawu yashissikko shin? Hegaadaana gidikko aara eqettoppa. Danddayettiyaaba gidikko sohuwaara he heeraappe baqata, qassi ammanettiyo gastta uri maaddanaadan oychcha.

 HANOTAA:

“Taani usuppuntta kifiliyan deꞌishin naaꞌꞌu macca naati ta biishin miyyiyaara aadhdhiiddi tana oyqqidosona. Etappe issinna macca naatuura zinꞌꞌiyaaro, qassi taanikka iira zinꞌꞌanaadan koyaasu. Taani ixxis ginkka eti timirtte keettan ubba galla tana qohiyaabaa oottiyoogaa aggibookkona. Ubba issi galla tana godaara narphphidosona!”—Vikitooriyo, 18.

 Vikitooriyaa hagaadan qoppana danddayawusu: ‘Taani hagaa asawu yootikko eti tana laafa asadan xeellana, qassi tana ooninne ammanennan aggana danddayees.’

 Hegaadan qoppiyoogee maaddennan aggana danddayiyoy aybissee? Neeni hegaa asawu yootennan aggikko, mattuman qohiya uray hegaadan oottiyoogaa aggennan ixxana qassi harata qohana danddayees.—Eranchchaa 8:11.

 Hagaadan oottanawu mala: Maaduwaa oychcha. Nena yelidaageetinne asttamaareti mattuman qohiya uraa neeni eqettanawu maaddana danddayoosona. Ne yootido asati ne odidobaa xaasayi xeellikko shin? Hagaadan ootta: Nena mattuman qohoy gakkiyo wode ubban ubbabaa xaafa oyqqa. Hegeekka I giidobaa gujjin wodiyaa, saatiyaanne sohuwaa. Yaatada hegaa nena yelidaagawu woy asttamaariyawu imma. Daro asay yootin siyidobaappe xaafi immidobaa xoqqu ootti xeellees.

 HANOTAA:

“Kuwaasiyaa kaassaa citan deꞌiya issi naꞌaa taani tumuppe keehi yayyaas. A geesay naaꞌꞌu meetire keena, qassi I 135 kilo giraame! I tanaara ‘mattuman gayttanawu’ qoppiis. Ubba galla layttaa kumettaa tana unꞌꞌettiis. Issi galla nu naaꞌꞌaa xallay kifiliyan deꞌishin taakko shiiqiis. Guppa denddada woxxada kare kiyaas.”—Juuleto, 18.

 Juuleta hagaadan qoppana danddayawusu: ‘Attuma naati ubbatoo hegaadan hanoosona.’

 Geella hegee maaddennay aybissee? Hegee aynne baa giidi ubba asay qoppiyaaba gidikko, mattuman qohiya uray ba eeshshaa laammennan aggana danddayees.

 Hagaadan oottanawu mala: Hanotan naacennaadan woy miiccennaadan naagetta. Neeni coꞌꞌu gaada kanttiyoobaynne kanttennabay aybakko, mattuman nena qohiya urawu ne sinttaa gujjin ne hanotan qonccissa.

 TUMU TAARIKIYAA 1:

“Taani asawu iitanawu mule koyikke. Yaatiyo gishshawu attumaageeti tana mattuman qohiyo wode, aggite gaada etawu yootays shin loytta eqettikke. Darotoo miicca ekkada eta haasayissays. Taani lambbeechchiyaabadan eti qoppoosona.”—Taabito.

•   Neeni Taabito gidiyaakko mattuman qohiyaageetussi woyga zaaruutii? Aybissi?

•   Mattuman qohiya uray neeni A woy O lambbeechchaydda deꞌiyaabadan qoppanaadan oottana danddayiyaabay aybee?

 TUMU TAARIKIYAA 2:

“Bollaa minttetto timirtte saatiyan amarida attuma naati pokkobaa haasayiyoogan ubbabay doommiis. Eti oottiyoobaa guutta wodiyawu sheneho gaas, shin hanotay yaa iiti iiti biis. Hegaappe simmin he naati ta matan uttidi bantta kushiyaa ta hashiyan wottiyoogaa doommidosona. Taani eta kushiyaa suga olaas, shin eti aggibookkona. Wurssettan he naatuppe issoy pokkobay xaafettido woraqataa taassi immiis. Taani he woraqataa efaada asttamaariyaassi immaas. Yaatin he naꞌay timirtte keettaappe goodettiis. Taani asttamaariyawu koyro odana koshshiyoogaa akeekaas!”—Sabbino.

•   Sabbiina asttamaariyawu yootanawu hegaappe kasetada babeennay aybissa gaada qoppay? A kuuyidobay loꞌꞌo gaada qoppay? Loꞌꞌo gididoy woy loꞌꞌo gidennay aybissee?

 TUMU TAARIKIYAA 3:

“Ta kaalo ishaa Gireegi sheeshsha keettan deꞌishin issi naꞌay A mati yiis. He naꞌay akko shiiqidi, ‘Tana yera’ yaagiis. Gireegi akkay giis, shin naꞌay aggidi bibeenna. Gireegi he naꞌaa ba matappe sugana koshshiis.”—Suuzaano.

•   Gireega mattumaa qohoy gakkiis gaada qoppay? Qoppiyoy aybissee woy qoppennay aybissee?

•   Issi issi attuma naati hara naꞌay mattumaa qohuwaa gattiyo wode asassi yootennay aybissa gaada qoppay?

•   He hanotan Gireegi oottidobay likke gaada maayay? Nena gidiyaakko waatuutii?